ތެހްރާން، އިރާން (ނޮވެމްބަރު 21) - އިރާނުގެ ދެ ވަނަ އަށް އެންމެ ބޮޑު އެއާލައިން، މަހަން އެއާ އަށް އަނެއްކާވެސް ސައިބާ ހަމަލާއެއް އަމާޒުވެއްޖެ އެވެ.
"މަހަން އެއާގެ ކޮމްޕިއުޓަރު ސިސްޓަމަށް ވަނީ އާ ހަމަލާއެއް އައިސްފައި،" ކުންފުނިން ނެރުނު ބަޔާނެއްގައި ބުންޏެވެ.
"އިރާނުގެ އޭވިއޭޝަން އިންޑަސްޓްރީގައި މަހަން އެއާގެ މުހިއްމުކަން ބޮޑުވުމުން މީގެ ކުރިން ވެސް އެތައް ފަހަރެއްގެ މަތިން ހަމަލާތައް އަމާޒުވެފައިވޭ."
ބަޔާނުގައި ބުނީ ހުރިހާ ފްލައިޓެއް ޝެޑިއުލާ އެއް ގޮތަށް ކުރިއަށް ދާނެ ކަމަށާއި ނަމަވެސް ކުންފުނީގެ ވެބްސައިޓު ޑައުންވެފައިވާ ކަމަށެވެ.
"އަޅުގަނޑުމެންގެ އިންޓަނެޓް ސެކިއުރިޓީ ޓީމުން ދަނީ ސައިބާ ހަމަލާ ހުއްޓުވަން މަސައްކަތް ކުރަމުން،" ތަރުޖަމާން ހުސެއިން ޒުލަންވަރީ ދައުލަތުގެ ޓީވީ އަށް ވިދާޅުވި އެވެ.
މަހަން އެއާ އަކީ އިރާނުގެ އެންމެ ބޮޑު ޕްރައިވެޓް އެއާލައިނެވެ. އަދި އެއީ ގައުމީ އެއާލައިން އިރާން އެއާ އަށް ފަހު އެންމެ މުހިއްމު އެއާލައިނެވެ.
ދެހާސް އެގާރަ ވަނަ އަހަރުން ފެށިގެން އެމެރިކާ އިން ދަތިކުރުމުގެ ފިޔަވަޅު އަޅަން ބްލެކްލިސްޓުކޮށްފައިވާ ކުންފުނިތަކުގެ ތެރޭގައި މަހަން އެއާ ހިމެނެ އެވެ.
އިރާނުގެ އެތެރޭގެ ދަތުރުތަކުގެ އިތުރުން ޔޫރަޕާއި އޭޝިއާގެ މަންޒިލްތަކަށް ވެސް އެ އެއާލައިނުން ދަތުރު ކުރެ އެވެ.
މިދިޔަ މަހު އިރާނުގެ ޕެޓްރޯލް ސަޕްލައި ކުރާ ނިޒާމަށް ސައިބާ ހަމަލާއެއް ދިނުމުން ޕެޓްރޯލް ލިބުމުގައި ދަތިތައް ދިމާވި އެވެ. އިރާނުން ތުހުމަތު ކުރާ ގޮތުގައި ހަމަލާ ދިނީ އިޒްރޭލާއި އެމެރިކާއިންނެވެ.
އިރާނުން ވެސް ސައިބާ ހަމަލާތައް ދޭ ކަމަށް ތުހުމަތު ކުރެވެ އެވެ. އެގޮތުން ދާދި ފަހުން އިޒްރޭލުގެ އިންޓަނެޓް ކުންފުންޏަކަށް ހަމަލާ ދިނީ އިރާނުގެ ބްލެކް ޝެޑޯ ގްރޫޕުން ކަމަށް ބެލެވެ އެވެ.
