ޖަލުތަކުގައި ހަރުކަށި ފިކުރާ ދެކޮޅަށް އަޅަމުންދާ ފިޔަވަޅުތަކުގެ ތެރެއިން ހަރުކަށި ފިކުރު ފަތުރާ ގައިދީން ދެނެގަންނަން ހިންގި ރިސްކް އެސެސްމަންޓުތަކުން މިހާތަނަށް ފާހަގަކުރެވުނު 40 ގައިދީން ޖެނުއަރީ މަހުގެ ކުރިން ހަރުކަށި ފިކުރުގެ މީހުންނަށް ހާއްސަ ޔުނިޓަށް ބަދަލުކުރާނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.
ހޯމް މިނިސްޓްރީގެ މަސައްކަތްތަކުގެ މައުލޫމާތު ދޭން ބޭއްވި ނޫސްވެރިންގެ ބައްދަލުވުމުގައި, ހަރުކަށި ފިކުރުގެ ގައިދީން ބޭތިއްބުމަށް ހެދި ސްޕެޝަލް މެނޭޖްމަންޓް ޔުނިޓު (އެސްއެމްޔޫ)އަށް ގައިދީން ބަދަލުކުރުމާ ގުޅޭ ގޮތުން އިމްރާން ވިދާޅުވި ގޮތުގައި، އެ މަސައްކަތް ހުއްޓިފައި އޮތީ ރިހެބިލިޓޭޝަން ޕްރޮގްރާމް ހިންގާނެ މީހަކު ނުލިބިގެންނެވެ. މިހާރު ފަރުމާކޮށް ނިމިފައިވާ އެ ރިހެބިލިޓޭޝަން ޕްރޮގްރާމް ހިންގާނެ މީހަކު ލިބުމުން ގައިދީން އެސްއެމްޔޫ އަށް ބަދަލުކުރާނެ ކަމަށް އޭނާ ވިދާޅުވި އެވެ.
"އަޅުގަނޑު އުއްމީދު ކުރަނީ ކުރިޔަށް އޮތް އަހަރުގެ އެންމެ ލަސްވެގެން ޖެނުއަރީ ފެށެންވާއިރަށް އެ މީހުން ވަކިކުރެވި، އެ މީހުން ރިހެބިލިޓޭޓް ކުރުމުގެ މަސައްކަތް ފެށިގެން ދާނެ ކަމަށް." އިމްރާން ވިދާލުވި އެވެ.
ނޫސްވެރިންގެ ބައްދަލުވުމުގައި ކޮމިޝަނަ އޮފް ޕްރިޒަންސް އަހުމަދު މުހައްމަދުފުޅު ވިދާޅުވީ ހަރުކަށި ފިކުރު ފަތުރާ މީހުން ބައިތިއްބަން ހަދާ އެސްއެމްޔޫގެ މަސައްކަތް އެއްކޮށް ނިމިއްޖެ ކަމަށެވެ.
މިއީ ހާއްސަ ތަމްރީނުތަކެއް ލިބިފައިވާ ޖަލު އޮފިސަރުންގެ ޔުނިޓަކުން ބަލަހައްޓާ 100 މީހުންގެ ޖާގައިގެ ހައި ސެކިއުރިޓީ ޔުނިޓެކެވެ.
އަހުމަދު ވިދާޅުވީ އެ ޔުނިޓުގައި އަމަލުކުރާނެ ގޮތުގެ އުސޫލު މިހާރު އެކުލަވާލާފައިވާ ކަމަށެވެ. އަދި އެތަނުގައި މަސައްކަތްކުރާ ޖަލު އޮފިސަރުންގެ ތަމްރީނުތައް ވެސް ނިމިއްޖެ ކަމަށް އޭނާ ވިދާޅުވި އެވެ.
އެސްއެމްޔޫ ޔުނިޓަށް ބަދަލުކުރާނެ ގައިދީން ދެނެގަތުމުގެ މަސައްކަތް ކުރަނީ، އެކަމަށް ހާއްސަކޮށް ޑިވެލޮޕްކުރި ރިސްކް އެސެސްމަންޓެއްގެ ޒަރިއްޔާއިންނެވެ. މި ރިސްކް އެސެސްމަންޓުގެ ފުރަތަމަ މަރުހަލާ ނިމިފައިވާއިރު، އެ މަރުހަލާގައި ގައިދީންނާ އިންޓަވިޔުކޮށް ފުލުހުންގެ އިންޓެލިޖެންސުން ލިބެންހުރި މައުލޫމާތުތައް ކަރެކްޝަނުން ހޯދި އެވެ.
މިހާރު ކުރިޔަށްދަނީ މިކަމާ ގުޅުންހުރި އިދާރާތަކުން އެއްކުރަންޖެހޭ މައުލޫމާތު އެއްކޮށް، ހުރިހާ މައުލާމާތެއް ވިލަރެސްކުރުމުގެ މަސައްކަތެވެ. އެ މަސައްކަތް ނިމުމުން ހަރުކަށި ފިކުރުގެ ގައިދީން ދެނެގަތުމުގެ މަސައްކަތް ނިމޭނެ ކަމަށް އަހުމަދު ވިދާޅުވި އެވެ.
"ގުޅުންހުރި އިދާރާތަކުން އެއްކުރަން ޖެހޭ އިތުރު މައުލޫމާތާ އެކީގައި މި ޔުނިޓަށް ބަދަލުކުރަން ޖެހޭ ނޫނީ ޖަލުގައި މި ބާވަތުގެ ކަންކަން ކުރާ މީހުން ދެނެގަތުމަށްޓަކާ ކުރަންޖެހޭ އެސެސްމަންޓުގެ މަސައްކަތް ނިންމާލެވޭނެ." އަހުމަދު ވިދާޅުވި އެވެ.
ހަރުކަށި ފިކުރުގެ ގައިދީންނަށް ހާއްސަ ޔުނިޓުގެ އިތުރުން ޖަލުތަކުގައި ހަރުކަށި ފިކުރު ފަތުރާ ގޮތުގެ ނުވަތަ ރެޑިކަލައިޒޭޝަން ޕްރޮސެސްގެ ދިރާސާއެއް ވެސް ހޯމް މިނިސްޓްރީގެ އިސްނެގުމުގެ މަތިން ދަނީ ކުރިޔަށެވެ.
މިއީ ޖަލުގައި ހަރުކަށި ފިކުރު ފެތުރުން ހުއްޓުވަން އެޅޭނެ ފިޔަވަޅުތައް ދެނެގަތުމުގެ ބޭނުމުގައި ކުރާ ދިރާސާއެއް ކަމަށް ޕްރިޒަންސް ކޮމިޝަނަރު އަހުމަދު ފާހަގަކުރެއްވި އެވެ.
