ތެހްރާން، އިރާން (ނޮވެމްބަރު 20) - ފާއިތުވި ހަފުތާއެއްހާ ދުވަހުގެ ތެރޭގައި އިރާނުގެ ބައެއް ހިސާބުތަކުގައި ހަމަނުޖެހުން ބޮޑުވެ ހިނގި ތަފާތު އެކި ހާދިސާތަކުގައި ހަ ފުލުހުން މަރުވެއްޖެ އެވެ.
ތަސްނީމް ނިއުސް އެޖެންސީން ރިޕޯޓުކުރި ގޮތުގައި ހުޅަނގު ދެކުނު ހުޒެސްތާން ޕްރޮވިންސްގައި ހަތިޔާރު އެޅި ވަގުންނާ ދެކޮޅަށް ހިންގި އޮޕަރޭޝަނެއްގައި ހުކުރު ދުވަހު ފުލުހުންގެ ކެޕްޓަނެއް މަރުވި އެވެ.
އޭގެ ކުރިން ބުރާސްފަތި ދުވަހު އިރާނުގެ މެދުތެރޭގައި އޮންނަ އިސްފަހާން ޕްރޮވިންސްގައި ހަތިޔާރު އެޅި ގްރޫޕަކާ ދެކޮޅަށް ހިންގި އޮޕަރޭޝަނެއްގައި ވެސް ފުލުހަކަށް އަނިޔާވެ ފަރުވާ ދެނިކޮށް މަރުވި އެވެ.
އިރުދެކުނު ބަލޮޗިސްތާން ޕްރޮވިންސްގައި ވަގަށް އެތެރެކޮށްފައިވާ ތެޔޮ އުފުލަން އުޅުނު އުޅަނދަކުން ބުދަ ދުވަހު ވަނީ ފުލުހެއްގެ ގައިގައި ޖައްސައި މަރާލާފަ އެވެ.
ބަލޮޗިސްތާން ޕްރޮވިންސް އޮންނަނީ ޕާކިސްތާނާ ގުޅޭ ބޯޑަރު ކައިރީގަ އެވެ. އެ ޕްރޮވިންސްގައި އާއްމުކޮށް ފުލުހުންނާއި ހަތިޔާރު އެޅި ގްރޫޕުތަކާ ދެމެދު ކުރިމަތިލުންތައް ހިނގަ އެވެ.
އާއްމުކޮށް ހަމަނުޖެހުން އުފެދެނީ ވަގަށް ތަކެތި އެތެރެ ކުރާ ގޭންގުތަކާއި، ހަރުކަށި ފިކުރުގެ ގްރޫޕުތަކާއި، ދައުލަތާ ވަކިވެގަނެގެން އުޅޭ ބަލުޗި މައިނޯރިޓީންނާ ހެދި އެވެ.
ދައުލަތުގެ ނިއުސް އެޖެންސީން ބުނީ ބުދަ ދުވަހު ބަލޮޗިސްތާން ޕްރޮވިންސްގައި ހިނގި ކުރިމަތިލުންތަކެއްގައި ތިން ފުލުހުން މަރުވެ، އިތުރު ހަ ފުލުހަކަށް އަނިޔާވި ކަމަށެވެ.
ގާތްގަނޑަކަށް 24 ގަޑިއިރު ވަންދެން މެދުކެނޑުމެއް ނެތި ކުރިއަށް ދިޔަ ހަމަލާ ބަދަލު ކުރުންތަކުގައި ހަތިޔާރު އެޅި ގޭންގުގެ ދެ މެމްބަރަކު މަރުވި ކަމަށް ވެ އެވެ.
