އަންކާރާ، ތުރުކީ (ނޮވެމްބަރު 20) - ކުރުދީ ހަނގުރާމަވެރިންނާ ގުޅުން އޮންނަ ކަމަށް ތުހުމަތުކޮށް، ތުރުކީގައި ބަންދުކޮށްފައި ހުރި ސީރިއާގެ މަޝްހޫރު ލަވަކިޔުންތެރިޔާ އުމަރު ސުލައިމާން ދޫކޮށްލައިފި އެވެ.
އޭނާ ދޫކޮށްލީ ހުކުރު ދުވަހުގެ ރޭ 10:30 ގަ އެވެ.
ދެހާސް އެގާރަ ވަނަ ސީރިއާގެ ދާހިލީ ހަނގުރާމަ ފެށުމުން ގައުމު ދޫކޮށް ތުރުކީ އަށް ދިރިއުޅުން ބަދަލުކުރި ސުލައިމާން އަންނަނީ ސަންލިއުރްފާގައި ބޭކެރީއެއް ހިންގަމުންނެވެ. އޭނާ ހައްޔަރު ކުރީ އެ ތަނުން މިދިޔަ ބުދަ ދުވަހު އެވެ.
ފުލުހުން އޭނާއާ ސުވާލުކުރީ ޕީޕަލްސް ޕްރޮޓެކްޝަން ޔުނިޓް (ވައިޕީޖީ) އާ ގުޅުން އޮންނަ ކަމަށް ބެލެވޭތީ އެވެ. ތުރުކީން ބުނާ ގޮތުގައި ވައިޕީޖީ އަކީ ކުރުދިސްތާން ވޯކާޒް ޕާޓީ (ޕީކޭކޭ) ގެ ސީރިއާ ގޮތްޕެވެ.
ތުރުކީ އާއި ހުޅަނގުގެ ގައުމުތަކުން ދެކޭ ގޮތުގައި ޕީކޭކޭ އަކީ ޓެރަރިސްޓު ގްރޫޕެކެވެ. އެ ގްރޫޕު ބްލެކްލިސްޓުކޮށްފައި ވާއިރު 1984 ވަނަ އަހަރުން ފެށިގެން އެ މީހުން އަންނަނީ ތުރުކީ ދައުލަތާ ދެކޮޅަށް ހަނގުރާމަ ކުރަމުންނެވެ.
"ޓެރަރިސްޓް ޕްރޮޕެގެންޑާ" ފެތުރި ކަމަށް ސުލައިމާނަށް ތުހުމަތު ކުރި ނަމަވެސް ދައުވާ އުފުލި ކަމެއް ސާފެއް ނޫނެވެ. ދޫކޮށްލުމާ އެކު އޭނާ ދިރިއުޅޭ ކަރަކޮޕްރޫ ޑިސްޓްރިކްޓަށް ދިޔުމުން މަރުހަބާ ކީ އާއިލާ އާއި ފޭނުންނެވެ.
ޑާންސް އަދި ފޯކް މިއުޒިކް އުފައްދާ ސުލައިމާން ވަނީ ބްޔޯކް އަދި ބްލާގެ ފްރަންޓްމޭން ޑޭމަން އަލްބާން ފަދަ އާޓިސްޓުންނާ އެކު މަސައްކަތްކޮށް ބައިނަލްއަގްވާމީ ގޮތުން މަގްބޫލުކަން ހޯދާފަ އެވެ.
އޭނާ 2013 ވަނަ އަހަރު ނެރުނު ލަވަ "ވަރްނީ ވަރްނީ" ގެ ރަސްމީ ވީޑިއޯ ޔޫޓިއުބުގައި 95 މިލިއަން ފަހަރު ބަލާފައި ވެ އެވެ. އިރުއުތުރު ސީރިއާ އަށް ނިސްބަތްވާ ސުލައިމާން ލަވަކިޔަނީ އަރަބި އަދި ކުރުދީ ބަހުންނެވެ.
