އެމެރިކާގެ ރައީސް ޖޯ ބައިޑެން ހެލްތު ޗެކްއަޕެއް ހައްދަވަން ހަމަޖެހިފައި ވާތީ ފުރަތަމަ ފަހަރަށް ރިޔާސީ ބާރުތައް ލިބިވަޑައިގަންނަވާ އަންހެނަކަށް ނައިބު ރައީސް ކަމަލާ ހެރިސް ވެއްޖެ އެވެ.
ހުކުރު ދުވަހު ބައިޑެންގެ ކޮލޮސްކޮޕީއެއް ޝެޑިއުލްކޮށްފައި އޮތުމުން އެ ވަގުތުކޮޅަށް އެނެސްތީޒިއާގެ އެހީގައި ހޭނައްތާނެ އެވެ. އެހެންކަމުން ރިޔާސީ ބާރުތައް އެ ވަގުތު އޮންނާނީ ނައިބު ރައީސަށެވެ.
ބައިޑެން ހެލްތު ޗެކަޕެއް ކޮންމެ އަހަރަކު ވެސް ހައްދަވަ އެވެ. މިއީ އެމަނިކުފާނު ރައީސް ކަމަށް ވަޑައިގެންނެވި ފަހުން ހައްދަވާ ފުރަތަމަ ޗެކަޕެވެ. އެކަން ދިމާވެފައި ވަނީ އެމަނިކުފާނުގެ 79 ވަނަ އުފަން ދުވަހާ އެވެ.
ރައީސްގެ ބާރުތައް ހެރިސް އަށް ލިބިވަޑައިގަންނަވާ ވަގުތުކޮޅުގައި އެމެރިކާގެ ސިފައިންނާއި ނިޔުކްލިއާ ހަތިޔާރާ ގުޅޭ ހުރިހާ ކޮމާންޑެއް ނެރުއްވުމުގެ ބާރު ވެސް ލިބިގެންވެ އެވެ.
ވައިޓް ހައުސްގެ ޕްރެސް ސެކެޓްރީ ޖެން ސާކީ ވިދާޅުވީ އެ ވަގުތުކޮޅުގައި ނައިބު ރައީސް މަސައްކަތް ކުރައްވާނީ ވެސްޓް ވިންގްގައި ހުންނަ އެކަމަނާގެ އޮފީހުން ކަމަށެވެ.
އުމުރުން 57 އަހަރުގެ ހެރިސް އަކީ އެމެރިކާގެ ނައިބު ރައީސް ކަމަށް އިންތިހާބުވެވަޑައިގެންނެވި ފުރަތަމަ އަންހެން އަދި ދެކުނު އޭޝިއާގެ ނަސްލަށް ނިސްބަތްވެވަޑައިގަންނަވާ ފުރަތަމަ ބޭފުޅާ އެވެ.
