ބާމިންހަމް (ނޮވެމްބަރު 19) - އެސްޓަން ވިލާގެ ކޯޗަކަށް ވާން ނިންމީ ލިވަޕޫލްގެ ވަޒީފާ ހޯދަން ފަސޭހައަކަށް ނޫން ކަމަށް އެސްޓަން ވިލާއާ ދާދި ފަހުން ހަވާލުވި ކޯޗު އަދި ލިވަޕޫލްގެ ކުރީގެ ކެޕްޓަން ސްޓީވެން ޖެރާޑް ބުނެފި އެވެ.
ރޭންޖާސްގެ ކޯޗުކަން ދޫކޮށްލައި އުމުރުން 41 އަހަރުގެ ޖެރާޑް ވަނީ އެސްޓަން ވިލާއާ އެކު ތިން އަހަރާއި ބައިގެ ކޮންޓްރެކްޓެއްގައި ސޮއިކޮށްފަ އެވެ. ލިވަޕޫލްގެ ކޯޗު ޔާގެން ކްލޮޕް އެ ޓީމާ އެކު ކޮންޓްރެކްޓްގައި ހުރީ 2024 ވަނަ އަހަރުގެ ޖޫންގެ ނިޔަލަށެވެ. ޖެރާޑަކީ ކްލޮޕަށް ފަހު ލިވަޕޫލާ ހަވާލުވާނެ ކޯޗުކަމަށް މީޑިއާގައި އަޑުފެތުރިފައިވެ އެވެ. އަދި ޖެރާޑް، އެސްޓަން ވިލާއާ އެކު ކޮންޓްރެކްޓް ހެދިއިރު، ލިވަޕޫލާ ފަހުން ހަވާލުވާނެ ކަމަށް މީޑިއާތަކުން ރިޕޯޓްކޮށްފައިވެ އެވެ.
ޖެރާޑް ބުނީ އޭނާ އެސްޓަން ވިލާގެ ކޯޗަކަށްވާން ލިބުނު ހުށަހެޅުން ގަބޫލުކުރަން ނިންމީ ހަމައެކަނި އެ ކްލަބަށް ކާމިޔާބު ހޯދައިދިނުމުގެ ވިސްނުމުގައި ކަމަށެވެ. އަދި މި ކަމުގައި އަމިއްލަ މަންފާއެއް އެ ކްލަބަށް ވުރެ އިސް ނުކުރާނެ ކަމަށް ޖެރާޑް ބުނެފައިވެ އެވެ.
"އަހަރެން 100 ޕަސެންޓް ޔަގީންކަން މި ދެނީ މިއީ މި ޓީމަށް (އެސްޓަން ވިލާ އަށް) ކާމިޔާބު ހޯދަން ކުރާ މަސައްކަތެއް. އަހަރެން އެސްޓަން ވިލާ އަށް އައީ ލިވަޕޫލްގެ ކޯޗަކަށްވާން ފަސޭހައަކަށޭ ބުނާ ވާހަކައަކީ ހަގީގަތެއް ނޫން. އެއީ އެސްޓަން ވިލާ އަށް ވެސް އިންސާފުވެރި ގޮތަކަށް ނުވާނެ،" ޖެރާޑް ބުންޏެވެ.
ޖެރާޑް ބުނީ އޭނާއާ ލިވަޕޫލާ ދެމެދު އަބަދުވެސް ހާއްސަ ގުޅުމެއް އޮންނާނެ ކަމަށެވެ. އަދި އެސްޓަން ވިލާއާ އެކު ކޮންޓްރެކްޓްގައި ސޮއިކުރުމާ އެކު އެންމެ ފުރަތަމަ މަރުހަބާ ކީ މީހުންގެ ތެރޭގައި ކްލޮޕް ހިމެނޭނެ ކަމަށެވެ.
ޖެރާޑް ބުނީ ލިވަޕޫލުން މި ވަގުުތު ވެސް ކްލޮޕަށް "އުމުރު ދުވަހުގެ ކޮންޓްރެކްޓެއް" ދިން ކަމުގައި ވިޔަސް އެކަމަށްޓަކައި އުފާކުރާނެ ކަމަށެވެ.
އެސްޓަން ވިލާގެ ކޯޗަކަށް ސީޒަން ފަށައިގެން ހުރި ޑީން ސްމިތަށް މަގާމު ގެއްލުނީ ލީގުގައި ޖެހިޖެހިގެން ފަސް މެޗުން ބަލިވުމުންނެވެ. ޖެރާޑްގެ ކޯޗުކަމުގައި އެސްޓަން ވިލާ ކުޅޭ ފުރަތަމަ މެޗުގައި މާދަމާރޭ އަމިއްލަ ދަނޑުގައި ނުކުންނާނީ ބްރައިޓަންއާ ދެކޮޅަށެެވެ.
ރޭންޖާސް އަށް މިދިޔަ ސީޒަނުގައި ސްކޮޓްލެންޑުގެ ޗެމްޕިއަންކަން ހޯދައިދިން ޖެރާޑް ބުނީ އެސްޓަން ވިލާގައި ހުރެ ރަނގަޅު މަސައްކަތްތަކެއް ކުރަން ބޭނުންވާ ކަމަށެވެ. އަދި އެކަން ފަށަން އެންމެ ރަނގަޅު ގޮތަކީ ވީ އެންމެ އަވަހަށް އެ ކްލަބަށް ކުރިމަތިވެފައިވާ ބަލިވުމުގެ ސިލްސިލާ އަށް ނިމުމެއް ގެނެސްގެން ކަމަށް ޖެރާޑް ބުނެފައިވެ އެވެ.
