ދިރިއުޅުމުގެ ބޭނުމަށް ދިވެހިރާއްޖޭގައި ގެދޮރު ކުއްޔަށް ދިނުމާ ގުޅޭ ގާނޫނު މިއަދު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ތަސްދީގު ކުރައްވައިފި އެވެ.
"ދިރިއުޅުމަށްޓަކައި ގޯތިގެދޮރު ކުއްޔަށްދިނުމާބެހޭ ގާނޫނު" ތަސްދީގު ކުރުމާއެކު ދިވެހިރާއްޖޭގައި ކުއްޔަށްދޭ ހުރިހާ ތަންތަނުގައި އެންމެ ދަށްވެގެން ހުންނަންޖެހޭ މިންގަނޑުތަކެއް ކަނޑައެޅުނީ އެވެ. އަދި މި ގާނޫނުގެ ދަށުން ކުއްޔަށް ދޭ ހުރިހާ ތަނެއްގެ ދަފްތަރެއް ވެސް އެކުލަވާލަންޖެހެ އެވެ.
ގާނޫނުގައި ބުނެފައިވާ ގޮތުން ކުއްޔަށް ދޫ ކުރާ ތަނަކީ އިމާރާތް ކުރުމާ ބެހޭ ގާނޫނާ އެއްގޮތަށް ހަދާފައި ހުރި ތަނަކަށްވާންޖެހެ އެވެ. އަދި އެ ތަނެއްގައި ފެނާއި ނަރުދަމާ ހުރުމުގެ އިތުރުން ފަސޭހަކަމާއެކު ވަދެ ނިކުމެވޭ ގޮތެއް ހުންނަންޖެހެ އެވެ.
އެ ގާނޫނު ތަސްދީގުވުމުން، ކުއްޔަށް ދޭ ތަންތަނުގައި ހުންނަންޖެހޭ އަސާސީ އެންމެހޭ ސިފަތައް ބަޔާންކޮށް ސަރުކާރުން ގަވާއިދެއް އެކުލަވާލަންޖެހެ އެވެ.
ގެދޮރު ކުއްޔަށް ދިނުމާ ބެހޭ ގާނޫނުގައިވާ ގޮތުން ކޮންމެ ރަށެއްގައި ވެސް ކުއްޔަށް ދޭ ތަންތަނުގެ ދަފްތަރު ކަނޑައަޅަންޖެހެނީ އެ ރަށެއްގެ ކައުންސިލުންނެވެ. އަދި މުޅި ރާއްޖޭގެ ދަފްތަރެއް ހޯމް މިނިސްޓްރީން ގެންގުޅެންޖެހެ އެވެ.
އެ ގާނޫނާއެކު ގެދޮރު ކުއްޔަށް ހިފާ ފަރާތްތަކާއި ކުއްޔަށް ދޭ ފަރާތްތައް ވެސް އަމަލު ކުރަންޖެހޭ ގޮތްތަކެއް ބަޔާންވެ، ދެ ފަރާތަށް ލިބިފައިވާ ހައްގުތައް ވެސް ސާފުކޮށް ބަޔާންވީ އެވެ. އެގޮތުން ސެކިއުރިޓީ ޑިޕޮސިޓްގެ ގޮތުގައި ގިނަވެގެން ނެގޭނީ ދެ މަސް ދުވަހުގެ ކުލީގެ ފައިސާކަން ގާނޫނުން ވަނީ ކަނޑައަޅައިފަ އެވެ.
އޭގެ އިތުރުން، ކުއްޔަށް ދޭ ތަނުގެ ކުޑަބޮޑުމިނަށް ބެލުމަށްފަހު އެތަނެއްގައި އެންމެ ގިނައިން އުޅެވޭނެ މީހުންގެ އަދަދު ކަނޑައަޅަންޖެހެ އެވެ. އަދި ސަބް ލީޒްއަށް ތިން ވަނަ ފަރާތަކަށް ކުއްޔަށް ދޭ ނަމަ އެކަން ކުރެވޭނީ ކުއްޔަށް ދޭ ފަރާތުގެ އިއުތިރާޒެއް ނެތްކަމުގެ ލިޔުމެއް އޮވެގެން ކަމަށް ވެސް ގާނޫނުގައި ބަޔާންކޮށްފައިވެ އެވެ.
ގެދޮރު ކުއްޔަށް ދިނުމާ ބެހޭ ގާނޫނު ރައްޔިތުންގެ މަޖިލީހުން ފާސްކޮށްފައި ވަނީ މިދިޔަ އޮކްޓޯބަރު މަހުގެ ތެރޭގަ އެވެ.
