ރައީސް އިބްރާހިމް މުހައްމަދު ސޯލިހުގެ ސަރުކާރަށް ތިން އަހަރު ފުރުން މިއަދު ފާހަގަ ކުރާއިރު، ރާއްޖޭގެ ހާލަތު އޮތީ ވަރަށް ދެރަވަރުގައި ކަމަށް އިދިކޮޅު ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެ އެވެ.
މެމްބަރު ޝިޔާމް ވިދާޅުވި ގޮތުގައި ރައީސް ސޯލިހުގެ ސަރުކާރުގައި ރާއްޖޭގެ ހާލަތު ދެރަވެފައިވާ މިންވަރު، މިއަދު އޮތް މާލިއްޔަތު ކޮމިޓީގެ ބައްދަލުވުމުން އެކަނި ވެސް އެނގޭ ކަމަށެވެ. އޭނާ އިޝާރާތް އެ ކުރެއްވީ، ދައުލަތުގެ ކޭޝްފްލޯ މެނޭޖްކުރުމަށްޓަކައި ސަރުކާރަށް، މަރުކަޒީ ބޭންކް އެމްއެމްއޭ އިން ދަރަނި ނެގޭ ގޮތަށް މަޖިލީހުން ދީފައިވާ ހުއްދަ އަނެއްކާވެސް އިތުރުކުރަން ހުށަހަޅައި ކޮމިޓީން ފާސްކޮށްފައިވާތީ އެކަމަށެވެ.
"އެއީ މިއަދު އެ ބައްދަލުވުމުގައި ވެސް އެ ވިދާޅުވީ ފައިސާ ޗާޕުކުރަން ހުއްދަދޭން އިތުރުކުރަން. ވަރަށް ކުރުކޮށް މި ކިޔައިދިނީ ހަމަ. މި ދެރަވަރޭ ބުނާ ސަބަބު،" އެކަމުގެ ކަންބޮޑުވުން ފާޅުކުރެއްވުމުގެ ގޮތުން މެމްބަރު ޝިޔާމް ވިދާޅުވި އެވެ.
ރައީސް ސޯލިހުގެ ސަރުކާރުން ވެރިކަމަށް ވަޑައިގަތްއިރު، ވެވަޑައިގަތް ވައުދުތަކުގެ ތެރެއިން އިންސާފު ހޯދައިދޭނެ ކަމަށްވި ވައުދާއި އިގުތިސޯދީ އަދި އިޖުތިމާއީ ވައުދުތައް ވެސް ފުރިހަމައަށް ނުފުއްދާ ކަމަށް ޝިޔާމް ވިދާޅުވި އެވެ.
"އިންސާފު ގާއިމުކުރުމުގެ ވައުދު އެއީ އެންމެ މުހިންމު އެއް ވައުދު ވެރިކަމަށް ވަޑައިގަތް އިރު، އެކަން ވެސް ނުވާތަން މި ފެންނަނީ،" އޭނާ ވިދާޅުވި އެވެ.
ނަމަވެސް، އެމްޑީޕީގެ ލެޖިސްލޭޓިވް އެޖެންޑާގެ 99 އިންސައްތަ ފުރިހަމަވެފައިވާ ކަމަށް އެ ޕާޓީން ބުނެފައިވާ ވާހަކަ ފާހަގަ ކުރައްވައި ޝިޔާމް ވިދާޅުވީ "އެއީ ހަގީގަތެއް ނޫން" ކަމަށެވެ.
ޖޭއެސްސީ މިހާރު އެކުލެވިފައިވާ ގޮތުން ބަދަލުކުރުމަކީ އެމްޑީޕީން ވަކާލާތުކުރި ކަމެއް ކަމަށާއި ނަމަވެސް އެކަން ވެސް ވެފައި ނެތް ކަމަށް ޝިޔާމް ފާހަގަކުރެއްވެވި އެވެ.
ޖޭއެސްސީ އެކުލެވިގެންވާ ގޮތް ބަދަލުނުކުރެވިގެން އުޅެނީ ހެޔޮ ނިޔަތެއް ނެތުމުން ކަމަށް ވެސް ޝިޔާމް ފާހަގަކުރެއްވެވި އެވެ.
