ބެލްފާސްޓް (ނޮވެމްބަރު 16) - ވޯލްޑް ކަޕަށް އިޓަލީ ކޮލިފައިވާނެކަމުގެ ޔަގީންކަން އެބައޮތް ކަމަށް އިޓަލީގެ ކޯޗު ރޮބާޓޯ މަންޗީނީ ބުނެފި އެވެ.
ޔޫރޯގެ އެންމެ ފަހުގެ ޗެމްޕިއަން އިޓަލީ އަށް 2022 ވަނަ އަހަރު ވޯލްޑް ކަޕްގެ އޮޓަމެޓިކް ޖާގައެއް ގެއްލުނީ ކޮލިފައިންގައި ރޭ ނޮދަން އަޔަލޭންޑާ ދެކޮޅަށް ކުޅުނު މެޗު ލަނޑެއް ނުޖެހި އެއްވަރުވުމުންނެވެ.
ރޭގެ މި މެޗަށް ކުރިމަތިލިއިރު، ލަނޑުގެ ތަފާތުން ގުރޫޕް ސީގެ އެއްވަނައިގައި އޮތީ އިޓަލީ އެވެ. އެކަމަކު، އިޓަލީ ރޭ މޮޅުވުނުވުމުން، ގުރޫޕް ސީގެ އެއްވަނަ މަގާމު ހޯދައި، ވޯލްޑް ކަޕަށް ކޮލިފައިވީ ސްވިޓްޒަލޭންޑެވެ. ސްވިޓްޒަލޭންޑް ވަނީ ކޮލިފައިންގައި ރޭ ބަލްގޭރިއާ އަތުން 4-0 އިން މޮޅުވެފަ އެވެ.
އެހެންކަމުން، ވޯލްޑް ކަޕްގެ ޖާގައެއް ހޯދުމަށް އިޓަލީ އަށް ވަނީ ޕްލޭއޮފްގައި ވާދަކުރަންޖެހިފަ އެވެ. ރަޝިއާގައި 2018 ވަނަ އަހަރު އޮތް ވޯލްޑް ކަޕަށް ކޮލިފައިވުމަށް ވެސް އިޓަލީ ޕްލޭއޮފް ކުޅުނެވެ. އެކަމަކު ޕްލޭއޮފްގައި އިޓަލީ ވަނީ ސްވިޑަން އަތުން ބަލިވެފަ އެވެ.
އެކަމަކު ޔޫރޯގެ ޗެމްޕިއަންކަން އިޓަލީ އަށް ހޯދައިދިން ކޯޗު މަންޗީނީ ބުނީ ޕްލޭއޮފްގައި ވާދަކުރަން ޖެހުނަސް، އެއްވެސް ބިރުވެރިކަމެއް ނެތް ކަމަށާއި އިޓަލީ ވޯލްޑް ކަޕަށް ކޮލިފައިވާނެ ކަމުގެ ޔަގީންކަން އެބައޮތް ކަމަށެވެ.
"މާޗު މަހު އަހަރެމެން ވޯލްޑް ކަޕަށް ކޮލިފައިވާނެ ކަމުގެ ޔަގީންކަން އެބައޮތް. ކޮލިފައިވެ، އަހަރަމެން އެ މުބާރާތް ކާމިޔާބު ވެސް ކޮށްފާނެ. އަހަންނަށް އިތުބާރު އެބައޮތް،" މަންޗީނީ ބުންޏެވެ.
"މެޗުތައް ކޮންޓުރޯލް ކުރެވުނަސް، އަހަރަމެންނަށް އެބަ ދިމާވޭ ލަނޑު ނުޖެހުމުގެ މައްސަލަ. ލިބޭ ފުރުސަތުތަކުގެ ބޭނުން ރަނގަޅަށް ހިފަންޖެހޭ."
މަންޗީނީ ބުނީ ކޮލިފައިންގައި ދިމާވި މައްސަލަތައް ރަނގަޅުކޮށް، ޕްލޭއޮފަށް އިޓަލީ ކުރިމަތިލާނީ ވަރުގަދަކޮށް ކަމަށެވެ. އަދި ޕްލޭއޮފްގައި ރަނގަޅު ނަތީޖާއެއް އިޓަލީ ނެރޭނެކަމުގެ އިތުބާރު އެބައޮތް ކަމަށެވެ. -- ބީބީސީ
