ޖޮހަނެސްބާގް، ދެކުނު އެފްރިކާ (ނޮވެމްބަރު 15) - އިޒްރޭލުގައި އޮންނަ ރީތީގެ މުބާރާތް "މިސް ޔުނިވާސް" ގައި ބައިވެރިވާން ދެކުނު އެފްރިކާގެ ރީތީގެ ރާނީ ނިންމުމުން އެ ގައުމުގެ ސަރުކާރުން ނުރުހުން ފާޅުކޮށްފި އެވެ.
އިޒްރޭލުން ފަލަސްތީނު ރައްޔިތުންގެ ހައްގުތަކަށް އަރައިގަންނަމުން ދާތީ މުބާރާތް ބޮއިކޮޓް ކުރަން އެކި ފަރާތްތަކުން ދިޔައީ "މިސް ސައުތު އެފްރިކާ" އަށް ޕްރެޝަރު ކުރަމުންނެވެ. ނަމަވެސް އެ ގައުމުގެ ރީތީގެ ރާނީ މުބާރާތް އިންތިޒާމްކުރާ ފަރާތުން ބުނީ ލަލޭ މުސްވާނޭ "މިސް ޔުނިވާސް" ގައި ބައިވެރިވުން މުހިއްމު ކަމަށެވެ.
"މިސް ސައުތު އެފްރިކާ މުބާރާތް އިންތިޒާމްކުރާ ފަރާތުގެ ވިސްނުން ބަދަލު ކުރެވޭ ގޮތެއް ނުވި،" ދެކުނު އެފްރިކާގެ އާޓްސް އެންޑް ކަލްޗާ މިނިސްޓްރީގެ ބަޔާނެއްގައި ބުންޏެވެ.
އެހެން ކަމުން ސަރުކާރުން "މިސް ސައުތު އެފްރިކާ" މުބާރާތަށް ކުރާ ތާއީދު އަނބުރާ ގެންގޮސްފައިވާ ކަމަށް ބަޔާނުގައިވެ އެވެ.
"މިސް ޔުނިވާސް" މުބާރާތް ބާއްވަން ހަމަޖެހިފައި ވަނީ ޑިސެމްބަރު 12 ވަނަ ދުވަހު އިޒްރޭލުގެ ރެޑް ސީ ރިސޯޓް އަވަށެއް ކަމަށްވާ އެއިލަތުގަ އެވެ.
"އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގާ ޖަރީމާތައް އެ ހުރީ ސާފުކޮށް ފެންނަން. ދެކުނު އެފްރިކާ ރައްޔިތުން ތަމްސީލް ކުރާ ގާނޫނީ މަންދޫބުގެ ހައިސިއްޔަތުން، އިޒްރޭލާ ގުޅުން ހުރި އެއްވެސް ކަމެއްގައި ސަރުކާރަށް ބައިވެރިވެވޭކަށް އަދި ތާއީދުކުރެވޭކަށް ނެތް،" ބަޔާނުގައި ވެ އެވެ.
ދެކުނު އެފްރިކާ އިން ދެކޭ ގޮތުގައި ފަލަސްތީނުގެ ވަކި ދައުލަތެއް އޮންނަން ޖެހެ އެވެ. އަދި އިޒްރޭލުން އުޅެނީ ފަލަސްތީނުގެ ބިން ވެރިކޮށްގެންނެވެ. ދެކުނު އެފްރިކާ އިން 1995 ގައި ފަލަސްތީނާ އެކު ގުޅުން ގާއިމްކުރި އެވެ.
އޭގެ ފަހުން އިޒްރޭލުގައި ހުންނަ އެމްބަސީ ޑައުންގްރޭޑުކޮށް، 2019 ވަނަ އަހަރު ސަފީރު އަނބުރާ ގައުމަށް ގެންދިޔަ އެވެ.
