ގުދުސް (ނޮވެމްބަރު 15) - ހަނގުރާމަ އާއި ހަމަނުޖެހުމުގެ ސަބަބުން ހާލުގައި އުޅެމުންދާ އިތިއޯޕިއާގެ ޔަހޫދީން ސަލާމަތް ކުރަން އިޒްރޭލުގެ ސަރުކާރަށް ގޮވާލައި ގުދުސްގައި މުޒާހަރާކޮށްފި އެވެ.
މުޒާހަރާގެ ބައިވެރިން ގޮވަމުން ދިޔައީ އިތިއޯޕިއާގެ ޔަހޫދީންނަށް އިޒްރޭލަށް ހިޖުރަކުރުމުގެ ފުރުސަތު ދިނުމަށެވެ. މުޒާހަރާ އޮތީ ބޮޑު ވަޒީރު ނަފްތާލީ ބެނެޓްގެ އޮފީސް ކުރިމަތީގަ އެވެ.
އިތިއޯޕިއާގެ ޓިގްރޭ ހަނގުރާމަވެރިންނާއި ސަރުކާރުގެ ފައުޖާ ދެމެދު ހަނގުރާމަ ކުރާތާ އަހަރެއް ވެއްޖެ އެވެ. އޭގެ ސަބަބުން އެތައް ހާސް ބަޔަކު ވަނީ ހާލުގައި ޖެހިފަ އެވެ.
މުޒާހަރާގައި ބައިވެރިވި މީހުންގެ ތެރޭގައި އިތިއޯޕިއާ އަށް އުފަން އިޒްރޭލުގެ އިންޓެގްރޭޝަން މިނިސްޓަރު ޕްނީނާ ޓަމާނޯ ޝާތާ ވެސް ހިމެނިވަޑައިގަންނަވަ އެވެ.
ބައެއް ރިޕޯޓުތައް ބުނާ ގޮތުގައި އިންޓީރިއާ މިނިސްޓްރީ އާއި އިމިގްރޭޝަން މިނިސްޓްރީން ވަނީ އިތިއޯޕިއާގެ 5000 މީހުން އިޒްރޭލަށް ގެނައުމަށް ނިންމާފަ އެވެ.
އިޒްރޭލުގައި ދިރިއުޅޭ އިތިއޯޕިއާގެ ޔަހޫދީންގެ ކޮމިއުނިޓީގެ ނަމަކީ ފަލާޝާޒް އެވެ. އެ ކޮމިއުނިޓީ އަށް ނިސްބަތްވާ 140،000 މީހުން އިޒްރޭލުގައި ދިރިއުޅެ އެވެ.
އެ މީހުންނާ މެދު ތަފާތުކުރުން ގެންގުޅޭ ކަމަށާއި ސަރުކާރުން އެކަށީގެންވާ އެހީ އާއި އެއްބާރުލުން ނުދޭ ކަމުގެ ޝަކުވާތައް އޮވެ އެވެ.
ފަލާޝާޒް ދެކޭ ގޮތުގައި "އާލިޔާ" ނުވަތަ އިޒްރޭލަށް އެނބުރި ދިޔުމުގެ ހައްގު އެ މީހުންނަށް ލިބެ އެވެ. "އާލިޔާ" އަކީ ދުނިޔޭގެ ކޮންމެ ތަނެއްގައި އުޅޭ ޔަހޫދީއަކު ވެސް އިޒްރޭލުގައި ވަޒަންވެރިވެ، ރައްޔިތުކަން ލިބޭނެކަން ކަށަވަރުވާ ގާނޫނެކެވެ.
ނަމަވެސް އިޒްރޭލުގެ އިދާރާތަކުން ވަނީ އިތިއޯޕިއާގެ މީހުން ޔަހޫދީންގެ ގޮތުގައި ބަލައިގަތުމަށް ފަސްޖެހިފަ އެވެ. އެކަން ރަސްމީކޮށް އިއުލާނު ކުރީ 1984 ގަ އެވެ.
އޭގެ ފަހުން 1991 ގައި 80،000 އިތިއޯޕިއާ މީހުން އިޒްރޭލަށް ގެންދިޔަ އެވެ. އޭގެ ތެރެއިން ގިނަ މީހުން މިހާރު ދިރިއުޅެމުން ދަނީ އިޒްރޭލުން ވެރިވެގަނެގެން އުޅޭ ފަލަސްތީނުގެ ހުޅަނގު އައްސޭރީގަ އެވެ.
