މަރާލާފައި އޮއްވާ ފެނުނު ޔާމީން ރަޝީދުގެ މައްސަލަ ހިމެނޭހެން، ޝަރީއަތް ކުރިއަށްދާ ބައެއް މައްސަލަތަކުގައި ހިމެނޭ ސިއްރު ހެކިންގެ މައުލޫމާތު އާންމުވާ މައްސަލަ ބަލަން ފުލުހުންނަށް ދަންނަވާފައިވާނޭކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ޝަމީމް ވިދާޅުވީ ޔާމީން ރަޝީދުގެ މަރުގެ މައްސަލަ ފަދަ ދެ ތިން މައްސަލަތައެއްގައި ސިއްރު ހެކިންގެ ހެކި ބަސް އާއްމުވާކަމުގެ މައުލޫމާތުތަކެއް ލިބިފައިވާކަމަށެވެ.
"ހަމައެކަނި އެ މައްސަލައެއްނޫން، ބައެއް އެހެން މައްސަލަތަކުގައި ވެސް ސިއްރު ހެކިންގެ މައުލޫމާތު ލީކުވާކަމަށް ނުވަތަ އާންމުންގެ ތެރެއަށް ނުކުމެގެންދާކަމަށް އަޅުގަނޑަށް މައުލޫމާތު ލިބޭ،" ޝަމީމް ވިދާޅުވި އެވެ.
ޝަމީމް ވިދާޅުވީ އެފަދަ މައުލޫމާތުތަކެއް ލިބިފައިވާތީ، އެކަންކަން ބެލުމަށް އަދި ވީ ގޮތެއް ސާފުކޮށްދިނުމަށް ފުލުހުންނަށް ދަންނަވާފައިވާނޭ ކަމަށެެވެ.
"އެހެންވީމަ ފުލުހުން އެބައި ކުރިޔަށް ގެންގޮސްދެއްވާނެ،" ޕީޖީ ޝަމީމް ވިދާޅުވި އެވެ.
ޔާމީން ރަޝީދުގެ މަރުގެ މައްސަލައިގައި ހިމެނޭ ދެ ހެކިވެރިއެއްގެ މައުލޫމާތު ލީކުވެފައިވާކަމަށް ބުނެ މީގެ ދުވަސްކޮޅެއް ކުރިން ވަނީ ސޯޝަލް މީޑިއާގައި ޕޯސްޓްތަކެއް ދައުރުވެފަ އެވެ.
އެ މައްސަލައާ ގުޅިގެން އޭރު މި ނޫހުން ޝަމީމަށް ގުޅުމުން އެފަދަ މައުލޫމާތެއް ލިބިފައި ނުވާކަމަށް ވިދާޅުވި އެވެ. އަދި ފުލުހުން ވެސް ވަނީ އެ މައްސަލައިގެ ގޮތުން ވަކި އެއްޗެއް ބުނުމަށް އިންކާރުކޮށްފަ އެވެ.
އެހެން ނަމަވެސް އެފަދަ ކަމެއް ހިނގާފައިވާނަމަ، އެކަމަކަށް އަޅަން ޖެހޭ ފިޔަވަޅެއް ފުލުހުން އަޅާނޭކަމަށް އޭރު ފުލުހުން ވަނީ ބުނެފަ އެވެ. މައްސަލަ ކުރިޔަށް ގެންދާ ކްރިމިނަލް ކޯޓަށް ގުޅުމުން ކޯޓުން އޭރު ބުނީ އެފަދަ މައުލޫމާތުތަކެއް ލީކުވެގެން އުޅޭ ކަމެއް އަދި އެނގިފައި ނުވާ ކަމަށެވެ.
ޔާމީން ރަޝީދުގެ މައްސަލައިގަ ސިއްރު ދެ ހެކިވެރިއެއްގެ ޒާތީ މައުލޫމާތު އަދި އެ ފަރާތްތައް ޝަރީއަތުގެ ތެރެއިން ދައްކާފައިވާ ބައެއް ވާހަކަތައް ވެސް ހިމެނޭ އެ ޕޯސްޓްތަކަކީ، ކިހާ ވަރެއްގެ ހަގީގަތެއް ހުރި އެއްޗެއް ކަމެއް އަދިވެސް ކަށަވަރުވެފައެއް ނުވެ އެވެ.
އެހެން ނަމަވެސް، މަރުގެ މައްސަލައެއްގައި ހިމެނޭ ކަމަށް ބުނާ އެ ދެ ހެކިވެރިންގެ މައުލޫމާތު ހަގީގަތުގައި ވެސް ލީކުވެފައިވާނަމަ އެ ފަރާތްތަކުގެ ފުރާނަ ނުރައްކަލަށް ވެއްޓުމުގެ ފުރުސަތު އޮންނާނެ އެވެ. އަދި ހެކިން ހެކި ބަސް ދިނުމަށް ފަސްޖެހޭނެކަން ވެސް ސާފެވެ.
އާންމުކޮށް އެފަދަ މައްސަލަތަކުގައި ހެކިވެރިންނަށް ފުލުހުން ހިމާޔަތްދޭކަން އެއީ އެނގިފައިވާ ކަމެކެވެ. ޔާމީން ރަޝީދު މަރާލާފައި އޮއްވާ ފެނުނީ 2017 ވަނަ އަހަރުގެ އޭޕްރިލް މަހުގެ އޭނާ ދިރިއުޅޭ ގޭގެ ސިޑިގޮޅި ތެރެއިންނެވެ.
އެ މައްސަލައިގައި ދައުވާކޮށްފައިވަނީ:
އިސްމާއިލް ހައިޝަމް ރަޝީދު، ހ. އަންނާރުމާގެ،
- އަހުމަދު ޒިހާން އިސްމާއިލް، މ. އިރަސްމިކުގޭ،
- މުހައްމަދު ދިފްރާނު، ގދ. ގައްދޫ, ސިންދުބާދުގޭ،
- ހަސަން ޝިފާޒް، މ. ކުދެހިގެ،
- އިސްމާއިލް ރަޝީދު، މ. ތާއިފް،
- ހުސައިން ޒިޔާދު، މ. ކޮޅުފުށީ, އީސްޓް.
އެ މައްސަލައިގައި މި މަސް ތެރޭ ޝަރީއަތުގެ ހުލާސާ ބަޔާން ދެ ފަރާތުން އިއްވާނެ އެވެ. އޭގެ ފަހުން ދެން އޮންނާނީ ހުކުމް އިއްވުމުގެ މަޖިލީހެވެ.
