ރާއްޖޭގެ ހައިޑްރޯގްރަފީ ސާވޭ ނުވަތަ ކަނޑުގެ އަޑި ޗާޓު ކޮށްގެން، އިންޑިއާއަށް އެ ޗާޓުތައް ބޭރުގެ ފަރާތްތަކަށް ވިއްކުމުގެ ހުއްދަ ލިބޭކަމަށް އެމްއެންޑީއެފުން ބުނެފި އެވެ.
ގައުމީ ސަލާމަތަށް ނުރައްކާވާ ކަންކަން ނެތްކަން ކަށަވަރުކުރުމުގެ ގޮތުން އިންޑިއާއާއެކު ސޮއިކޮށްފައިވާ އަސްކަރީ ގުޅުމުގެ އެއްބަސްވުންތަކުގެ ތަފްސީލް ހޯދުމުގެ މަސައްކަތް މަޖިލީހުގެ ސަލާމަތީ ހިދުމަތްތަކުގެ (241) ކޮމިޓީން ދަނީ ކުރަމުންނެވެ.
އެގޮތުން، އިއްޔެ ބޭއްވި ކޮމިޓީގެ ބައްދަލުވުމުގައި ހައިޑްރޮގްރޮފީ އަދި ޑޯނިއާ މަތިންދާބޯޓުގެ އެއްބަސްވުންތަކުގެ ތަފްސީލް ޑިފެންސް މިނިސްޓްރީ އާއި އެމްއެންޑީއެފް ގުޅިގެން ވަނީ ހިއްސާކޮށްފަ އެވެ.
އެމްއެންޑީއެފްގެ ޕްލޭންސް، ޕޮލިސީ އެންޑް ރިސޯސް މެނޭޖްމަންޓްގެ ޕްރިސިޕަލް ޑިރެކްޓަރު، ލެފްޓިނެންޓް ކާނަލް ހަސަން އާމިރު ވިދާޅުވީ ރާއްޖޭން ސޮއިކޮށްފައިވާ ބައިނަލްއަގުވާމީ މުއާހަދާތަކާއި އިންޓަނޭޝަނަލް މެރިޓައިމް ލޯގެ ދަށުން އަދާހަމަކޮށްފައިވާ ޗާޓުތައް ހެދުން ރާއްޖޭގެ މައްޗަށް ލާޒިމުވާ ކަމަށެވެ.
އެގޮތުން، އެފަދަ ސާވޭ ހެދުމަށް އިންޑިއާ ސަރުކާރުގެ އެހީއަށް އެދުނީ ކުރީގެ ސަރުކާރުގައި 2015 ވަނަ އަހަރުގެ ތެރޭގައި ކަމަށެވެ.
އެގޮތުން، އެކަމުގެ އެންމެ މުހިންމު މަސައްކަތެއް ކުރެވުނީ 2016 ވަނަ އަހަރު ކުރީގެ ރައީސް އަބްދުﷲ ޔާމީން އަބްދުލްގައްޔޫމް އިންޑިއާއަށް ކުރެއްވި ރަސްމީ ދަތުރުފުޅުގައި ދެ ގައުމުގެ ދެމެދުގައި ސޮއިކުރެވުނު ޑިފެންސް އެކްޝަން ޕްލޭންގައި އެ ސާވޭ ހިމަނައިގެން ކަމަށް އާމިރު ވިދާޅުވި އެވެ.
އިންޑިއާއެކު އަސްކަރީ ގޮތުން ސޮއިކޮށްފައިވާ އެއްބަސްވުންތަކާ ގުޅިގެން މިހާރުގެ އިދިކޮޅުން ފާޅުކުރަމުންދާ ކަންބޮޑުވުންތަކަށް ނުސީދާކޮށް ރައްދު ދެއްވަމުން އާމިރު ވިދާޅުވީ ސުނާމީ ފަދަ ގުދުރަތީ ކާރިސާތަކާ ގުޅިގެން ކަނޑުގެ އަޑިއަށް އަންނަ ބަދަލުތައް ދެނެގަތުމުގެ މުހިންމުކަން އޭރުން ފެށިގެން ފާހަގަކުރެވިފައިވާ ކަމަށެވެ.
"މިހާރު ހުރި ޗާޓުތަކަކީ ނެވިގޭޝަނަށް ޓްރަސްޓަޑް އެއިޑެއް ނޫން. އެއީ އަދި އަޕްޑޭޓް ނުކޮށް ތިބެވޭނެ ކަމެއް ނޫން،" އާމިރު ވިދާޅުވި އެވެ.
ރާއްޖެއަށް ކުޑަ ޕަސަންޓެއް ދީގެން ޗާޓުތައް ވިއްކޭ
އެމްއެންޑީއެފުން ރޭ ހިއްސާކުރި މައުލޫމާތައް ބަލާއިރު، ހައިޑްރޯގްރަފީ އެއްބަސްވުމުގެ ދަށުން، އެ ސާވޭ ކުރުމަށް އެހީވެދީގެން، އެއްކުރެވޭ ޑޭޓާތަކުގެ މައްޗަށް ބިނާކޮށް ހެދޭ ޗާޓުތައް ބޭރުގެ ފަރާތްތަކުގެ ވިއްކުމުގެ ހުއްދަ އިންޑިއާއަށް ލިބެ އެވެ.
އެގޮތުން، އިންޑިއާއިން ވިއްކާ ޗާޓެއްގެ އަގުގެ 35 ޕަސަންޓުގެ އިތުރުން ރޯޔަލްޓީގެ ގޮތުގައި 25 ޕަސަންޓް ރާއްޖެއަށް ދައްކަންޖެހޭކަމަށް އެއްބަސްވުމުގައި ވަނީ ހިމަނައިފަ އެވެ.
އެކަމާ ގުޅިގެން ރޭގެ ބައްދަލުވުމުގައި ބައިވެރިވެވަޑައިގެންނެވި ބައެއް މެމްބަރުން ވަނީ ކަންބޮޑުވުންފާޅު ކުރައްވައިފަ އެވެ.
"އެ މަސައްކަތުން ދިވެހި ދައުލަތަށް ފައިސާ ލިބޭ ވާހަކަ އެމްއެންޑީއެފްގެ ޕްރެޒެންޓޭޝަންގައި ފާހަގަ ކުރުމުން އަޅުގަނޑަށް އުނދަގޫވޭ. އެއީ ކީއްވެގެން ކުރާ ކަމެއްތޯ؟ ސްޓްރެޓެޖިކް މައުލޫމާތުތައް ވިއްކައިގެން ދައުލަތަށް އާމްދަނީ ހޯދުމުގެ ސިޔާސަތެއް މިހާރު ބައްޓަން ކުރެއްވީތޯ،" ގުރައިދޫ ދާއިރާގެ އިދިކޮޅު މެމްބަރު ޣައްސާން މައުމޫން ސުވާލު ކުރެއްވި އެވެ.
ނަމަވެސް، އެކަމާ ގުޅިގެން އެމްއެންޑީފުން ސީދާ ޖަވާބެއް ދީފައެއް ނުވެ އެވެ.
ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ވިދާޅުވީ މި ސާވޭއަކީ ނެވިގޭޝަނަލް ކަންކަމަށް ބޭނުންވާ މައުލޫމާތު ފޯރުކޮށްދޭން ހަދާ ސާވޭއެއް ކަމަށެވެ.
އަދި އެ ސާވޭ ކުރެވޭނީ ރާއްޖޭން އިސްކަންދޭ ސަރަހައްދުތަކެއް ކަމަށާއި، އެކަންކަން ލިމިޓުކުރުމުގެ ފުރުސަތު ވެސް ރާއްޖެއަށް ލިބޭކަމަށް ޝަމާލް ވިދާޅުވި އެވެ.
