ހުޅުމާލޭގައި އަލަށް އާބާދުވަމުން އަންނަ ދެ ވަނަ ފިޔަވަހީގައި ހުންނަ ހިޔާ ފްލެޓް ސަރަހައްދުގައި ހުރި ކުނިގޮނޑެއްގައި ރޯވި އަލިފާންގަނޑު އެމްއެންޑީއެފްގެ ފަޔާ އެންޑް ރެސްކިއު އިން ނިއްވާލައިފި އެވެ.
އެތަނުގައި ބަޔަކު ގަސްދުގައި ރޯކޮށްލީ ކަމެއް ނުވަތަ ރޯވީ ކަމެއް ނޭގެ އެވެ. ފަޔާ އެންޑް ރެސްކިއު އެތަނަށް ދިއުމުގެ ކުރިން ހިޔާ ފްލެޓުގައި ދިރިއުޅޭ ބައެއް އާއްމުން ދިޔައީ ފެން ހޮޅިތައް ނެރެ ފެން ޖަހަމުންނެވެ. އެކަމަކު ފަޔާ އެންޑް ރެސްކިއު އިން އައުމާ ހަމަޔަށް އަލިފާންގަނޑު ދިޔައީ ފެތުރެމުންނެވެ. އެހެންވިޔަސް، އެ ކުނިގޮނޑު ހުރީ އިމާރާތްތަކާ ވަކިން ކަމަށްވާތީ، އިމާރާތަކަށް ގެއްލުމެއް ނުވާނެ އެވެ.
އެ ކުނިތަކުގެ ތެރޭގައި ހުރީ ކަރުދާސް ފޮށިގަނޑުތަކާއި ބާ ފަރުނީޗަރުތަކާއި ގަލާއި ޕްލާސްޓިކާއި ފުޅި ފަދަ ތަކެއްޗެވެ. އަލިފާންގަނޑުގެ ތެރެއިން ފުޅި އެއްޗެހި ގޮވާ އަޑު ވެސް އިވެ އެވެ.
ކުނިގޮނޑުގައި ރޯވެފައި.
ހިޔާ ފްލެޓް ސަރަހައްދުން ކުނި ނެގޭނެ ރަނގަޅު ނިޒާމެއް ނެތުމުގެ ޝަކުވާ ވަނީ ބޮޑުވެފަ އެވެ. އެ ސަރަހައްދުގެ އެކި ހިސާބުތަކަށް އާއްމުން ކުނި އަޅަ އެވެ. އަދި އުސޫލެއްގެ ގޮތުން ވެމްކޯ އިން ނަގަނީ އާއްމު ކުނި ކަމަށްވީ ނަމަވެސް ބައެއް މީހުން ފަރުނީޗަރުތަކާއި ބޮޑެތި ހުސް ފޮށިގަނޑު ފަދަ ތަކެތި އުކަ އެވެ. އެފަދަ ބައެއް ތަކެތި އެތަނަށް ގިނަވެފައި ހުރެ އެވެ.
ހިޔާ ފްލެޓުގައި މި ވަގުތު ދިރިއުޅެނީ އެތަނަށް ވަދެވޭ އާބާދީގެ ގާތްގަނޑަކަށް 30 ޕަސެންޓެވެ. އެކަމަކު އެތަނުގެ ފިނިޝިން ހެދުމާއި ފަރުނީޗަރު ވެއްދުމާއި މީހުން ބަދަލުވުމުގެ ހަރަކާތްތަކާ އެކު އެ ސަރަހައްދު ވަރަށް ހަލަބޮއްޔެވެ.
