ލ. ފޮނަދޫގައި ފިނިހަކަ ގިނަވެ، އާންމު އުނދަގުލަކަށް ވެއްޖެ އެވެ.
ފޮނަދޫ ކައުންސިލްގެ ރައީސް އަހުމަދު ރިޔާޒު "އަދަދު" އަށް ވިދާޅުވީ ފިނިހަކަ މަދުކުރުމަށްޓަކައި ފިނިހަކަ ނައްތާލާ ޒާތުގެ ފަންޏެއް (ފްލެޓް ވާމް) އައްޑޫ ސިޓީން ގެނެސް ރަށުގެ އެކި ސަރަހައްދުތަކަށް ދޫކުރި ކަމަށެވެ. ނަމަވެސް އެކަމަށް އެއްވެސް ހައްލެއް ލިބިފައި ނުވާ ކަމަށް އޭނާ ވިދާޅުވި އެވެ.
ލ އަތޮޅުގެ ބައެއް އަވަށްތަކުގައި އާލާވަމުން އަންނަނީ އެފްރިކަން ޖަޔަންޓް ސްނެއިލް ނަމަކަށްކިޔާ ބާވަތެއްގެ ފިނިހަކައެކެވެ.
ފިނިހަކަ ގިނަވެ އުނދަގޫ އެންމެ ބޮޑުވަނީ ވިއްސާރަ މޫސުމުގައި ކަމަށާއި މިދުވަސްވަރު ވާރޭ ވެހެމުންދާތީވެ، ފިނިހަކައިގެ އުނދަގޫ އިންތިހާ އަށް ބޮޑުވެފައިވާ ކަމަށް ރިޔާޒު ވިދާޅުވި އެވެ.
"ފިނިހަކައިގެ އުނދަގޫ އާންމުކޮށް މި ޖެހެނީ ގަސް ހައްދާ، ދަނޑު ހައްދާ މީހުންނަށާއި ވަލާ ކައިރި ހިސާބުތަކުގައި ދިރިއުޅެމުންދާ ގޭގޭގެ މީހުންނަށް. ބައެއް މީހުން އޭގެ އުނދަގޫ ބޮޑުވެގެން މައްސަލަ ރިޕޯޓުކޮށްފައި ވެސް އެބަ ހުރި،" ރިޔާޒު ވިދާޅުވި އެވެ.
ލ.ފޮނަދޫ ގެ އެއްގެ ފާރަށް ފިނިހަކަތަކެއް އަރަނީ-- ފޮޓޯ: ސޯޝަލް މީޑިއާ/ފޭސްބުކް
ފޮނަދޫން ފިނިހަކަ ގިނައިން ފެންނަން ފެށީ މީގެ ދެތިން އަހަރު ކުރިން ކަމަށާއި، އެ އެއްޗެހި ނައްތާލުމަށްޓަކައި ހަދާނެ ގޮތެއް ނެތިގެން ބައެއް މީހުން ލޮނާއި ބްލީޗް ވެސް އަޅަމުންދެ އެވެ. އައްޑޫއިން ގެނައި ފަނިން ވެސް ފިނިހަކަ މަދުނުވުމުން، އެ ރަށުގެ ރައްޔަތުން ވަނީ ހަދާނެ ގޮތެއް ނޭނގި ގޮތް ހުސްވަފަ އެވެ.
"މި މައްސަލަ އަޅުގަނޑުމެން ސަރުކާރުގެ އިދާރާތަކަށް ވެސް ހިއްސާކޮށްފިން،"ރިޔާޒު ވިދާޅުވި އެވެ.
ފޮނަދޫގައި ފިނިހަކަ ފެތުރުން ކޮންޓްރޯލް ނުވި ގަމުގައި ފިނިހަކަ ކޮންޓްރޯލްކުރީ ދޫކޮށްލި ފަންޏެއްގެ ސަބަބުންނެވެ. ނަމަވެސް، އެ ރަށުގައި ވެސް މިހާރު ވެސް ދޭތެރެ ދޭތެރެއިން އުނދަގޫ ބޮޑުވާ ކަމަށް ގަމު ކައުންސިލްގެ ރައީސް އަހްމަދު ޒަކީ ވިދާޅުވި އެވެ.
ފިނިހަކަ އަކީ ދަނޑުވެރިންނަށާއި ގޭތެރޭގައި ގަސްހައްދާ އުޅޭ މީހުންނަށް އޮތް ބޮޑު ނުރައްކަލެކެވެ. އެގޮތުން ފިނިހަކައިގެ ނުރައްކާ އެންމެ ބޮޑުވަނީ އަލަށް ފަޅައިގެން ހެދޭ ޅަ ގަސްތަކަށެވެ.
ފިނިހަކައިން ގަސްގަހުގެ ފަތްތަކުގައި ކުދިކުދި ލޯވަޅުތަކެއް އަޅައި ފަތްތައް ހަލާކުކޮށްލަ އެވެ. މީގެ އިތުރުން މޭވާ އާއި ތަރުކާރީއަށް ދޫކޮށްލާ ފިނިހަކައިގެ ދަވައިގެ ސަބަބުން ސިއްހީ ގޮތުން ނުރައްކާވެ އެވެ.
"އެއްވެސް ކަހަލަ ގަހެއް ގޯތި ތެރޭގައިވެސް ހެއްދޭކަށް ނެތް. ދަނޑުތަކަށް އެސޮރުމެން އަރައިގެންވާ އުނދަގޫ އަދި މާ ބޮޑު،" ގޯތިތެރޭގައި މާ ގަހާއި އެކި ވައްތަރުގެ ތަރުކާރި އާއި މޭވާ ހައްދާ ފޮނަދޫ މީހަކު ބުންޏެވެ.
