ކަނޑުމަގުން ސިފައިން ފޯރުކޮށްދޭ ލޮޖިސްޓިކް ހިދުމަތްތަކާ ގުޅޭ ކަންކަން އެއް ފުރާޅެއްގެ ދަށަށް ބަދަލުކުރުމުގެ ބޭނުމުގައި ހުޅުމާލޭގައި އިމާރާތްކުރި "މެރިޓައިމް ލޮޖިސްޓިކްސް ބޭސް" މިއަދު ރަސްމީކޮށް ހުޅުވައިފި އެވެ.
މި ބޭސް ހުންނަނީ އެމްއެންޑީއެފްގެ ބައެއް ހިދުމަތްތައް ފޯރުކޮށްދޭން ހުޅުމާލޭގައި މިހާރު ވެސް ބޭނުން ކުރަމުން އަންނަ ބިމުގަ އެވެ. މިއަދު މި ބޭސް ހުޅުވަން ބޭއްވި ރަސްމިއްޔާތުގައި އެ ބިމުގެ ނަން ރަސްމީކޮށް "ކަލާސީނު ކޮށި" އަށް ވަނީ ބަދަލުކޮށްފަ އެވެ.
މި މެރިޓައިމް ލޮޖިސްޓިކްސް ބޭސް ގައި ސްމޯލް ބޯޓް ރިޕެއާ އެންޑް މެއިންޓެނެންސް ސެންޓަރަކާއި ކޯސްޓްގާޑް ސެކަންޑް ސްކޮޑްރަން އާއި ކޯސްޓްގާޑް ޑައިވިން ޔުނިޓު އަދި ޓްރާންސްޕޯޓު ސާވިސްގެ ބޯޓު އޮޕަރޭޝަން ސެންޓަރު ހިމެނެ އެވެ.
މެރިޓައިމް ލޮޖިސްޓިކްސް ބޭސްގައި ކުރެވޭ މަސައްކަތްތައް
- އިންޖިނިއަރިން
- ހަލް ރިޕެއާ އެންޑް މެއިންޓެނަންސް
- ކޮމިއުނިކޭޝަންސް އަދި ނެވިގޭޝަން ހިދުމަތްތައް
އެމްއެންޑީއެފް އިން ބުނި ގޮތުގައި މި ބޭސްގެ ސަބަބުން ސިފައިންގެ އޮޕަރޭޝަނަލް ގާބިލްކަން އިތުރުވެ، ރައްޔިތުންނަށް ފޯރުކޮށްދެމުން ގެންދާ ހިދުމަތްތައް ފުޅާވެ އަވަސް ވެގެން ދާނެ ކަމަށެވެ.
އަދި ކަނޑުމަތީގައި ދިމާވާ ހާދިސާތަކާ ގުޅިގެން ހިންގޭ ރެސްކިޔު އޮޕަރޭޝަންތަކުގައި ކޯސްޓްގާޑާއި އަދި ކޯސްޓްގާޑުގެ ޑައިވަރުން އެއް ދިމާއަކުން ހަރަކާތްތެރިވެ ހިދުމަތް ފޯރުކޮށްދެވޭ ގޮތަށް ހަމަޖެހިފައި އޮތުމަކީ ހިދުމަތް ފުރިހަމަކުރަން ފަހިގެން ދިޔަ މަގެއް ކަމަށް ބުންޏެވެ.
މި މެރިޓައިމް ލޮޖިސްޓިކްސް ބޭސްގައި ހިމެނޭ އިމާރާތްތަކާއި އިމާރާތްތަކުގެ އެތެރެ ފަރުމާކުރުމާއި އިމާރާތް ކުރުމުގެ ހުރިހާ މަސައްކަތްތަކެއް ކުރީ ސިފައިންނެވެ.
އެމްއެންޑީއެފް އިން ބުނީ މި ބޭސްގެ މަސައްތަކަކީ ގައުމީ ދިފާއީ ބާރުގެ މޭންޕަވާ، ރިސޯސަސް، ސިސްޓަމްސް އަދި އޮޕަރޭޝަނަލް ސެންޓަރުތައް ގާއިމުރުކުރުމާއި، ރައްޔިތުންނަށް ގާތުން ހިދުމަތް ފޯރުކޮށްދިނުމަށް މިހާރުގެ ލީޑާޝިޕުގެ އަމާޒުގެ ތެރެއިން ކުރެވުނު މަސައްކަތެއް ކަމަށެވެ.
އަދި މިއީ ތާރީހީ ކަމެއް ކަން ފާހަގަކުރަމުން ބުނީ މީގެ ސަބަބުން ސިފައިން ދެމުންގެންދާ ހިދުމަތްތަކަށް ގިނަ ކުރިއެރުންތަކެއް ލިބިގެންދާނެ ކަމަށް ބުންޏެވެ.
