މިހާތަނަށް ދުނިޔޭގެ ސުލުހައިގެ އިނާމު އެންމެ ހަގު އުމުރުގައި ހާސިލްކުރި މަލާލާ ޔޫސުފް ޒައި ކައިވެނި ކޮށްފި އެވެ. މަލާލާ ކައިވެނި ކުރިކަން ޔަގީންކޮށްދީފައި ވަނީ ބުދަ ދުވަހު އޭނާ ކުރި ޓްވީޓަކުންނެވެ. މަލާލާ ކައިވެނިކޮށްފައިވަނީ ޕާކިސްތާނުގެ ކްރިކެޓް ބޯޑުގެ މެނޭޖަރެއް ކަމުގައިވާ އަސީރު މާލިކްއާ އެވެ.
އަންހެން ކުދިންނަށް ތައުލީމް ފޯރުކޮށްދިނުމަށް ބާރުއަޅައި މަލާލާ ދައްކަމުން ގެންދިޔަ ވާހަކަތަކުގެ ސަބަބުން ތާލިބާނުން މަލާލާގެ ބޮލަށް ބަޑިޖަހާ ޒަހަމް ކޮށްލި ހާދިސާއަށް ނުވަ އަހަރު ފާއިތުވެފައިވާއިރު މަލާލާ ވެފައިވަނީ އިންސާނީ ހައްގުތައް ކަށަވަރުކުރުމަށް ގޮވާލާ އެކްޓިވިސްޓުންގެ ތެރޭގައި އަދިވެސް ފާހަގަކޮށްލެވޭ ވަރުގަދަ ޝަހްސިއްޔަތަކަށެވެ.
މަލާލާގެ ކައިވެނީގެ ފޮޓޯއެއްގައި ބައިވެރިއާ އަސީރުއާއެކު-- ފޮޓޯ: ޓްވިޓާ
ހިތްގައިމު ކުލަ ތަކުގެ ގަސްތަކުގެ ތެރޭގައި ފިޔާތޮށި ސަލްވާރު ކަމީޒެއްގައި މަލާލާ ފެނިގެންދިޔައިރު, އަސީރު ފެނިގެންދިޔައީ ކަޅު ކުލައިގެ ކޯޓު ފަޓްލޫނުގަ އެވެ.
އިނގިރޭސިވިލާތުގެ ބާމިންހަމުގައި ކުރިއަށްދިޔަ ކައިވެނީގެ މި ހަފްލާގައި ދެ ފަރާތުގެވެސް އާއިލާ ވަނީ ބައިވެރިވެފަ އެވެ.
ކައިވެނި ހަފުލާގައި މަލާލާގެ ދެމަފިރިން، މަލާލާގެ މައިންބަފައިންނާއެކު-- ފޮޓޯ: ޓްވިޓާ
މަލާލާގެ ކައިވެންޏަށް ދުނިޔޭގެ އެކި ކަންކޮޅުތަކުން މަރުހަބާ ކިޔަމުން ދާއިރު, ދާދި ފަހުން ވޯގްއަށް ދިން އިންޓަވިއުއެއްގައި ކައިވެނި ކުރުމުގެ ބޭނުމެއް ނޭނގޭ ކަމަށް މަލާލާ ބުނި މައްސަލަ ވަނީ ވަރަށް ބޮޑަށް ހޫނުވެފަ އެވެ. މަލާލާ ބުނެފައިވަނީ ކައިވެނި ކުރުމުގެ ގޮތުން ކޮންމެހެން ލިޔުމެއްގައި ސޮއިކޮށް އެއްބަސްވުންތަކެއް ހެދުމުގެ ބޭނުމެއް ނެތް ކަމަށާއި އޭގެ ބަދަލުގައި ހަޔާތުގެ ބައިވެރިޔާ އާއި އެކުގައި އުޅެވިދާނެ ކަމަށެވެ.
މައްސަލަަތައްް ބޮޑުވެ ގިނަ ބައެއްގެ ފާޑުކިޔުން ރައްދުވުމާއެކު މަލާލާ ފަހުން ވަނީ އެހެން ބުނެވުނީތީ މައާފަށް އެދިފަ އެވެ.
ކައިވެނީގެ ލިޔުމުގައި މަލާލާގެ ފިރިމީހާ، އަސީރު ސޮއިކުރަނީ-- ފޮޓޯ: ޓްވިޓާ
މިއަދަކީ އޭނާގެ ހަޔާތުގައި އަންނަ އަގުހުރި ދުވަހެއް ކަމަށް ބުނެ ކައިވެނިކުރިކަން އަންގާ ސޯޝަލް މީޑިއާގައި ހިއްސާކޮށްފައިވާ ޕޯސްޓްތަކުގައި މަލާލާ, 24 ބުނެފައި ވަނީ މި އާ ފެށުމަށް އެންމެންވެސް ހެޔޮދުއާ ކޮށްދިނުމަށް އެދިފަ އެވެ.
މަލާލާގެ އަމިއްލަ ގައުމު، ޕާކިސްތާނުގެ އަންހެން ކުދިންނަށް ތައުލީމު ދިނުމަށް އޭނާ ކުރަމުން ގެންދިޔަ މަސައްކަތްތަކާ ގުޅިގެން މީގެ ނުވަ އަހަރު ކުރިން ތާލިބާނުން އޭނާ އަށް ހަމަލާދީ ވަރަށް ބޮޑަށް ޒަހަމްކޮށްލި އެވެ. އެ ހަމަލާ ދިނީ އޮކްޓޯބަރު 9، 2012 ގައި ސްކޫލުގެ އިންތިހާނު ނިންމާފައި މަލާލާ، އޭނާގެ އެކުވެރިންނާއެކު ދަނިކޮށެވެ.
އެ ހަމަލާގައި ލިބުނު ޒަހަމްތަކަށް ފަރުވާ ދިނުމަށް މަލާލާ ގެންދިޔައީ އިނގިރޭސި ވިލާތަށެވެ. އެއަށް ފަހު، އޭނާ އާއި އޭނާގެ މައިންބަފައިން ދިރިއުޅެމުން އަންނަނީ އިނގިރޭސި ވިލާތުގަ އެވެ.
ހަމަލާއަށް ފަހު، މުޅި ދުނިޔޭގެ ސަމާލުކަން މަލާލާއަށް ލިބިގެންދިޔަ އެވެ. އަދި ސުލުހައިގެ އިނާމު 2014 ގައި ލިބުނެވެ. އޭރު އުމުރުން 17 އަހަރެވެ.
