އޮސްޓްރޭލިއާގެ "މޯސްޓް ވޯންޓެޑް މޭން"ގެ ގޮތުގައި ހޯދަމުން ދިޔަ މީހަކު ފިލައިގެން އުޅެނިކޮށް ލޮރީއެއްގެ ތެރެއިން ހައްޔަރުކޮށްފި އެވެ.
އުމުރުން 33 އަހަރުގެ މުސްތަފާ ބަލުޗް ހޯދަން 17 ދުވަހުގެ ބޮޑު އޮޕަރޭޝަނެއް ވަނީ ހިންގާފަ އެވެ. އޭނާ ސިޑްނީގައި އުޅޭ ނޫޅޭ ތަން ބަލަން ފައިގައި ހަރުކޮށްފައި ހުރި ޓެގް ނައްޓާލައިގެން ފިލީ މިދިޔަ މަހު އެވެ.
ފުލުހުން ބުނީ އޭނާ ފެނުނީ ލިބުނު މައުލޫމާތެއްގެ މައްޗަށް ބިނާކޮށް ހުއްޓުވި ލޮރީއެއްގެ ތެރެއިން ކަމަށެވެ.
ޑްރަގްގެ ބޮޑެއް ކަމަށް ބެލެވޭ ބަލުޗް ފެނުނީ ލޮރީގެ ތެރޭގައި އޮތް ޝިޕިން ކޮންޓެއިނަރެއްގެ ތެރޭގައި ޕާކުކޮށްފައި އޮތް ކާރެއްގެ ތެރޭގައި އިންދަ އެވެ.
ފުލުހުން ބުނީ ކޮންޓެއިނަރު ހުރީ ތަޅު ނުލާ ކަމަށާއި އެ މީހުން އޭގައި ޓަކި ޖެހުމުން އޭގެ ތެރެއިން ވެސް މީހަކު ޓަކި ޖެހުނު އަޑު އިވުނު ކަމަށެވެ.
"އޭނާ ހުރީ ޝޮކެއްގައި. އޭނާ ހީކުރީ ވަރަށް މޮޅު ރޭވުމެއް ރާވައިގެން ކާމިޔާބު ވާނެ ކަމަށް،" ނިއުސް ސައުތު ވޭލްސް ފުލުހުންގެ ޑިޓެކްޓިވް ސުޕްރިންޓެންޑެންޓް ރޮބް ކްރިޗްލޯ ވިދާޅުވި އެވެ.
ފުލުހުން ބުނީ ބަލުޗް މަސައްކަތް ކުރީ ނިއުސް ސައުތު ވޭލްސް ސްޓޭޓުން ކުއީންސްލޭންޑަށް ދިޔުމަށް ކަމަށެވެ. ފުލުހުންގެ މިނިސްޓަރު ޑޭވިޑް އެލިއަޓް ވިދާޅުވީ ބަލުޗް ހައްޔަރު ކުރެވުމަކީ ނިއު ސައުތު ވޭލްސް ސްޓޭޓުގެ ފުލުހުންގެ ތާރީހުގައި ކާމިޔާބެއް ކަމަށެވެ.
ޓެގް ނައްޓާލައިގެން ބަލުޗް ފިލިއިރު އޭނާ ހުރީ ކަފާލާތުގެ ދަށުން ދޫކޮށްލާފަ އެވެ. އޭނާގެ މައްޗަށް ތުހުމަތު ކުރީ 900 ކިލޯގެ ކޮކެއިން އިކުއެޑޯ އިން އެތެރެކުރަން އުޅުނު ކަމަށެވެ.
ކަފާލާތުގެ ދަށުން އޭނާ ދޫކޮށްފައި ހުރުމުން ފުލުހުން ވަނީ އެކަމާ މެދު ސުވާލު އުފައްދާފަ އެވެ. އަދި އޭނާ ހޯދަން ހިންގި އޮޕަރޭޝަނަށް ބޮޑު ހަރަދެއް ދިޔަ ކަމަށް ބުންޏެވެ.
ފުލުހުން ތުހުމަތު ކުރާ ގޮތުގައި ބަލުޗް އަކީ ކުށްވެރިންގެ ނެޓްވޯކެއްގައި އިސް މަގާމެއް ފުރަމުންދާ މީހެކެވެ. އޭނާ ފިލި މައްސަލައިގައި ވަކި ޝަރީއަތެއް ކުރަން ހަމަޖެހިފައި ވާއިރު، އޭނާ ގޮވައިގެން ދިޔަ ލޮރީ ދުއްވި މީހާއަށް ވެސް ދައުވާ ކުރާނެ އެވެ.
