ބާމިންހަމް (ނޮވެމްބަރު 10) - ހުސްވެފައިވާ އެސްޓަން ވިލާގެ ކޯޗުކަން ލިވަޕޫލްގެ ކުރީގެ ކެޕްޓަން އަދި ސްކޮޓްލެންޑްގެ ރޭންޖާސްއާ މި ވަގުތު ހަވާލުވެހުރި ކޯޗު، ސްޓީވެން ޖެރާޑަށް ހުށަހަޅަން ތައްޔާރުވަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
މީގެ ހަތަރު އަހަރު ކުރިން ޖެރާޑް ވަނީ 19 އަހަރަށް ފަހު ފުޓްބޯޅަ ކުޅުން ހުއްޓާލައިފަ އެެވެ. ޖެރާޑް، ރޭންޖާސް ކޯޗުކަމާ ހަވާލުވީ 2018 ވަނަ އަހަރު މެއި މަހުގެ ތެރޭގަ އެވެ. ޖެރާޑްގެ ވަނީ މިދިޔަ ސީޒަނުގައި ރޭންޖާސް އަށް ސްކޮޓްލެންޑްގެ ލީގު ޗެމްޕިއަންކަން ހޯދައިދީފަ އެވެ. މެޗަކުން ބަލިނުވެ ރޭންޖާސް އިން ސްކޮޓްލެންޑްގެ ޗެމްޕިއަންކަން ހޯދިއިރު، މިއީ 10 އަހަރު ތެރޭ އެ ޓީމުން ލީގު ތަށި އުފުލާލި ފުރަތަމަ ފަހަރެވެ.
ޖެހިޖެހިގެން އިނގިރޭސި ޕްރިިމިއާ ލީގުގެ ފަސް މެޗުން ވަކިވުމުން އެސްޓަން ވިލާ އިން ނިންމީ އެ ޓީމުގެ ކޯޗަކަށް ހުރި ޑީން ސްމިތު ވަކިކުރާށެވެ. ސްމިތު ވަކިކުރުމަށް ފަހު ރަނގަޅު އިނގިރޭސި ކޯޗެއް ގެންނަން އެސްޓަން ވިލާ ބޯޑުން ބޭނުންވާއިރު، ގިނަ ބޯޑް މެމްބަރުން އިއްތިފާގުވަނީ އުމުރުން 41 އަހަރުގެ ޖެރާޑާ އެސްޓަން ވިލާ ކޯޗުކަން ހަވާލުކުރާށެވެ.
ލިވަޕޫލްގެ ކޯޗު ޔާގެން ކްލޮޕްގެ ކޮންޓްރެކްޓް 2024 ވަނަ އަހަރުގެ ޖޫންގެ ނިޔަލަށް ހަމަވާއިރު، އޭނާ އަށް ފަހު ދެން ލިވަޕޫލަށް ކޯޗުކޮށްދޭނީ ޖެރާޑް ކަމަށް ރިޕޯޓްތައް ބުނެ އެވެ. އެކަމަކު، އެހާތަނަށް ޕްރިމިއާ ލީގުގެ އެހެން ކްލަބަކުން ޖެރާޑް ފެނުމުގެ ފުރުސަތު އެބައޮތެވެ.
މީގެ ކުރިން ނިއުކާސަލް ޔުނައިޓެޑުން ވެސް ޖެރާޑަށް ދެ ފަހަރެއްގެ މަތިން ކޯޗުކަން ހުށަހެޅި އެވެ. އެކަމަކު، ޖެރާޑް ބޭނުންވީ ރޭންޖާސްގައި މަޑުކުރާށެވެ. އިންގްލެންޑްގެ ބާމިންހަމް ސަރަހައްދު ނޫސްތަކުން ރިޕޯޓްކުރާ ގޮތުގައި އެސްޓަން ވިލާ އިން ހުށަހަޅައިފިނަމަ ޖެރާޑް އެ ކްލަބަށް އަންނަން އެއްބަސްވުމުގެ ފުރުސަތު އެބައޮތެވެ.
