ގުދުސް (ނޮވެމްބަރު 9) - ފަލަސްތީނުގެ އިގްތިސާދު މަޑުމަޑުން ރަނގަޅު ވާން ފަށާފައިވީ ނަމަވެސް ގާޒާގައި ވަޒީފާ ނުލިބުމުގެ މައްސަލަ ވަރަށް ބޮޑު ކަމަށް ވޯލްޑް ބޭންކުން ބުނެފި އެވެ.
މި އަހަރުގެ ފުރަތަމަ ހަ މަސް ދުވަހު ފަލަސްތީނުގެ އިގްތިސާދު ވަނީ 5.4 ޕަސެންޓުގެ ކުރިއެރުމެއް ހޯދާފަ އެވެ. މި އަހަރު ނިމޭއިރު ހަ ޕަސެންޓުގެ ކުރިއެރުމެއް ލިބޭނެ ކަމަށް ލަފާކުރެވެ އެވެ. ނަމަވެސް 2022 ވަނަ އަހަރު އިގްތިސާދީ ކުރިއެރުން މަޑުޖެހި، ތިން ޕަސެންޓަށް ވެއްޓޭނެ ކަމަށް ލަފާކޮށްފައި ވެ އެވެ.
"ކުރިމަގާ މެދު އަދިވެސް ހުރީ ސުވާލުތަކެއް. ކުރިއެރުން ބިނާވަނީ ފަލަސްތީނާ ގުޅުން ހުރި ހުރިހާ ފަރާތްތަކުން ވެސް މަސައްކަތްކޮށް ޒުވާނުންނަށް ވަޒީފާ ކަށަވަރުކޮށްދިނުމުގެ މައްޗަށް،" ހުޅަނގު އައްސޭރި އާއި ގާޒާ އަށް ކަނޑައަޅާފައި ހުންނަ ވޯލްޑު ބޭންކުގެ ކަންޓްރީ ޑިރެކްޓަރު ކަންތަން ޝަންކަރް ވިދާޅުވި އެވެ.
މިދިޔަ މޭ މަހު އިޒްރޭލާއި ހަމާސްއާ ދެމެދު ކުރި 11 ދުވަހުގެ ހަނގުރާމައާ ހެދި ގާޒާ އަށް ވަރަށް ބޮޑެތި ގެއްލުންތައް ލިބުނެވެ. އޭގެ ކުރިން ވެސް ކޮވިޑުގެ ބަލިމަޑުކަމާ ހެދި އަޅާފައިވާ ފިޔަވަޅުތަކުގެ ސަބަބުން ގާޒާގައި މީހުން ދިރިއުޅެމުން ދިޔައީ ވަރަށް ދަތި ހާލުގަ އެވެ.
ހަމާސް ޖަމާއަތުން ކޮންޓްރޯލް ކުރާ ގާޒާގައި ދެ މިލިއަން މީހުން ދިރިއުޅޭ އިރު، އިޒްރޭލާއި މިސްރުން އޮންނަނީ ގާޒާ ވަށާލައިގެން ބަންދުކޮށްފަ އެވެ. ގާޒާގައި ވަޒީފާ ނެތް މީހުންގެ ނިސްބަތަކަީ 45 ޕަސެންޓެވެ. އަދި ފަގީރުކަމުގައި އުޅޭ މީހުންގެ ނިސްބަތް ވަނީ 43 ޕަސެންޓުން 59 ޕަސެންޓަށް އުފުލިފަ އެވެ.
"ދިރިއުޅުމުގެ ހާލަތު ހުރި ގޮތާއި އިޖްތިމާއީ އެހީ އަށް ގާޒާގައި ދިރިއުޅޭ ރައްޔިތުން ބަރޯސާވާން ޖެހިފައިވުމަކީ ބޮޑު ކަންބޮޑުވުމެއް،" ޝަންކަރް ވިދާޅުވި އެވެ.
އިޒްރޭލުން ވެރިވެގަނެގެން އުޅޭ ފަލަސްތީނުގެ ހުޅަނގު އައްސޭރީގައި ވަޒީފާ ނެތް މީހުންގެ ނިސްބަތަކީ 17 ޕަސެންޓެވެ. ވޯލްޑު ބޭންކުން ބުނީ އެ ތަނުގައި ވެރިކަން ކުރާ ފަލަސްތީނު ސަރުކާރުގެ މާލީ ހާލަތު ވަރަށް ގޯސް ކަމަށާއި އެތެރޭގެ ބޭންކުތަކުން ފައިސާ ދަރަންޏަށް ނެގުމުގެ ގާބިލްކަން ގެއްލިފައިވާ ކަމަށެވެ.
އެގޮތުން މި އަހަރު ފަލަސްތީނުގެ ސަރުކާރުގެ ބަޖެޓު ޑެފިސިޓް 1.36 ބިލިއަން ޑޮލަރަށް އަރާނެ ކަމަށް ލަފާކުރެވެ އެވެ. އެހީދޭ ފަރާތްތަކަށް ވޯލްޑު ބޭންކުން ގޮވާލީ ޑެފިސިޓް ކުޑަ ކުރުމަށް އެހީވުމަށެވެ.
