ލަންޑަން (ނޮވެމްބަރު 9) - ފުޓްބޯޅަ އަކީ އެންމެ ނާއިންސާފު ކުޅިވަރު ކަމަށް ޓޮޓެންހަމްގެ ކޯޗުކަމުން ދާދި ފަހުން ވަކިކުރި ޕޯޗުގީސް ކޯޗު ނޫނޯ އެސްޕިރީޓޯ ސަންޓޯ ބުނެފި އެވެ.
ބާރަ ވަރަކަށް ކޯޗުންނާ މަޝްވަރާ ކުރުމަށް ފަހު ނޫނޯ ޓޮޓެންހަމްގެ ކޯޗަކަށް މި ސީޒަން ފެށުމުގެ ކުރިން ހަމަޖެއްްސީ ދެ އަހަރުގެ ކޮންޓްރެކްޓެއްގަ އެވެ. ސީޒަން ފަށައިގެން ފުރަތަމަ މެޗުތަކުން ރަނގަޅު ރެކޯޑެއް ދެމެހެއްޓި ނަމަވެސް އެންމެ 17 މެޗަށް ފަހު (ހަތަރު މަހަށް ފަހު) ޓޮޓެންހަމް އިން ވަނީ ނޫނޯ މަގާމުން ވަކިކޮށްފަ އެވެ.
ޓޮޓެންހަމްގެ މި ނިންމުމަށް ފަހު ނޫނޯ އޭނާގެ ޝުއޫރުތައް ފުރަތަމަ ފަހަރަށް ފާޅުކުރީ އިންސްޓަގްރާމް މެދުވެރިކޮށެެވެ. ނޫނޯ ބުނީ މިދިޔަ ހަފްތާއެއްހާ ދުވަހު އޭނާ އުޅެން ޖެހުނީ ތަފާތު އެކި ކަންކަމާ ކުރިމަތިލުމަށް ކަމަށާއި އޭގެ ތެރެއިން ކަންތައްތަކެއް ވެސް ދަސްވި ކަމަށެވެ.
"މިއީ ފުޓްބޯޅަ، އެންމެ ނާއިންސާފު ކުޅިވަރު. މީގެ ދެ މަހެއްހާ ދުވަސް ކުރިން އަހަންނަކީ ޕްރިމިއާ ލީގުން ހޮވި މެނޭޖާ އޮފް ދި މަންތު (އެއް މަސް ދުވަހުގެ މެޗުތަކުގެ އެންމެ މޮޅު މެނޭޖަރު). އޭގެ ހަފްތާތަކެއް ފަހުން އަހަރެން ދުވަސް ގުނަން މި ޖެެހެނީ ޓޮޓެންހަމް އިން އަހަރެން ވަކިކޮށްގެން،" ނޫނޯ ބުންޏެވެ.
ކުރިން ވުލްވްސްގެ އިތުރުން ޕޯޓޯ އަށް ކޯޗުކޮށްދިން ނޫނޯ އަށް އިނގިރޭސި ޕްރިމިއާ ލީގުގެ ކްރިސްޓަލް ޕެލަސްއާ ހަވާލުވާން ވެސް ފުރުސަތު ލިބުނެވެ. އެކަމަކު އޭނާ ޓޮޓެންހަމާ ގުޅުނީ އެ ކްލަބްގެ ސްޕޯޓިން ޑިރެކްޓަރު ފަބިއޯ ޕަރަޓީޗީއާ އެކު ބޭއްވި މަޝްވަރާތަކަށް ފަހު ހާއްސަ އުއްމީދުތަކެއް ވެސް އޮތުމުންނެވެ.
ނޫނޯ ވަނީ ޓޮޓެންހަމް ސަޕޯޓަރުން އޭނާ އަށް ކުރި ސަޕޯޓަށް ޝުކުރު އަދާކޮށްފަ އެވެ. އަދި ޓޮޓެންހަމަށް ޓްރޮފީ އެއް ހޯދައިދޭން ކުރި މަސައްކަތް ޕްލޭނާ އެއްގޮތަށް ނުދިއުމަކީ އޭނާގެ ކޮންޓްރޯލުން ބޭރުން ދިޔަ ކަމެއް ކަމަށް ނޫނޯ ބުނެފައިވެ އެވެ.
ނޫނޯގެ ކުރިން ޓޮޓެންހަމް އިން ވަކިކުރީ މަޝްހޫރު ކޯޗު ހޯސޭ މޮރީނިއޯ އެވެ. މޮރީނިއޯ ބުނީ ނޫނޯ އަށް އަބަދުވެސް ކާމިޔާބަށް އެދޭ ކަމަށެވެ.
މި ފަހަރުގެ ޕްރިމިއާ ލީގު ފެށިގެން މިހާތަނަށް ކޮންމެ ޓީމަކުން 11 މެޗު ކުޅުނުއިރު، ނޫނޯގެ އިތުރުން މިހާތަނަށް ހަތަރު ކޯޗުންނަށް ވަނީ ވަޒީފާ ގެއްލިފަ އެވެ. އެއީ ވަޓްފޯޑްގައި ހުރި ސްޕެއިންގެ ކޯޗު ޒިސްކޯ ނޫނޭޒާއި ނޯވިޗް ސިޓީގެ ޖަރުމަނު ކޯޗު ޑެނިއަލް ފާކާ، ނިއުކާސަލްގެ ކޯޗު ސްޓީވް ބްރޫސް އަދި އެސްޓަން ވިލާގެ ކޯޗު ޑީން ސްމިތު އެެވެ.
