ގދ. ތިނަދޫ ކައިރިން އޮޔާދަނިކޮށް ފެނުނު ބަންޑުން ޖަހާލާފައި އޮތް ބޯޓެއް އެރަށު ކައުންްސިލްގެ ބެލުމުގެ ދަށަށް ވަގުތީކޮށް ގެނެސްފި އެވެ.
ތިނަދޫ ކައުންސިލް ނައިބު ރައީސް ނަސްރުﷲ އަލީ ވިދާޅުވީ މިދިޔަ މަހު ފަހުކޮޅު ފެނުނު އެ ބޯޓުގައި ގާތްގަނޑަކަށް 90-100 ފޫޓު ހުންނާނެ ކަމަށެވެ. އަދި އެއީ ޔަގީނުން ވެސް ރާއްޖޭގެ ބޯޓެއް ނޫންކަމަށް އޭނާ ވިދާޅުވި އެވެ.
"ބޮޑަށް ހީވަނީ ބަންޑުން ޖަހާލިތާ ހަ ވަރަކަށް މަސް ވެދާނެ ހެން. އެ ބޯޓު ފެނުނުއިރު އައި ދިމާލުން ބޮޑަށް ބެލެވެނީ ތިނަދޫ އުތުރުން މި އޮންނަ ހޫޓު ކަނޑު ސަރަހައްދު ފަޅިން އަތޮޅު އެތެރެވަރިއަށް ވަން އެއްޗެއް ކަމަށް،" ނަސްރުﷲ ވިދާޅުވި އެވެ.
ފައިބަރާއި ދަނގަޑުން ބަނދެފައި އޮތް އެ ބޯޓުގެ އެތެރެއިން ވެސް އަދި އެ ބޯޓު ފުރަތަމަ ފެނުނުއިރު ވެސް އޭގެ ކައިރިން އިތުރު މުދަލެއް އެހެން އެއްޗެއް ނުފެންނަކަމަށް އޭނާ ވިދާޅުވި އެވެ. ބޯޓުގެ އިންޖީނު އަދިވެސް އޭގައި އެބައިން ކަމަށް އޭނާ ވިދާޅުވި އެވެ.
"ހިޔެއްނުވޭ މަސްވެރިކަން ކުރާ އެއްޗެއްހެން. އެކަމަކު ވެދާނެ ދާ އަޅައިގެން މަސްވެރިކަން ކުރާ ބޯޓަކަށް ވެސް. އެ ބޯޓު ތިނަދުއާ ހިސާބަށް ގެނައީ މަސް ދޯންޏެއްގައި އައްސައިގެން ރަށުގެ ޒުވާނުންތަކެއް،" ނަސްރުﷲ ވިދާޅުވި އެވެ.
އެ ބޯޓު މިހާރު ވަނީ ވަގުތީ ގޮތުން ތިނަދޫ ކައުންސިލް އިދާރާގެ ބެލުމުގެ ދަށަށް އެ ރަށާއި ކައިރިއަށް ގެނެސްފަ އެވެ. އެ ބޯޓާއި ގުޅިގެން ތިނަދޫ ކައުންސިލުން ނެރުނު ބަޔާނެއްގައި ބުނީ ލަނގުވާ ތަކެއްޗާއި ހޮވާ ތަކެއްޗާއި ބެހޭ ގާނޫނުގެ ދަށުން އެ ކައުންސިލްގެ ބެލުމުގެ ދަށުގަ އެވެ.
"އެހެންކަމުން މި ބޯޓާއި މެދު ކަމާއިބެހޭ މިނިސްޓްރީން ވަކިގޮތެއް މި ކައުންސިލަށް އަންގަންދެން މި ބޯޓަށް އެއްވެސް ގެއްލުމެއް ނުދިނުމަށާއި، މި ބޯޓާއި ބޯޓުގައިވާ ތަކެއްޗަށް ގެއްލުމެއް ނުދިނުމަށް އެންމެހައި ފަރާތްތަކަށް އިލްތިމާސްކުރަމެވެ،" ތިނަދޫ ކައުންސިލުގެ ބަޔާނުގައި ވެ އެވެ.
ގާނޫނުގައިވާ ގޮތުންނަމަ، ބޯޓާއި ދޭތެރޭ ދެން ގޮތެއް ނިންމާނީ މިނިސްޓްރީ އޮފް ފިނޭންސްއިންނެވެ. އަދި އެ މަސައްކަތުގެ ދަށުން ބޯޓުގެ ވެރި ފަރާތް ހޯދުމަށްޓަކައި އާންމުކޮށް އިއުލާން ވެސް ކުރާނެ އެވެ.
