ގުދުސް (ނޮވެމްބަރު 8) - އިޒްރޭލުން މިދިޔަ މަހު މަނާކުރި ފަލަސްތީނުގެ މަދަނީ ޖަމިއްޔާތަކުގެ މެމްބަރުންނަށް ޖާސޫސް ކުރުމަށް ޕެގަސޫސް ސްޕައިވެއާ ބޭނުންކުރިކަން ފަޅާ އަރައިފި އެވެ.
ޕެގަސޫސް ސްޕައިވެއާ އަކީ އިޒްރޭލުގެ އެންއެސްއޯ ގްރޫޕުގެ އުފެއްދުމެކެވެ. އެ ސްޕައިވެއާގެ އަސަރުކުރާ ސްމާޓްފޯނުތައް ބަދަލުވަނީ އެންއެސްއޯ ގްރޫޕުގެ ކްލަޔަންޓުންނަށް ފަސޭހައިން ޖާސޫސްކުރެވޭނެ ވަސީލަތަކަށެވެ. އެގޮތުން ފޯނުގައި ހުންނަ މެސެޖާއި، ފޮޓޯތައް ބަލައި، ލޮކޭޝަން ޓްރެކްކޮށް، ފޯނުގެ ވެރިފަރާތަށް ނޭނގި ކެމެރާ ވެސް ޖެއްސެ އެވެ.
ފަލަސްތީނުގެ ޖަމިއްޔާތަކަށް އިޒްރޭލުން ޖާސޫސްކުރިކަން އެނގުނީ އިންސާނީ ހައްގުތައް ދިފާއު ކުރަން ޔޫރަޕުގައި މަސައްކަތް ކުރާ ފްރަންޓްލައިން ޑިފެންޑާޒް ޖަމިއްޔާ އިން އެމްނެސްޓީ އިންޓަނޭޝަނަލް އާއި ޓޮރޮންޓޯ ޔުނިވާސިޓީގެ ސިޓިޒެން ލެބް ގުޅިގެން ހިންގި ތަހުގީގަކުންނެވެ.
މިދިޔަ މަހު އިޒްރޭލުން ވަނީ ފަލަސްތީނުގެ ހަ ޖަމިއްޔާއެއް ހިންގުން މަނާކޮށް އެއީ "ޓެރަރިސްޓު" ގްރޫޕުތަކެއް ކަމަށް ކަނޑައަޅާފަ އެވެ.
އިޒްރޭލުން މަނާކުރި ގްރޫޕުތަކަކީ ޔޫނިއަން އޮފް ޕަލެސްތީނިއަން ވިމެންސް ކޮމިޓީޒް (ޔޫޕީޑަބްލިއުސީ)، އައްޑަމީޜް، ބިސާން ސެންޓާ ފޯ ރިސާޗް އެންޑް ޑެވެލޮޕްމަންޓް، އަލް ހައްގު، ޑިފެންސް ފޯ ޗިލްޑްރެން އިންޓަނޭޝަނަލް - ޕަލެސްތީން (ޑީސީއައި-ޕީ) އަދި ޔޫނިއަން އޮފް އެގްރިކަލްޗަރަލް ވޯކް ކޮމިޓީޒް (ޔޫއޭޑަބްލިއުސީ) އެވެ.
އިޒްރޭލުން ތުހުމަތު ކުރީ އެ ހަ ޖަމިއްޔާ އިން ސިއްރުން ޕޮޕިއުލާ ފްރަންޓް ފޯ ދަ ލިބެރޭޝަން އޮފް ޕަލެސްތީން (ޕީއެފްއެލްޕީ) އާއެކު މަސައްކަތް ކުރާ ކަމަށެވެ. ޕީއެފްއެލްޕީ އަކީ ޓެރަރިސްޓު ގްރޫޕެއް ކަމަށް ހުޅަނގުގެ ގިނަ ގައުމުތަކުން ދެކެ އެވެ.
އެ ޖަމިއްޔާތައް ސިވިލް ސޮސައިޓީ ޖަމިއްޔާތަކުގެ ގޮތުގައި ހަރަކާތްތެރިވި ނަމަވެސް "ހަގީގަތުގައި ކޮންޓްރޯލް ކުރަނީ ޕީއެފްއެލްޕީގެ އިސް ލީޑަރުން" ކަމަށް އިޒްރޭލުން ތުހުމަތު ކުރި އެވެ. އަދި އެ ޖަމިއްޔާތަކުގެ މަސައްކަތުގައި ޓެރަރިސްޓު ހަރަކާތްތަކުގައި އުޅެފައި ތިބި މީހުން ހިމެނޭ ކަމަށް ބުންޏެވެ.
އިޒްރޭލް ސަރުކާރުން އެ ޖަމިއްޔާތަކަށް ޖާސޫސްކުރި މައްސަލައިގައި މިހާތަނަށް އެއްވެސް އެއްޗެއް ބުނެފައެއް ނުވެ އެވެ. ނަމަވެސް އެމެރިކާ އިން އެންއެސްއޯ ގްރޫޕް ބްލެކްލިސްޓު ކުރި މައްސަލައިގައި މިދިޔަ ހޮނިހިރު ދުވަހު އިޒްރޭލުން ބުނީ އެއީ "އަމިއްލަ ކުންފުންޏެއް" ކަމަށާއި "ސަރުކާރުގެ މަޝްރޫއެއް ނޫން" ކަމަށެވެ.
