މިއަދު ކަނޑައެޅި މިނިމަމް ވޭޖާ އެކު ޓޫރިޒަމް ސިނާއަތުގެ މުވައްޒަފުން ހާއްސަކޮށް ރިސޯޓު މުވައްޒަފުންނަށް އެންމެ މަދުވެގެން މުސާރައިގެ ގޮތުގައި 12،000ރ. ލިބޭނެ ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ފާހަގަކުރައްވައިފި އެވެ.
ރާއްޖޭގެ ރިސޯޓުތައް ހިމެނޭ އެންމެ ބޮޑެތި ވިޔަފާރިތަކުން މިނިމަމް ވޭޖުގެ ގޮތުގައި މުވައްޒަފުންނަށް 8،000ރ. ދޭން ޖެހޭނެ ކަމަށް މިއަދު ވަނީ ކަނޑައަޅާފަ އެވެ. މިއަދަދަކީ ބޮޑެތި ވިޔަފާރިތަކުން ދޭން ޖެހޭނެ އެންމެ ކުޑަ އުޖޫރައިގެ ގޮތުގައި މިނިމަމް ވޭޖް ބޯޑުން ލަފާދިން 8،900ރ. އަށް ވުރެ ކުޑަ އަދަދެކެވެ.
މިނިމަމް ވޭޖް އިއުލާނުކުރައްވާ ވާހަކަ ދައްކަވަމުން މިނިސްޓަރު ފައްޔާޒު ވިދާޅުވީ މިނިމަމް ވޭޖް ބޯޑުން ކަނޑައަޅާފައި ހުރީ ރަނގަޅު އަދަދުތަކެއް ނަމަވެސް, ރާއްޖޭގެ އިގުތިސޯދު އަދި ރަނގަޅުނުވާ ކަމަށެވެ.
"މިހާރު ކަނޑައަޅާފައިވާ އަދަދުތަކަކީ ވަރަށް ގިނަ ކަންތައްތަކަކަށް ފަހު މިއަދުގެ ހާލަތައް ބަލައި އިއުލާނުކުރެވުނު 'ރީޒަނަބަލް އަދަދު' ތަކެއް," ކަމަށް ފައްޔާޒު ވިދާޅުވި އެވެ.
އަދި މިއީ ވިޔަފާރިތަކަށާއި ވަޒީފާ އަދާކުރާ ފަރާތްތަކަށް ފައިދާވާނެ ގޮތަށް ކަނޑައެޅުއްވި އަދަދުތަކެއް ކަމަށް ވެސް މިނިސްޓަރު ފާހަގަކުރެއްވި އެވެ.
އިކޮނޮމިކް މިނިސްޓްރީން މައުލޫމާތުދޭ ގޮތުގައި ރާއްޖޭގެ އިގުތިސޯދު މިހާރު އޮތް ހާލަތަށް ބަލައި ބޮޑެތި ވިޔަފާރިތަކުގެ މިނިމަމް ވޭޖް 8،000ރ. އަށް ހަމަޖައްސާފައި ވަނީ 'ނީޑް ބޭސްޑް އެޕްރޯޗް' އަކުންނެވެ. މި އަދަދަކީ ރަނގަޅު 'ލިވިން ވޭޖެއް' ކަމަށް އިކޮނޮމިކް މިނިސްޓްރީން ފާހަގަކުރެ އެވެ.
މިހާރު ރާއްޖޭގެ ރިސޯޓުތަކުގައި މަސައްކަތްކުރާ މުވައްޒަފުންގެ މެދުގައި މުސާރައިގެ ފަރަގު ވަރަށް ބޮޑެވެ. ރިސޯޓުތަކުގެ މެޖޯރިޓީ މުވައްޒަފުންގެ މުސާރަ އަކީ 4،583ރ. އާއި 5،583ރ. އާ ދެމެދުގެ އަގެކެވެ.
ރާއްޖޭގެ 52 ރިސޯޓެއްގެ އެވްރެޖް މުސާރަ 8،000 ރުފިޔާއަށް ވުރެ ދަށެވެ.
މިނިމަމް ވޭޖް ކަނޑައެޅުމުން ޓޫރިޒަމް ސެކްޓަރުގައި މަސައްކަތްކުރާ 13،000 މުވައްޒަފުންގެ މުސާރައަށް ހެޔޮ ބަދަލުތަކެއް އަންނާނެ ކަމަށް މިނިސްޓްރީން ފާހަގަކުރެ އެވެ. މިއާއެކު މުވައްޒަފުންގެ މުސާރައަށް އަހަރަކަށް ހަރަދުވާ ވަރު 352 މިލިއަން ރުފިޔާ އިތުރުވާނެ ކަމަށް ވަނީ ލަފާކޮށްފަ އެވެ.
މިއަދު ކަނޑައެޅި މިނިމަމް ވޭޖްގެ ތެރޭގައި މުވައްޒަފުންނަށް ލިބޭ ފިކްސްޑް އެލަވަންސް ހިމެނޭނެ އެވެ.
އެކަމަކު މި އަދަދުގެ ތެރޭގައި އެކި މަސް މަހު އެކި މިންވަރަށް ދެވޭ އެލަވަންސްތަކާއި އިތުރުގަޑީގެ ފައިސާ އާއި ހާއްސަ އެލަވަންސްތަކެއް ނުހިމެނޭނެ އެވެ.
މިނިމަމް ވޭޖްގައި އެއްވެސް "އިން-ކައިންޑް ބެނެފިޓް" ނުހިމެނޭ ގޮތަށް ކަނޑައަޅާފައިވާ އިރު، ކަސްޓަމާސާވިސްގެ ވަޒީފާތައް އަދާކުރާ މުވައްޒަފުންގެ އަސާސީ މުސާރައިގެ ތެރެއަށް ސާވިސް ޗާޖެއް ނުލެވޭނެ އެވެ.
ރާއްޖޭގެ ގިނަ ރިސޯޓުތަކުން ސާވިސް ޗާޖްގެ ގޮތުގައި އާންމުގޮތެއްގައި ދެނީ 5،000ރ. އާއި 10،000ރ. އާ ދެމެދުގެ އަދަދެއް ކަމަށް މިނިސްޓްރީން އާންމުކޮށްފައިވާ މައުލޫމާތުތަކުން ދައްކަ އެވެ.
މުވައްޒަފުން ހުންނަ ތަނުގެ ކުއްޔާ ކެއުމަށް ވަޒީފާ ދޭ ފަރާތުން ކުރާ ހަރަދު އަސާސީ މުސާރައިގެ ތެރޭގައި ނުހިމެނެނޭ އެވެ.
މިނިމަމް ވޭޖް ކަނޑައަޅާފައި ވަނީ މުވައްޒަފުން މަސައްކަތްކުރާ ކޮންމެ ގަޑި އިރަކަށް ޖެހޭ މިންވަރު ބަލައިގެންނެވެ. ބޮޑެތި ވިޔަފާރިތަކުގައި މަސައްކަތްކުރާ މުވައްޒަފުންނަށް މަދުވެގެން ގަޑިއިރަކަށް 38.46ރ. ދޭން ޖެހޭނެ އެވެ.
ގަޑި އިރަކަށް ޖެހޭ އަދަދަށް ބަލައި މިނިމަމް ވޭޖް ކަނޑައަޅާފައި ހުރި ވަޒީފާތަކުގައި އިތުރު ގަޑީގައި މަސައްކަތްކޮށް ގަޑި އިރަކަށް ޖެހޭ އަދަދު ދަށް ނަމަ އެ އަދަދު މަދުވެގެން މިނިމަމް ވޭޖުގައި ކަނޑައަޅާފައިވާ އަދަދާ އެއްވަރު ކުރަން ޖެހެ އެވެ.
