"އަހަރެންގެ އުމުރަކަށް، ޅަކަމަކަށް ބަލާނެކަމެއް ނެތޭ. ތިއެއް އެނގޭނީ ކަމެއް ޖެހުނީމައޭ. ކަމެއްޖެހޭ ދުވަހަކުން ކަލޯމެން ބޮޑެތި މީހުންނަށް ނުކުރެވޭނެ މަސައްކަތެއް އަހަރެން ކުރާނަމޭ. އެކަހަލަ ދުވަހެއް އަތުވެއްޖެ ނަމަ، ކަލޭމެނަށް އެކަން ދައްކާލާނަމޭ، ބަލަން ތިބޭށޭ،"
އިސްވެދިޔައީ 3 ނޮވެމްބަރުގެ ބަތަލު ޝަހީދު ހުސައިން އާދަމް ވިދާޅުވި ކަމަށް އިތުބާރުހުރި މަސްދަރުތަކުން ނަގުލުކުރަމުން އަންނަ އިބާރާތެކެވެ. ވާރޭވިލާ އަލީ ހުސައިން "މިހާރު ދިވެހިން 3 ނޮވެމްބަރު 1988 ދަންނަނީ ކިހާވަރަކަށް؟" (2013) ފޮތުގައި ވެސް މި ވާހަކަ މިގޮތަށް ލިޔުއްވާފައި އޮވެ އެވެ. މި ނޫން މަސްދަރުތަކުންވެސް އަޅުގަނޑު މިވާހަކަ އަޑުއެހީމެވެ.
ރަށްޓެހިން ދިމާކުރުމުގެ ގޮތުން ބުނެލާ ބަސްތަކަށް ދެމުން ދިޔަ އެ ރައްދަކީ ހަމައެކަނި ދުލުކުރިން ބުނެލާ ވާހަކައެއް ނޫންކަން 3 ނޮވެމްބަރުގައި ޝަހީދު ހުސައިން އާދަމް ސާބިތުކޮށްދެއްވި އެވެ. ދުޝްމަނުންގެ ހަމަލާތަކުގެ ކުރިމަތީގައި އެންމެ ތަންފުކެއް ވެސް ދޫދިނުމެއް ނެތި ހަމަލަދެއްވި އެވެ. ފަސްޖެހުމެއް ނެތި ކުރިމަތިލައްވައި، ސިފައިންގެ މަރުކަޒުގެ ތެރޭގައި ތިބި ސިފައިންނަށް ނޭވާލާނޭ ޖާގަ ތަނަވަސްކޮށްދެއްވި އެވެ. ދުޝްމަނުން ހީނުކުރާ ފަދައިން ކުއްލި ސިހުމާއި ބިރުވެރިކަން ދުޝްމަނުން ދެއްވުމަށްފަހު ދީނާއި ގައުމުގެ ހައްގުގައި ފުރާނައިން ގުރުބާންވެވަޑައިގަތެވެ.
ތަފާތު ފިލާވަޅުތައް ލިބިގެންދާ މިހާދިސާގެ ފިލާވަޅުތަކުގެ އެއް ކުރިބޯއްޓަކީ ހިތްވަރުގަދަކަމެވެ. ހިތްވަރުގަދަކަމަކީ މާތް ސިފައެކެވެ. ރީތި ސިފަތަކުގެ މައްޗަށް ނަފުސު ތަރުބިއްޔަތުކުރުމާ ދިމާއަށް ގެންދާ، ނުބައި ސިފަތަކުން ނަފުސު ދުރުކޮށްދޭ ބާރެކެވެ. ހިތްވަރުގަދަކަމަކީ، އިސްލާމީ އަހުލާގުގެ ތެރޭގައި ހިމެނޭ އެންމެ އިއްޒަތްތެރި ސިފަ އެވެ. ހިތްވަރުގަދަ ކަމަކީ އިންސާނީ ދަރިފަސްކޮޅު ދެމިއޮތުމުގެ ސިއްރެވެ. އިންސާނީ ތަރައްގީއާއި ހަމަޖެހުން ދެމެހެއްޓެމުން ދިއުމުގެ ސަބެބެވެ.
އަންފާލް ސޫރަތުގެ 45 ވަނަ އާޔަތުގައި މާތް ﷲ އަންގަވަ އެވެ. އޭ އީމާންވެއްޖެ މީސްތަކުންނޭވެ! ތިޔަބައިމީހުން ހަނގުރާމަވެރި ބަޔަކާ ބައްދަލުވެއްޖެނަމަ ސާބިތުވެ ތިބޭހުށިކަމެވެ!
ދަސްކުރަންވީ ވަރަށް މުހިންމު ފިލާވަޅެކެވެ. ހަނގުރާމަވެރި ބަޔަކާ ބައްދަލުވުމުން ސާބިތުވެ ތިބުމެވެ. ކެތްތެރިކަންމަތީ ޖިހާދު ކުރުމެވެ. ދީނާއި ގައުމު ސަލާމަތްކުރުމެވެ. އާޔަތުގައި އޮތީ ހަނގުރާމަވެރި މީހުންގެ ވާހަކަ އެވެ. ފުރަތަމަ ނަޒަރުންވެސް ބުއްދިއަށް އަންނަ ހަތިޔާރު އެޅި އަދާވާތްތެރިންގެ ވާހަކަ އެވެ. ނަމަވެސް ހިތްވަރުގަދަކަންމަތީ ސާބިތުވުމަކީ ހަމައެކަނި ހަތިޔާރު އެޅި ޖަމާއަތްތަކާ ދެކޮޅަށް އޮންނާންވީ ކަމެއް ނޫނެވެ.
މާތް ނަބިއްޔާ ހަދީސް ކުރައްވާފައި ވެއެވެ. ތިޔަބައިމީހުންކުރެ މީހަކަށް ނުބައިކަމެއް ފެނިއްޖެނަމަ ތިޔަބައިމީހުންގެ އަތުން އެކަމެއް މަނާކުރާށެވެ. އަތުން މަނާކުރެވޭނެ ފަދައެއް ނެތްނަމަ ދުލުން މަނާކުރާށެވެ. އެފަދަ ނެތްނަމަ ހިތުން މަނާކުރާށެވެ. އަތުން މަނާކުރުމަށް އެވަރުގެ މަގާމާއި ކުފޫ ހޯދުމަށް ބޭނުންވަނީ ހިތްވަރެވެ. ދުލުން މަނާކުރުމަށް އެފަދަ މަގާމާއި ކުފޫ ހޯދުމަށް ބޭނުންވަނީ ހިތްވަރެވެ. ހިތުން ވެސް މަނާކުރެވޭނީ ހިތްވަރަކާއި ސާބިތުކަމެއް ހުރެގެންނެވެ.
ހިތްވަރުގަދަކަމަކީ އުސޫލުތަކާއި އަގުކުރުންތަކުގެ މަތީގައި އަބަދުވެސް ސާބިތު ވުމެވެ. ހައްގު ބަސް ބުނުމާއި ހައްގަށް އަމަލުކުރުމާއި ހައްގު މަތިވެރިކުރުމުގައި ފަހަތަށް ނުޖެހި ދެމިހުރުމެވެ. މާތް ﷲ އަށް އޮންނާންވީ ވަރުގަދަ އީމާންކަމަކީ އެއީ އެވެ. އުޑުތަކާއި ބިން އެގޮތުގައި ލެހެއްޓެވުނީ ހައްގުގެ މަގުންނެވެ. ރަށްތަކުގައި ހެޔޮކަން ފެތުރިދަނީ ހައްގުގެ ސަބަބުންނެވެ. އަމާންކަން އާންމުވެ އަޅުތަކުންނަށް އުފާވެރިކަން ލިބެނީ ހައްގުގެ ޒަރީއާއިންނެވެ. ނަފުސުތައް ތާހިރުވެ ލޯތްބާއި އޯގާތެރިކަން ފެތުރެނީ ހައްގު ނެގެހެއްޓުމުގެ ސަބަބުންނެވެ. ހިތްވަރު ގަދަކުރާންވީ ހައްގުގެ މަގުގައި ދެމިހުރުމަށެވެ.
ރަނގަޅަށް ވިސްނާ ފިކުރުކޮށްގެން ބަލައިފިނަމަ ފެންނާނެ އެވެ. ދިވެހިރާއްޖެ މަތީން ނަގާފައިވަނީ "ހަނގުރާމައިގެ ވިލާގަނޑުތަކެކެވެ". މަސްތުވާތަކެތީގެ ސިފައިގަ އެވެ. މާރާމާރީއާއި އަނިޔާވެރި އަމަލުތަކުގެ ސިފައިގަ އެވެ. ދީނީ އަދި ސިޔާސީ ހެދުމުގައި ފެތުރެމުންދާ ހަރުކަށި ފިކުރުތަކުގެ ސިފައިގަ އެވެ. އެ ވިލާގަނޑުތައް ކެރިއަށްވެ، ތޫފާނަކަށް ވާން އެ ދަނީ ވާގިވެރިވާނޭ ކޮރަޕްޝަނާއި ފަސާދައިގެ ބަރުހަތިޔާރާއިވެސް އެކުގަ އެވެ.
ނޮވެމްބަރު މަހުގެ ތިންވަނަ ދުވަހާއި، އޭގެ ކުރިންވެސް ރާއްޖެއަށް ލައިގަތް ކޮންމެ މުސީބާތަކުން މި ގައުމު ސަލާމަތްވީ، ޝަހީދު ހުސައިން އާދަމް ފަދަ ބަތަލުން ދެއްކެވި ހިތްވަރުގެ ސަބަބުންނެވެ. މިއަދުގެ ދުނިޔޭގެ ގިނަ ވަބާތަކުގެ ބަލާވެރިކަން ރާއްޖެއަށްވެސް ކުރިމަތިވެފައި އޮތް މިދަނޑިވަޅުގައި އެފަދަ ހިތްވަރު ދައްކާނޭ ދިވެހި ދަރިން ގައުމަށް އެބަ ބޭނުންވެ އެވެ. އިންސާނީ އެންމެހައި ރީތި ސިފަތަކެއް ރައްކާތެރިކޮށްދޭ ހިތްވަރުގަދަކަމުގެ ސިފަ ހުރި ދިވެހި ދަރިންނެވެ. ހިނގަހިނގާ އޮންނަ ވިސްނުމެއްގެ މަސްދަރުން ނުކުންނަ ހިތްވަރުގަދަ ކަމުގެ ސިފައިގެ ކުރިމަތީގައި އެ ވަބާތަކާއި މުސީބާތްތަކަށް ޖެހޭނީ ހަތިޔާރު ބަހައްޓާށެވެ. ލައިގެންފައި މިއޮތް ހާލަތުގައި ކަށިން ހިތްވަރު ނެރެ، އަޅުގަނޑުމެންގެ ހުރިވަރު ދައްކާލަންވީ ވަގުތަކީ މިއީ އެވެ.
