ދުބާއީ (ނޮވެމްބަރު 4) - ޓީ20 ކްރިކެޓް ވޯލްޑް ކަޕްގައި މިރޭ ސްރީ ލަންކާ އަތުން ބަލިވެ އެންމެ ފަހުގެ ޗެމްޕިއަން ވެސްޓް އިންޑީސް ކެޓިއިރު، ބަންގްލަދޭޝްގެ މައްޗަށް ބޮޑު މޮޅެއް ހޯދައި އޮސްޓްރޭލިއާ އިން ސެމީ ފައިނަލުގެ އުއްމީދު ދަމަހައްޓައިފި އެވެ.
ލަންކާ ފުރަތަމަ ހަަތަރު މެޗުގެ ތެރެއިން ތިން މެޗުން ބަލިވުމުން މިރޭ ގްރޫޕް ފަހު މެޗަށް ނުކުތްއިރު ވެސް އޮތީ ކަޓައިފަ އެވެ. އެކަމަކު، އެ ޓީމުން ވަނީ 20 ލަނޑުން ވެސްޓް އިންޑީސް ބަލިކޮށް އެ ޓީމު ކަޓުވާލައިފަ އެވެ. އެންމެ މެޗަކުން ވެސް މޮޅެއް ނުލިބި ބަންގްލަދޭޝް ކެޓިއިރު، މިރޭ އެ ޓީމުގެ މައްޗަށް އޮސްޓްރޭލިއާ އިން ކުރިހޯދީ އަށް ވިކެޓުންނެވެ.
ޓޮސް ދިމާވުމުން އޮސްޓްރޭލިއާ އިން ނިންމީ ފީލްޑް ކުރާށެވެ. ބަންގްލަދޭޝްގެ ހުރިހާ ކުުޅުންތެރިން 15 އޯވަރުގެ ތެރޭގައި ނުބައިވިއިރު، އެ ޓީމަށް ހެދުނީ އެންމެ 73 ލަނޑެވެ. އޮސްޓްރޭލިއާ ޓީމަށް އެންމެ މޮޅު ކުޅުމެއް ދެއްކީ ފަސް ވިކެޓް ނެގި އެޑަމް ޒަމްޕާ އެވެ. ބަންގްލަދޭޝް ޓީމުގެ ބެޓްސްމަން ޝަމީމް ހޮސައިން ވަނީ 18 ބޯޅައިން 19 ލަނޑު އެއްކޮށްފަ އެވެ.
ޖަވާބުގައި ކުޅެން އަރައި އޮސްޓްރޭލިއާ އިން ވަނީ 6.2 އޯވަރުގެ ތެރޭގައި ދެ ކުޅުންތެރިން ނުބައިވެގެން 78 ލަނޑު ހަދައިފަ އެވެ. އޮސްޓްރޭލިއާ އަށް އެންމެ ރަނގަޅު ކުޅުމެއް ދެއްކީ 40 ލަނޑު ހެދި އާރޮން ފިންޗާއި 18 ލަނޑު ހެދި ޑޭވިޑް ވޯނާ އެވެ. މީގެ ތެރެއިން ފިންޗް ވަނީ ދެ ފަހަރު ހަތަރަކަށް އަދި ހަތަރު ފަހަރު ހަޔަކަށް ޖަހައިފަ އެވެ.
އޮސްޓްރޭލިއާ ކުޅުންތެރިން މެޗުގެ ތެރެއިން އުފާފާޅުކުރަނީ.
އޮސްޓްރޭލިއާއާ ކުޅެން ޖެހޭ މެޗު އޮއްވައި ވެސްޓް އިންޑީސް މިރޭ ކެޓީ ލަންކާއާ ދެކޮޅަށް ރަނގަޅަށް ނުކުޅެވިގެންނެވެ.
ޓޮސް ދިމާވުމުން ވެސްޓް އިންޑީސް އިން ނިންމީ ފީލްޑް ކުރާށެވެ. ލަންކާ އިން 20 އޯވަރުގެ ތެރޭގައި ތިން ކުޅުންތެރިން ނުބައިވެގެން ވަނީ 189 ލަނޑު އެއްކޮށްފަ އެވެ. ޖަވާބުގައި ކުޅެން އަރައި 20 އޯވަރު ތެރޭގައި ވެސްޓް އިންޑީސްގެ އަށް ކުޅުންތެރިން ނުބައިވެގެން ހެދުނީ 169 ލަނޑެވެ. އެހެންވެ، އެ ޓީމުން ތަށި ދިފާއުކުރަން ކުރި ދަތުރު ހިތްދަތި ގޮތަކަށް ނިމުނީ އެވެ.
ލަންކާ ޓީމަށް އެންމެ ރަނގަޅު ކުޅުމެއް ދެއްކީ ޕަތޫމް ނިސަންކާ އާއި ޗަރިތު އަސަލަންކާ އެވެ. އަސަލަންކާ ވަނީ 41 ބޯޅައިން 68 ލަނޑު ހަދައިފަ އެވެ. އަދި ނިސަންކާ އަށް 41 ބޯޅައިން ހެދުނީ 51 ލަނޑެވެ. ވެސްޓް އިންޑީސް ބަލިވި ނަމަވެސް އެ ޓީމުގެ ޝިމްރޮން ހިޓްމަޔާ ވަނީ ނުބައިނުވެ މޮޅަށް ކުޅެފަ އެވެ. އޭނާ ވަނީ 54 ބޯޅައިން 81 ލަނޑު ހަދައިފަ އެވެ. އަށް ފަހަރު ހަތަރަކަށް ޖެހިއިރު، ހަތަރު ފަހަރަށް ހަޔަކަށް ޖެހި އެވެ.
މިރޭގެ ނަތީޖާތަކާ އެކު ގަދަ ދެ ޓީމު ތެރޭގައި ހިމެނިގެން ސެމީ އަށް ދިއުމުގެ ދޮރު މި ގްރޫޕްގެ ތިން ޓީމަކަށް އޮތީ ހުޅުވިފަ އެވެ. އެއީ އަށް ޕޮއިންޓާ އެކު އެއް ވަނައިގައި އޮތް އިންގްލެންޑާއި ދެ ވަނައިގައި ހަ ޕޮއިންޓް ހޯދައިގެން އޮތް އޮސްޓްރޭލިއާ އަދި ތިން ވަނައިގައި އޮތް ދެކުނު އެފްރިކާ އަށެވެ. ދެކުނު އެފްރިކާ އިން ވެސް ވަނީ ހަ ޕޮއިންޓް ހަމަކޮށްފަ އެވެ.
ގްރޫޕްގެ ފަހު މެޗުތަކުގައި ހޮނިހިރު ދުވަހު އޮސްޓްރޭލިއާ ކުޅޭނީ ވެސްޓް އިންޑީސްއާ އެވެ. އަދި އިންގްލެންޑް ބައްދަލުކުރާނީ ދެކުނު އެފްރިކާއާ އެވެ. މި ގްރޫޕްގެ ހަތަރެއްގައި އޮތް ލަންކާ އާއި ފަހެއްގައި އޮތް ވެސްޓް އިންޑީސް އަދި އެންމެ ފުލުގައި އޮތް ބަންގްލަދޭޝް ވަނީ ކަޓައިފަ އެވެ.
