ސައުދީ އަރަބިއްޔާ އާއި ގަލްފުގެ އެހެން ގައުމުތަކުން ލުބްނާނާ އެކު އަލުން ގުޅުން ގާއިމްކުރުމަށް އެމެރިކާ އިން ގޮވާލައިފި އެވެ.
"ލުބްނާން ރައްޔިތުންނަށް ދިމާވެފައިވާ ކާރިސާ އިން އަރައިގަތުމަށް އެހީވާން ބޭނުން ނަމަ ޑިޕްލޮމެޓިކް މަގުތައް އޮންނަން ވާނީ ހުޅުވިފައި،" ސްޓޭޓް ޑިޕާޓްމަންޓުގެ ތަރުޖަމާނު ނެޑް ޕްރައިސް ވިދާޅުވި އެވެ.
ސްކޮޓްލޭންޑުގެ ގްލާސްގޯގައި މިހާރު ކުރިއަށްދާ މޫސުމީ ބަދަލާ ގުޅޭ އދ. ގެ ބައްދަލުވުން ކޮޕް26 ގެ ހަވާސާގައި އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން ވަނީ ލުބްނާންގެ ބޮޑު ވަޒީރު ނަޖީބް މިކާތީއާ ބައްދަލުކުރައްވާފަ އެވެ.
ބްލިންކެން ވިދާޅުވީ ލުބްނާނަށް ދިމާވެފައިވާ އިގްތިސާދީ ކާރިސާ އިން އަރައިގަތުމަށް އެމެރިކާ އިން އެހީވާނެ ކަމަށެވެ.
މިދިޔަ ހުކުރު ދުވަހު ސައުދީ އަރައްބިޔާ އިން ވަނީ އެ ގައުމުގައި ހުންނަ ލުބްނާންގެ ސަފީރު އަނބުރާ ގައުމަށް ދިޔުމަށް 48 ގަޑިއިރުގެ މުހުލަތެއް ދީ، ލުބްނާނުން މުދާ އެތެރެ ކުރުން ހުއްޓާލާފަ އެވެ.
ކުވެއިތާއި ބަހްރެއިނުން ވެސް އެފަދަ ފިޔަވަޅުތައް އަޅާފައި ވާއިރު، ޔުނައިޓެޑް އަރަބް އެމިރޭޓްސް (ޔޫއޭއީ) ގެ ލުބްނާންގައި ތިބި ހުރިހާ ޑިޕްލޮމެޓުން ވަނީ އަނބުރާ ގައުމަށް ގެންގޮސްފަ އެވެ.
ސުންނީންގެ ބާރު ހިނގާ އެ ހަތަރު ގައުމުން ފިޔަވަޅުތައް އެޅީ އިރާނުގެ އެހީއާއެކު ހަރަކާތްތެރިވާ ލުބްނާންގެ ޝިއައީ ހިޒްބުﷲ ޖަމާއަތުގެ ނުފޫޒު ގަދަވަމުންދާ މައްސަލައިގަ އެވެ.
އޭގެ އިތުރުން މިދިޔަ އޯގަސްޓު މަހު އިންފޮމޭޝަން މިނިސްޓަރު ޖޯޖް ކޯޑާހީ އެ މަގާމާ ހަވާލުވެވަޑައިގެންނެވުމުގެ ކުރިން ދެއްކެވި ވާހަކަތަކާ މެދު ވެސް ސައުދީ އަރަބިއްޔާ އިން ހިތްހަމައެއްނުޖެހެ އެވެ.
ކޯޑާހީ ދެއްވި އިންޓަވިއުއެއްގައި ވިދާޅުވީ ސައުދީ އަރަބިއްޔާގެ އަސްކަރީ ކޯލިޝަނުގެ ޝިކާރައަކަށް ވެފައިވާ ޔަމަނުގެ ހޫތީން ހަމަލާދެނީ އަމިއްލަ ދިފާއުގައި ކަމަށެވެ. އިރާނުގެ އެހީއާއެކު އުޅޭ ހޫތީން ހަނގުރާމަ ކުރަނީ ބޭރު ހަމަލާތަކާ ދެކޮޅަށް ކަމަށް ވިދާޅުވި އެވެ.
ޕްރައިސް ވިދާޅުވީ އެ ވާހަކަތަކާ ގުޅިގެން ކޯޑާހީ މަގާމުން ވަކިކުރަން ޖެހޭނެ ކަމާ މެދު އެމެރިކާ އިން ވަކި ވިސްނުމެއް ނުގެންގުޅޭ ކަމަށާއި ނަމަވެސް ސައުދީ އަރަބިއްޔާ އިން ފާހަގަކުރާ ކަންބޮޑުވުން ބަލައިގަންނަ ކަމަށެވެ.
"ހޫތީންނަކީ ޔަމަނުގެ ރައްޔިތުންނަށް އިތުރު އުނދަގުލާއި ވޭން ކުރިމަތި ކުރުވި ބަޔެއް ނޫން ކަމަށް ދައްކަން ފަތުރާ ވާހަކަތަކަކީ އަޅުގަނޑުމެން ބަލައިގަންނަ ވިސްނުމެއް ނޫން،" ޕްރައިސް ވިދާޅުވި އެވެ.
