ދޯހާ (ނޮވެމްބަރު 4) - ބާސެލޯނާގެ ކޯޗުކަމާ ހަވާލުވާން މި ވަގުތު ލިބިފައި އޮތް ހުށަހެޅުން ގަބޫލުކުރަން ތައްޔާރަށް ހުރި ކަމަށް އެ ކްލަބުގެ ލެޖެންޑް، ޒަވީ ހެނާންޑޭޒް ބުނެފި އެވެ.
މި ވަގުތު ގަތަރުގެ އަލް ސާދުގެ ކޯޗަކަށް ހުރި ޒަވީ ،41، އަށް ކޯޗުކަން ހަވާލުކުރަން ބާސެލޯނާ އިން ބޭނުންވެ އެވެ. ބާސެލޯނާގެ އޮފިޝަލުންގެ ޓީމެއް މި ވަގުތު އަންނަނީ ޒަވީގެ ޑީލްގެ ކަންތައްތައް މަޝްވަރާކުރަން ގަތަރުގައި ހަރަކާތްތެރިވަމުންނެވެ. އެކަމަކު، ޒަވީ ދޫނުކުރާނެ ކަމަށް އަލް ސާދުން ވަނީ ދާދި ފަހުން ބުނެފަ އެވެ.
ބާސެލޯނާގެ ކޯޗުކަމުން ރޮނާލްޑޯ ކޫމަން ވަކިކޮށް، އެ މަގާމު ވަގުތީ ގޮތުން ހަވާލުކޮށްފައިވަނީ އެ ޓީމުގެ ޔޫތު ކޯޗު އަދި ކުރީގެ ކުޅުންތެރިޔާ ސެރްޖީ ބަރްހުއާންއާ އެވެ.
"ބާސާއާ އަހަރެން މަޝްވަރާ ކުރަމުންދާތާ ދުވަސްކޮޅެއް ވެއްޖެ. ހުުރިހާ ކަމެއް ވެސް އޮތީ ހަމަޖެހިފައި. ކްލަބަށް އެނގޭ އަހަރެން ބޭނުންވާ ގޮތް. އަހަރެން މި އުންމީދުކުރަނީ ވަރަށް އަވަހަށް ހުރިހާ ކަމެއް ހަމަޖެހޭނެ ކަމަށް،" ޒަވީ ބުންޏެވެ.
ބާސެލޯނާ އަށް 779 މެޗު ކުޅެ، އެ ޓީމާއެކު 25 ތަށި ހޯދާފައިވާ ޒަވީ އެ ޓީމު ދޫކޮށް އަލް ސާދަށް ބަދަލުވީ 2015 ވަނަ އަހަރެވެ. ޒަވީގެ ކެރިއަރުގެ ފަހު ހަތަރު އަހަރު އޭނާ ކުޅުނީ އަލް ސާދަށެވެ. ކުޅުން ހުއްޓާލުމަށް ފަހު، އަލް ސާދުގެ ކޯޗުކަމާ ޒަވީ ހަވާލުވީ 2019 ވަނަ އަހަރެވެ. މިދިޔަ ސީޒަންގެ ގަތަރު ލީގު އަލް ސާދުން ކާމިޔާބުކުރީ ޒަވީގެ އިރުޝާދުގެ ދަށުންނެވެ.
އަލް ސާދުގެ ޗީފް އެގްޒެކުޓިވް ތުރްކީ އަލް އަލީ ކުރިން ބުނީ ޒަވީ ދޫކޮށްލުމުގެ އެއްވެސް ވިސްނުމެއް އެ ކްލަބުން ނުގެންގުޅޭ ކަމަށެވެ.
ޒަވީ ބުނީ ބާސެލޯނާ އާއި އަލް ސާދާ ދެމެދު މަޝްވަރާތައް ކުރިއަށްދާ ކަމަށާއި އޭނާ ބޭނުންވާ ގޮތަށް ކަންތައްތައް ނިމޭނެ ކަމަށް އުންމީދުކުރާ ކަމަށެވެ. މީގެ ކުރިން ދެ ފަހަރެއްގެ މަތިން ބާސެލޯނާގެ ހުށަހެޅުން ދޫކޮށްލަން ޒަވީ ނިންމީ އޭރު އޮތް އެ ކްލަބްގެ މެނޭޖްމަންޓާ މެދު ހިތްހަމަނުޖެހޭތީ އެވެ. އެކަމަކު، މިހާރު ބާސެލޯނާގެ ރައީސަކަށް ހުރި ޖޮއާން ލަޕޯޓާ އާއި ޒަވީގެ ގުޅުން ރަނގަޅެވެ.
