ދައުލަތުގެ މީޑީއާ، (ޕީއެސްއެމް)ގެ ރޭޑިއޯ އިމާރާތް މަރާމާތު ކުރުމަށް އަމިއްލަ ކޮންޓްރެކްޓަރެއް ކަމަށްވާ ޖޭއެމްޖޭ އިންވެސްޓްމަންޓްއިން ކުރި މަސައްކަތަށް ފައިސާ ނުދައްކާ ހުރި ކަމަށް ބުނެ އުފުލާފައިވާ ދައުވާ ސިވިލް ކޯޓުގައި ސާބިތުވެ، 3.3 މިލިއަން ރުފިޔާ ދެއްކުމަށް ހުކުމްކޮށްފި އެވެ.
ޖޭއެމްޖޭގެ ވެރިޔާ ޔާސިރާ ޔޫސުފް ފަރާތުން މި ދައުވާ ކުރީ ރޭޑިއޯ އިމާރާތް މަރާމާތު ކުރުމަށް ފަހު ފޮނުވި އިންވޮއިސްތަކަށް ޕީއެސްއެމް އިން ފައިސާ ނުދައްކާ ކަމަށް ބުނެ އެވެ.
ކޯޓުގައި ޕީއެސްއެމްގެ ވަކީލުން ވިދާޅުވީ، އިންވޮއިސްތަކުގައި ބަޔާންކޮށްފައިވާ މަސައްކަތްތައް ކުރިއަށް ގެންގޮސްފައިވާއިރު، އެ މަސައްކަތް ޖޭއެމްޖޭއިން ކުރިއަށް ގެންގޮސްފައިވާކަން ސާބިތުކުރުމަށް އެއްވެސް ލިޔެކިޔުމެއް ނެތް ކަމަށެވެ. އަދި އިންވޮއިސްތަކުގައި ހުރި ރޭޓުތައް އާންމު ގޮތެއްގައި މިފަދަ މަސައްކަތްތަކަށް ނަގާ ރޭޓަށްވުރެ ބޮޑު ކަމަށް ވެސް ޕީއެސްއެމުން ބުނެ އެވެ.
ޕީއެސްއެމުން އެއްބަސްވީ އެ މަސައްކަތަކީ ޖޭއެމްޖޭއިން ކޮށްފައިވާ މަސައްކަތެއްކަން ކޯޓުގައި ސާބިތުވެއްޖެނަމަ، ދެފަރާތުން އެއްބަސްވާ ހައްލެއް ހޯދުމަށް މަޝްވަރާކުރުމަށެވެ. ޖޭއެމްޖޭގެ ފަރާތުން ދެ ހެކިވެރިޔަކު ހެކިބަސް ދެމުން ބުނީ އެ މަސައްކަތް ކޮށްފައިވަނީ އެ ކުންފުނިން ކަމަށެވެ.
އެ ހެކިންގެ ހެކިބަސް ނެގުމުން ޕީއެސްއެމްއިން ބުނީ، އެ މަސައްކަތް ޖޭއެމްޖޭއިން ކުރި ކަމަށް މިހާރު ގަބޫލުކުރެވޭ ކަމަށާއި، ނަމަވެސް އެ ރޭޓްތަކާ މެދު ދެބަސްވެފައިވާ ކަމަށެވެ.
ސިވިލް ކޯޓުން އާދީއްތަ ދުވަހު ކުރި ހުކުމުގައި ބުނެފައިވަނީ ހެކިބަސް ދިން މީހުންނާއި ޕީއެސްއެމްގެ އަމިއްލަ އެޑްމިޝަން އިން ޖޭއެމްޖޭއިން ރޭޑިއޯ އިމާރާތުގެ މަސައްކަތް ކުރިކަން ސާބިތުވާ ކަމަށެވެ. އެހެންވެ, މި މައްސަލާގައި ގާޒީ ފައްޔާޒް ޝާތިރު ހުކުމް ކުރެއްވީ ޕީއެސްއެމްއަށް ޖޭއެމްޖޭއިން ފޮނުވި ހަ ބިލަށް އަރާ ޖުމްލަ އަދަދު ކަމަށްވާ، 3.3 މިލިއަން ރުފިޔާ ހަތަރު މަސް ދުވަސްތެރޭ ދެއްކުމަށެވެ.
