މުދައްރިސުންނަށް ކުރިމަތިވެފައިވާ މައްސަލަތައް ދަނެގަތުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހަ މެމްބަރުންގެ ޓީމެއް އެކުލަވާލައި، މަައްސަލައާ ގުޅޭ ބޮޑު ދިރާސާއެއް ކުރުމުގެ މަސައްކަތް ހަވާލު ކުރައްވައިފި އެވެ.
"ތަޢުލީމީ ދާއިރާގެ ޓީޗަރުންނަށް ކުރިމަތިވެފައިވާ މައްސަލަތައް ދިރާސާ ކުރުމުގެ ރީސަރޗް ގުރޫޕު" އުފައްދާފައި މި ވަނީ އެފަދަ ދިރާސާއެއް ކުރައްވާނެ ކަމަށް ރައީސް ސޯލިހު މިދިޔަ އޮކްޓޯބަރު މަހު ވިދާޅުވުމަށްފަހު އެވެ.
ރައީސް އެކުލަވާލެއްވި ހަ މެމްބަރުންގެ ގްރޫޕުގައި އެޑިއުކޭޝަން ޕޮލިސީ އެންޑް ޕްލޭނިންގެ ދާއިރާ އާއި ހިއުމަން ރިސޯސާސް ދާއިރާ އާއި، ސޯޝިއޮލޮޖީ އާއި ޓްރެއިނިންގެ ދާއިރާ އާއި ފައިނޭންސް އަދި ތަޢުލީމީ ދާއިރާގެ ތަޖުރިބާކާރުން ހިމެނޭ ކަމަށް ރައީސް އޮފީހުން ބުނެ އެވެ.
ރިސާޗް ގްރޫޕުގެ މެމްބަރުންނަކީ:
- ޑރ. އަހުމަދު އަލި މަނިކު (އެޑިޔުކޭޝަން ޕޮލިސީ އެންޑް ޕްލޭނިންގެ ދާއިރާ)
- ޑރ. އަލީ ނަޖީބު (ހިޔުމަން ރިސޯސާސްގެ ދާއިރާ)
- ޑރ. އައިޝަތު ޝަފީނާ (ސޯޝިއޮލޮޖީގެ ދާއިރާ)
- އާމިނަތު ޒުބައިރު (ޓްރެއިނިންގެ ދާއިރާ)
- އަބްދުﷲ ޒަކަރިއްޔާ (ފައިނޭންސްގެ ދާއިރާ)
- އަބްދުﷲ ރަޝީދު (ތައުލީމީ ދާއިރާ)
ރައީސް އެކުލަވާލެއްވި ދިރާސާ ކޮމެޓީގެ މެމްބަރުންނާއެކު އެމަނިކުފާނުގެ ނައިބު ފައިސަލް ނަސީމް ބައްދަލު ކުރައްވައި މައްސަލައާ ގުޅޭ ގޮތުން ފުޅާ ދާއިރާއެއްގައި މަަޝްވަރާ ކުރެއްވި ކަމަށް ރައީސް އޮފީހުން ބުނެ އެވެ.
އެ ގްރޫޕުގެ މައިގަނޑު މަސައްކަތަކަށްވާނީ ތައުލީމީ ދާއިރާއަށް ކުރިމަތިވެފައިވާ ބޮޑެތި މައްސަލަތައް ދެނެގަތުމާއި ސަރުކާރު ސްކޫލްތަކުގައި މަސައްކަތްކުރާ މުދައްރިސުން އެ ފަންނުގައި ދެމިތިބުމާއި ކުރިއަށްދިއުމަށް ކުރިމަތިވެފައިވާ ދަތިތައް ދަނެގަތުން ކަމަށް ރައީސް އޮފީހުން ބުންޏެވެ. އަދި އެ މައްސަލަތައް ހައްލު ކުރާނެ ގޮތް ހޯދުމަކީ ވެސް އެ މެމްބަރުންގެ ޒިންމާއެއް ކަމަށް ރައީސް އޮފީހުން ބުންޏެވެ.
ރީސަރޗް ގުރޫޕުން ހަދާ ދިރާސާ މެދުވެރިކޮށް އެ ދާއިރާއަށް ކުރިމަތިވެފައިވާ އެކިއެކި މައްސަލަތަކާއި ދަތިތައް ހައްލު ކުރުމަށް ސަރުކާރުން ކުރަމުންދާ މަސައްކަތްތަކަށް ބޮޑެތި ކުރިއެރުންތަކެއް ލިބޭނެ ކަމުގައި [ނައިބު ރައީސް] ދެކެވަޑައިގަންނަވާ،" ރައީސް އޮފީހުން ނެރުނު ބަޔާނެއްގައިވެެ އެވެ.
އޭލެވެލް އިމްތިހާނުން ވަނަ ލިބުނު ދަރިވަރުންނަށް އިނާމު ދިނުމަށް އޮކްޓޯބަރު 18، ގައި ބޭއްވި ޖަލްސާއެއްގައި ރައީސް ވިދާޅުވީ ޓީޗަރުންނަށް ދިމާވެފައިވާ މައްސަލަތައް ހައްލު ކުރުމަށް އެމަނިކުފާނުގެ އެޑްވައިޒަރު ޑރ. މުސްތަފަ ލުތުފީއާ މަޝްވަރާ ކުރެއްވުމުން އެ މައްސަލަ ދަނެގަތުމަށް ދިރާސާއެއް ކުރެއްވުން މުހިންމު ކަމަށް ލަފާއެރުވި ކަމަށެވެ.
"އެހެންކަމުން، ސަރުކާރުން އަޅުގަނޑު މި ގަސްދު ކުރަނީ، ޑޮކްޓަރ މުސްތަފާ އެ ވިދާޅުވި ގޮތަށް، ޓީޗަރުންނާއި ތައުލީމީ ދާއިރާގެ ކަންތައްތައް މިހާރު ހުރި ގޮތާބެހޭ އިލްމީ ދިރާސާއެއް ވަރަށް އަވަހަށް ކުރުމަށް،" އެ ރޭ ރައީސް ވިދާޅުވި އެވެ.
ދިރާސާ ކުރެއްވުމަށް ލަފާ އަރުއްވައި، ޑރ. މުސްތަފާ އެމަނިކުފާނަށް ދެއްވި ކަރުދާހުގައި، 1970 ވަނަ އަހަރުން ފެށިގެން މިއަދާ ހިސާބަށް، "ރާއްޖޭގެ ތައުލީމީ ނިޒާމު ހިނގަމުން އައިގޮތާއި، އޭރު މުދައްރިސުންނަށާއި ޓީޗަރުންނަށް އޮތް އިހްތިރާމާއި ގަދަރާއި ބަދަލުވަމުން އައި ގޮތް" ތަފްސީލުކޮށް ލިޔެފައިވާ ކަމަށް ވެސް ރައީސް ވިދާޅުވި އެވެ.
ބިދޭސީންނާއި ވަގުތީ ޓީޗަރުންނާއެކު މުޅި ރާއްޖޭގައި 9119 މުދައްރިސުން މިވަގުތު އެބަތިއްބެވެ. އެއީ 6498 ދާއިމީ ދިވެހި މުވައްޒަފުންނާއި ބިދޭސީ 1730 މީހުންނާއި ވަގުތީ 891 މުދައްރިސުންނެވެ.
