މި މަސް ތެރޭގައި އިރާނުގެ ނިޔުކްލިއާ މަޝްރޫއާ ގުޅޭ މަޝްވަރާ އަލުން ފެށުމަށް ތާވަލުކޮށްފައި ވަނިކޮށް އެ ގައުމުގެ ފޮރިން މިނިސްޓަރު ކޮވިޑަށް ޕޮޒިޓިވް ވެއްޖެ އެވެ.
އިރާނުގެ ތަސްނިމް ނިއުސް އެޖެންސީން ބުނީ ފޮރިން މިނިސްޓަރު ހުސެން އާމިރު މިއަދު ކޮވިޑަށް ޕޮޒިޓިވްވެފައިވާ ކަމަށެވެ.
އުމުރުން 57 އަހަރުގެ ޑިޕްލޮމެޓަށް ފޮރިން މިނިސްޓަރުކަން ލިބިވަޑައިގެންނެވީ މިދިޔަ އޯގަސްޓު މަހު ރައީސް އިބްރާހިމް ރައިސީގެ ކެބިނެޓް އެކުލަވާލެއްވި އިރު އެވެ.
އޭނާ އަކީ އަސްކަރީ ސްޓްރެޓެޖިސްޓް ގާސިމް ސުލެއިމާނީގެ ގާތް ބޭފުޅެކެވެ. މިދިޔަ އަހަރުގެ ކުރީކޮޅު އެމެރިކާ އިން ދިން ޑްރޯން ހަމަލާއެއްގައި ސުލެއިމާނީ ވަނީ އަވަހާރަކޮށްލާފަ އެވެ.
އިރާނުގެ ފޮރިން މިނިސްޓްރީން ބުނެފައި ވަނީ ހުސެން އާމިރުގެ ހާލުކޮށް ރަނގަޅު ކަމަށާއި ކަރަންޓީނުގައި ހުންނަވައިގެން ވަޒީފާގެ މަސްއޫލިއްޔަތު އަދާކުރައްވަމުންދާ ކަމަށެވެ.
ޖޯންސް ހޮޕްކިންސް ޔުނިވާސިޓީގެ ތަފާސްހިސާބުން ދައްކާ ގޮތުގައި 2020 ގެ ފެބްރުއަރީން ފެށިގެން އިރާނުގައި 5.9 މިލިއަން މީހުންނަށް ކޮވިޑު ޖެހި 126،000 މީހުން މަރުވެފައިވެ އެވެ.
ދެހާސް ފަނަރައިގައި ސޮއިކުރި ނިޔުކްލިއާ މަޝްރޫއާ ގުޅޭ އެއްބަސްވުން އަލުން ތަންފީޒު ކުރަން ބޭނުންވާ މަޝްވަރާ ކުރިއަށް އޮތް ދެ ތިން ހަފުތާގެ ތެރޭގައި ފަށާނެ ކަމަށެވެ.
