ގދ. ކާޑެއްދޫ އެއާޕޯޓު ވިލާ ކުންފުންޏަށް ދިނުމަށް ސުޕްރީމް ކޯޓުން އަންގާފައިވީ ނަމަވެސް, އެކަން ނުވެ އޮތީ އެއާޕޯޓުގެ އެއްބަސްވުމުގައި ހިމެނޭ ފަޅު ރަށެއް މިހާރު ހިމާޔަތްކޮށްފައި އޮތުމުން ކަމަށް ޓްރާންސްޕޯޓު މިނިސްޓަރު އައިޝަތު ނަހުލާ ވިދާޅުވެއްޖެ އެވެ.
މިއަދު ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް މިނިސްޓަރު އަދި އެ މިނިސްޓްރީގެ އިސް ބޭފުޅުން ވަނީ ހާޒިރުކޮށްފަ އެވެ.
ކޮމިޓީ މެމްބަރު އަދި މަހިބަދޫ ދާއިރާގެ މެމްބަރު އަހުމަދު ތޯރިގު ވަނީ ވިލާ އެއާޕޯޓުގެ މައްސަލައިގައި ސުޕްރީމް ކޯޓުން ކޮށްފައިވާ ހުކުމް ތަންފީޒު ނުކުރެވިގެން އުޅުނީ ކީއްވެގެންތޯ ސުވާލުކުރައްވާފަ އެވެ.
"ސުޕްރީމް ކޯޓުން އެބަ އޮތް ހުކުމްކޮށްފަ، އެއާޕޯޓު ހަވަލުކުރުމަށް ސުޕްރީމް ކޯޓުން ހުކުމްކޮށްފައި އޮއްވާ ކީއްވެތޯ އެ އެއާޕޯޓު އެ ކުންފުންޏާ ހަވާލު ނުކުރެވިގެން މިހާ ގިނަ ދުވަސްވަނީ،؟" މެމްބަރު ތޯރިގު ސުވާލުކުރެއްވި އެވެ.
ޖަވާބުގައި މިނިސްޓަރު ވިދާޅުވީ އެކަން ތަންފީޒު ކުރުމަށް ހުރަސް އެޅިފައިވަނީ އެއާޕޯޓުގެ އެއްބަސްވުމުގެ ދަށުން ކާޑެއްދުއާ ކައިރީގައި އޮންނަ ފަޅު ރަށެއް ވިލާ އެއާއަށް ދިނުމަށް ބަޔާންކޮށްފައިވާތީ ކަމަށެވެ. އެ ރަށަކީ މިހާރު ހިމާޔަތް ކޮށްފައިވާ ރަށެއް ކަމުން އެއާޕޯޓް އެއްބަސްވުމުގައިވާ ގޮތަށް އެ ރަށް ދޫކުރެވެން ނެތް ކަމަށް މިނިސްޓަރު ނަހުލާ ވިދާޅުވި އެވެ.
"އެގްރިމެންޓަށް ބަލާއިރު، އެގްރިމެންޓުގަ އެބަ އިދޭ، ކާޑެއްދޫ އެއާޕޯޓު ހަވާލުކުރާއިރު އެ އެއާޕޯޓާއެކު އެގްރިމެންތުގަ އިން ރަށެއް ވިލާ އެއާއަށް ލިބެން ޖެހޭ ގޮތަށް. އެ ރަށް މިހާރު އޮތީ ސަރުކާރުގެ ބޭނުމަށް ހިމާޔަތް ކުރެވިފަ، އެހެންވިމަ އޭގެ ބަދަލުގަ ދޭނެ ރަށެއް އަދި ކަނޑަނޭޅޭ،" މިނިސްޓަރު ނަހުލާ ވިދާޅުވި އެވެ.
ސުޕްރީމް ކޯޓުގެ ނިންމުން ތަންފީޒުކުރުމަށްޓަކައި ރައީސް އޮފީސް، ފިނޭންސް މިނިސްޓްރީ، ޓޫރިޒަމް މިނިސްޓްރީ އެޓާނީ ޖެނެރަލްގެ އޮފީހަށް ލަފަޔަށް އެދިފައިވާނެ ކަމަށް މިނިސްޓަރު ނަހުލާ ވިދާޅުވި އެވެ.
"އެކަންތައްތައް ވުމުންކަމަށް އަޅުގަނޑަށް ގަބޫލުކުރަނީ ވިލާ އެއާއާ އެ އެއާޕޯޓު ހަވާލުކުރެވެން އޮތީ،" މިނިސްޓަރު ނަހުލާ ވިދާޅުވި އެވެ.
ކާޑެއްދޫ އެއާޕޯޓު ވިލާ އެއާއާ ހަވާލުކޮށްފައިވަނީ 2013 ވަނަ އަހަރު އެވެ. ސަރުކާރުން ވިލާ އެއާއާއެކު އެ އެއާޕޯޓު އޮޕަރޭޓްކުރަން ހަދާފަ އޮތް އެއްބަސްވުން އުވާލީ ސިވިލް އޭވިއޭޝަނުގެ މިންގަނޑުތަކާ ހިލާފްވެގެންކަމަށް ބުނެ ޖުލައި 18، 2017 ވަނަ ދުވަހު އެވެ.
އެ އެއާޕޯޓު ރީޖަނަލް އެއާޕޯޓްސްއާ ހަވާލުކުރީ މާޗް 6، 2017 ވަނަ އަހަރު އެވެ. މިހާރު އެ އެއާޕޯޓު އޮޕަރޭޓްކުރަމުން އަންނަނީ ސަރުކާރުންނެވެ.
އެ މައްސަލަ ވިލާ އެއާއިން ކޯޓަށް ހުށަހެޅިއިރު މި އަހަރުގެ މޭ މަހުގެ 10 ވަނަ ދުވަހު ސުޕްރީމް ކޯޓުން ވަނީ ކާޑެއްދޫ އެއާޕޯޓުގެ އެއްބަސްވުން ސަރުކާރުން އުވާލާފައިވަނީ ބާތިލް އިޖުރާއަތެއްގެ މަތިން ކަމާއި، އެހެންވެ އޭގެ ސަބަބުން ލިބުނު ބަދަލު ހޯދުމަށް ވިލާ އެއާއަށް ވަކި މައްސަލައެއް ސިވިލް ކޯޓަށް ހުށަހެޅިދާނެ ކަމަށް ހުކުމް ކޮށްފަ އެވެ.
މިނިސްޓަރު ނަހުލާ މިއަދުގެ ކޮމިޓީގައި ހިމާޔަތްކޮށްފަ އޮތް ފަޅު ރަށެއްގެ ވާހަކަ ވިދާޅުވި ނަމަވެސް، ކާޑެއްދުއާ އެންމެ ކައިރީގައި އޮންނަ ފަޅު ރަށަކީ ގދ. މާގޮނޑިރެހާ އެވެ. އެ ރަށަކީ ހިމާޔަތްކޮށްފަ އޮތް ރަށެއްކަމެއް އަދި ސަރުކާރުގެ އެއްވެސް އިދާރާއަކުން އެނގޭކަށް ނެތެވެ. އެހެންނަމަވެސް އެ ރަށް އޮންނަ 2015 ވަނަ އަހަރުން ފެށިގެން ފިޝަރީޒް މިނިސްޓްރީގެ ބެލުމުގެ ދަށުގަ އެވެ.
