އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ ދައުލަތުގެ ބަޖެޓަކީ ޕްރޮގްރާމް ބަޖެޓެއް ކަމަށް ފިނޭންސް މިނިސްޓަރު އިބްރާހިމް އަމީރު ބަޖެޓު ބަޔާން އިއްޔެ ދެއްވަމުން ވަނީ ވިދާޅުވެފަ އެވެ.
މިނިސްޓަރު އިއްްޔެ ވިދާޅުވި ގޮތުންނަމަ، އަންނަ އަހަރުގެ ބަޖެޓަކީ އެ މަސައްކަތުގެ ފުރަތަމަ ފިޔަވަހި ކަމަށާއި ދެވަނަ ފިޔަވަހީގައި ޕްރޮގްރާމްތަކުގެ ކީ ޕާފޯމަންސް އިންޑިކޭޓާޒް ކަނޑައެޅިގެންދާނެ އެވެ.
"މީގެ ސަބަބުން ބަޖެޓުން ކުރާ ހޭދައިގެ ނަތީޖާ އެނގި، ދައުލަތުގެ ހިދުމަތްތަކުގެ ފެންވަރު ރަނގަޅުކުރެވި، ހިންގުން ހަރުދަނާވެގެންދާނެ،" މަޖިލީހުގައި އިއްޔެ އަމީރު ވިދާޅުވި އެވެ.
މަޖިލީހުން ދިރާސާކުރަން ފަށަން ތައްޔަރާރުވަމުން އަންނަ ބަޖެޓަށް ބަލާއިރު، ދައުލަތުގެ އެކި އިދާރާތަކާ މަތިކޮށްފައިވާ އާ ޕްރޮގްރާމްތައް ވަނީ ވަކިން ހިމަނައިފަ އެވެ.
އެގޮތުން، އާ ޕްރޮގްރާމްތަކަށް ޖުމްލަ 485.5 މިލިއަން ރުފިޔާ ބަޖެޓުކޮށްފައިވާއިރު، އެންމެ ފާހަގަކޮށްލެވޭ އެއް ޕްރޮގްރާމަކީ މޮނީޓަރިން އެންޑް ކޮންޓްރޯލް ޓެގު ހޯދަން ހޯމް މިނިސްޓްރީގެ ބަޖެޓުގައި ހިމަނާފައިވާކަމެވެ.
އެ ޓެގު ނެތިގެން ޓެރަރިޒަމްގެ އަމަލުތަކާއި ހަރުކަށި ފިކުރު ފެތުރުމުގެ ތުހުމަތު ކުރެވޭ މީހުންގެ މައްޗަށް ނެރެވޭ މޮނީޓަރިން އެންޑް ކޮންޓްރޯލް (މޮނިކޮން) އަމުރު ތަންފީޒުނުކުރެވޭ ކަމުގެ ޝަކުވާ ވަނީ ބޮޑުވެފަ އެވެ.
އެއާއެކު އަންނަ އަހަރު އެންކަލް ބްރެސްލެޓް މޮނީޓަރިން ސިސްޓަމެއް ހޯދަން ހޯމް މިނިސްޓްރީއަށް 2.25 މިލިއަން ރުފިޔާ ކަނޑައަޅާފައިވެ އެވެ. އަދި އޭގެ ކުރިއަށް އޮތް ދެ އަހަރަށް ވެސް އެކަމަށްޓަކައި ޖުމްލަ 9.5 މިލިއަން ރުފިޔާ ކަނޑައެޅުމަށް ނިންމާފައިވާ ކަމަށް ބަޖެޓުން ދައްކަ އެވެ.
ބައެއް އިދާރާތަކަށް މުވައްޒަފުން ނެގުމާއި މުހިންމު މަރާމާތުތައް ފަދަ މަސައްކަތްތައް ވެސް ޕްރޮގްރާމް ބަޖެޓުގައި ހިމަނާފައިވާއިރު، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުގެ ބަޖެޓުގައި ވިޓްނަސް ޕްރޮޓެކްޝަން ސިސްޓަމަކަށް ބައި މިލިއަން ރުފިޔާ އަންނަ އަހަރަށް ވަނީ ހިމަނައިފަ އެވެ.
ފާހަގަކޮށްލެވޭ ބައެއް އެހެން ޕްރޮގްރާމްތައް
ރަށްރަށުގެ ލޭންޑް ޔޫސް ޕްލޭން ތައްޔާރުކުރުން - 9.3 މިލިއަން ރުފިޔާ
- ރިޒޯޓު މުވައްޒަފުންނަށް ލިބޭ ސާވިސް ޗާޖުގެ އޮޑިޓް ކުރުން - 4 މިލިއަން ރުފިޔާ
- މާލޭގައި މިނީ ބަސް އޮޕަރޭޓް ކުރުން - 4.5 މިލިއަން ރުފިޔާ
- ފަތުރުވެރިކަމުގެ ރަންޔޫބިލް ފާހަގަކުރުން - 30 މިލިއަން ރުފިޔާ
- މާލެ އުތުރު ހާބަރު ރީޑިވެލޮޕްކުރުމުގެ މާސްޓާ ޕްލޭން - 2.8 މިލިއަން ރުފިޔާ
- އާބާދީއާއި ދިރިއުޅޭ ތަންތަނުގެ ބޯހިމެނުން - 40.3 މިލިއަން ރުފިޔާ
މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން މެއި6 ގައި ދިން ޓެރަރިސްޓު ހަމަލާއާ ގުޅިގެން ސަލާމަތީ ހިދުމަތްތަކާބެހޭ ކޮމިޓީން ދީފައިވާ ރެކަމެންޑޭޝަންތައް ތަންފީޒުކުރުމަށް ވެސް ދިފާއީ ބާރުގެ ބަޖެޓުގައި 50 މިލިއަން ރުފިޔާ ވަނީ ހިމަނައިފަ އެވެ.
ހަމަލާއަށްފަހު މަޖިލީހުން އެކުލަވައިލި އިންކުއަރީ ރިޕޯޓުގައި ދީފައިވާ 45 ރެކޮމެންޑޭޝަން ތެރޭގައި ހިމެނެނީ ހަރުކަށި ފިކުރާ ދެކޮޅަށް މަސައްކަތް ކުރުމަށް ދީފައިވާ 29 ރެކޮމެންޑޭޝަނަކާއި ނަޝީދުގެ ސެކިއުރިޓީއާ ގުޅޭ 10 ރިކޮމެންޑޭޝަނަކާއި ފައިނޭންޝަލް އިންޓެލިޖެންސާ ގުޅޭ ހަ ރެކޮމެންޑޭޝަނެކެވެ.
މީގެ އިތުރުން، އަންނަ އަހަރަކީ ރާއްޖެއަށް ޓޫރިޒަމް ތައާރަފުކުރި ފަހުން 50 އަހަރު ފުރޭ އަހަރުކަމަށްވާއިރު، އެ މުނާސަބަ ކުލަގަދަކޮށް ފާހަގަކުރަން ނިންމާފައިވާއިރު، އެ ހަރަކާތްތައް ހިންގުމަށް ޓޫރިޒަމް މިނިސްޓްރީގެ ބަޖެޓުގައި 30 މިލިއަން ރުފިޔާ ކަނޑައަޅާފައި ވެއެވެ.
2022 ބަޖެޓުގެ ހުލާސާ
ކޮވިޑުގެ ބަލިމަޑުކަމާ ގުޅިގެން ފަސްކުރަންޖެހުނު، ބޯހިމެނުން ވެސް އަންނަ އަހަރު ކުރިއަށް ގެންދަން ނިންމައި، އެކަމަށް 40.3 މިލިއަން ރުފިޔާ ބަޖެޓެއް ވަނީ ހިމަނައިފަ އެވެ.
ބަޖެޓު ބަޔާން ދެއްވަމުން އަމީރު އިއްޔެ ވަނީ ބަޖެޓުކުރެވިފައިވާ ގޮތަށް، ޕްރޮގްރާމްތަކާއި މަޝްރޫއުތައް ތަންފީޒުކުރުމަށް ދައުލަތުގެ އިދާރާތަކަށް ހާއްސަ އިލްތިމާސެއް ކުރައްވައިފަ އެވެ.
ބަޖެޓު 2022 ގެ ހުލާސާ
އަންނަ އަހަރަށް ލަފާކޮށް ސަރުކާރުން މަޖިލީހަށް ހުށަހަޅާފައިވަނީ 36.9 ބިލިއަން ރުފިޔާގެ ބަޖެޓެކެވެ.
އޭގެ ތެރޭގައި 24.8 ބިލިއަން ރުފިޔާ ރިކަރަންޓް ހަރަދުގެ ގޮތުގައި ހިމަނާފައިވާއިރު، ކެޕިޓަލް ހަރަދުގެ ގޮތުގައި ހަރަދުވާނެކަމަށް ލަފާކޮށްފައިވަނީ 12.1 ބިލިއަން ރުފިޔާ އެވެ.
ފިނޭންސް މިނިސްޓްރީން ލަފާކުރާ ގޮތުގައި އަންނަ އަހަރު އާމްދަނީ އާއި ހިލޭއެހީގެ ގޮތުގައި 24.3 ބިލިއަން ރުފިޔާ ދައުލަތަށް ލިބޭނެ އެވެ.
އެހެންކަމުން އަންނަ އަހަރަށް ހުށަހަޅާފައިވަނީ 9.7 ބިލިއަން ރުފިޔާގެ ޑެފިސިޓް ބަޖެޓެކެވެ.
ނަމަވެސް، އޭގެ ތެރޭގައި ލޯނު އަނބުރާ ދެއްކުމުގެ ބައި ނުހިމެނޭތީ، ލޯނު އަނބުރާ ދެއްކުމަށް 2.9 ބިލިއަން ރުފިޔާގެ އިތުރުން އެހެނިހެން ކަންކަމަށް އިތުރު 805 މިލިއަން ރުފިޔާ ބޭނުންވާކަމަށް ވަނީ ލަފާކޮށްފަ އެވެ.
އެއާއެކު އަންނަ އަހަރުގެ ބަޖެޓު ފިނޭންސް ކުރުމަށްޓަކައި ޖުމްލަ 13.4 ބިލިއަން ރުފިޔާ ހޯދަންޖެހެ އެވެ.
އެގޮތުން ބޭނުންވާ އަދަދުގެ 7.5 ބިލިއަން ރުފިޔާ ބޭރުގެ އެކި ފަރާތްތަކުން ހޯދަން ހިމަނާފައިވާއިރު، ބާކީ ހަމަޖައްސަނީ އެތެރޭގެ ފަރާތްތަކަށް ބޮންޑާއި ޓީ ބިލު ފަދަ ސެކިއުރިޓީޒް ވިއްކައިގެންނެވެ.
