މިދިޔަ ސަރުކާރުގައި ކުޑަކުދިންގެ ހިޔާގައި ހިނގައިދިޔަ ހާދިސާއަކާ ގުޅިގެން އޭރުގެ ޖެންޑާ މިނިސްޓަރު ޒެނީޝާ ޝަހީދު ޒަކީ ހިމެނޭހެން 30 މީހެއްގެ މައްޗަށް ދައުވާކޮށްދިނުމަށް އެދި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ޕްރޮސެކިއުޓާ ޖެނެރަލްގެ އޮފީސް (ޕީޖީ އޮފީސް) އަށް ފޮނުވައިފި އެވެ.
ޕީޖީ އޮފީހުގެ ސްޕޯކްސްޕާސަން އަދި ޕަބްލިކް ޕްރޮސެކިއުޓާ އަހުމަދު ޝަފީއު ވަނީ ކުޑަކުދިންގެ ހިޔާގައި ހިނގައިދިޔަ ހާދިސާއަކާ ގުޅިގެން 30 ފަރާތެއްގެ މައްޗަށް ދައުވާކޮށްދިނުމަށް އެދި އެޗްއާރުސީއެމުން ހުށަހެޅިކަން ކަށަވަރުކޮށްދެއްވައިފަ އެވެ.
އެ 30 މީހުންގެ ތެރޭގައި ޒެނީޝާގެ އިތުރުން ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަން (އެފްސީޕީ) ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވެސް ހިމެނޭކަން "އަދަދު" އަށް ވަނީ ކަށަވަރުވެފަ އެވެ.
ޝަފީއު ވިދާޅުވީ އެ މައްސަލައިގައި ޕީޖީ އޮފީހުން ދައުވާކުރުމާމެދު ވަކި ގޮތެއް އަދި ނުނިންމާ ކަމަށެވެ. އަދި އެ މައްސަލައިގައި އަދިވެސް އެޗްއާރުސީއެމްއާއެކު މަޝަވްރާ ކުރަމުންދާކަމަށް އޭނާ ވިދާޅުވި އެވެ.
އެ މައްސަލައަކީ ޗައިލްޑް އެންޑް ފެމިލީ ޕްރޮޓެކްޝަން ސާވިސްގެ ނަމުގައި މި ސަރުކާރުގައި އުފެއްދި އިދާރާއިން އެޗްއާރްސީއެމަށް ހުށަހެޅި މައްސަލައެކެވެ.
އެޗްއާރްސީއެމްގެ އޮފިޝަލަކު ވިދާޅުވި ގޮތުގައި އެ މައްސަލައާ ގުޅުން ހުރި ލިޔެކިޔުންތަކާ ގުޅެ ގޮތުން އެ ކޮމިޝަނުން ދަނީ ޕީޖީއާއެކު މަޝްވަރާ ކުރަމުންނެވެ.
