ޖެނީވާ، ސްވިޓްޒަލޭންޑް (އޮކްޓޯބަރު 26) - ދުނިޔޭގެ އެޓްމޮސްފިއާގައިވާ ގްރީންހައުސް ގޭސް ރިކޯޑު މިންވަރަށް މަތިވެފައިވާ ކަމުގެ އިންޒާރު އދ. އިން ދީފި އެވެ.
އދ. އިން ނެރުނު ރިޕޯޓެއްގައި އެހެން ބުނެފައި ވާއިރު، މި މަހު ފަށާ މޫސުމީ ބަދަލާ ގުޅޭ ބައިނަލްއަގްވާމީ ބޮޑު ސަމިޓުން ރަނގަޅު ނަތީޖާއެއް ނުލިބިދާނެތީ އިނގިރޭސިވިލާތުން ކަންބޮޑުވުން ފާޅުކުރި އެވެ.
"އަޅުގަނޑު އެންމެ ކަންބޮޑުވަނީ ގޯސްކޮށް ހިނގައިދާނެތީ،" އިނގިރޭސި ބޮޑު ވަޒީރު ބޮރިސް ޖޯންސަން ވިދާޅުވީ އެވެ.
ނަމަވެސް 12 ދުވަހުގެ މަޝްވަރާ އަށް ފަހު އެއްބަސްވުމަކަށް އައުމުގެ އުއްމީދު ބޮޑު ކަމަށް ވިދާޅުވި އެވެ.
ކޮޕް26 ސަމިޓު އޮންނާނީ އޮކްޓޯބަރު 31 އިން ނޮވެމްބަރު 12 އަށް ސްކޮޓްލޭންޑުގެ ގްލާސްގޯގަ އެވެ. ގައުމުތަކުން ސަމިޓަށް ދާނީ ދުނިޔެ ހޫނުވިޔަ ނުދީ ހިފެހެއްޓުމަށް ކުރާނެ ކަންކަމުގެ ޕްލޭން ހިފައިގެންނެވެ.
އދ. ގެ ވޯލްޑް މީޓިއޮރޮލޮޖިކަލް އޯގަނައިޒޭޝަނުން ބުނީ ގްރީންހައުސް ގޭސް ބޭރުކުރުން މަދު ނުކުރެވޭ ނަމަ ދުނިޔެ ހޫނުވުން ނުހުއްޓުވޭނެ ކަމަށާއި އާދަޔާ ހިލާފަށް ވަރުގަދަ މޫސުމީ ހަރަކާތްތަކާ ކުރިމަތިވާނެ ކަމަށެވެ.
ދުނިޔޭގެ މޫސުމާ ބެހޭ އިދާރާ އިން އިތުރަށް ބުނީ ކޮވިޑް ބަލިމަޑުކަމާ ހެދި އިގްތިސާދުތައް ހުއްޓުމުން ގޭސް ބޭރު ކުރުން މަދުވި ނަމަވެސް، މިހާރު އެޓްމޮސްފިއާގައި ތާށިވެފައި ހުރި ގްރީންހައުސް ގޭސްގެ މިންވަރަށް އޭގެން އެއްވެސް އަސަރެއް ނުކުރާ ކަމަށެވެ.
އެ އިދާރާގެ ގްރީންހައުސް ގޭސް ބުލެޓިންގައި ބުނީ މިދިޔަ އަހަރު ގްރީންހައުސް ގޭސް އިތުރުވި މިންވަރު ހުރީ 2011 އާއި 2020 ވަނަ އަހަރާ ދެމެދުގެ އެވްރެޖަށް ވުރެ މަތީގައި ކަމަށާއި އެ ޓްރެންޑު މި އަހަރު ވެސް ފެންނަމުންދާ ކަމަށެވެ.
ޖައްވަށް ބޭރު ކުރާ ގޭސްތަކުގެ ތެރެއިން ދުނިޔެ ހޫނުވުމަށް އެންމެ ބޮޑަށް މަގުފަހިކުރަނީ ކާބަންޑައިއޮކްސައިޑެވެ. އެހެންވެ، ކާބަން ބޭރު ކުރުން މަދުކުރި ނަމަވެސް މިހާރު އެޓްމޮސްފިއާގައި ތާށިވެފައި ހުރި ކާބަންގެ އަސަރު ގިނަ އަހަރުތަކެއް ވަންދެން ކުރާނެ އެވެ.
