ޝާރްޖާހް (27 އޮކްޓޯބަރު) - ޓީ20 ވޯލްޑް ކަޕްގައި ރޭ ނިއު ޒިލޭންޑް އަތުން ފަސް ވިކެޓުން މޮޅުވެ، ޕާކިސްތާނުން މި މުބާރާތުގައި ދެ ވަނަ މޮޅު ހޯދައިފި އެވެ.
މުބާރާތުގައި ކުޅުނު ފުރަތަމަ މެޗުގައި އިންޑިއާ އަތުން ތާރީހީ މޮޅެއް ހޯދި ޕާކިސްތާނުން ރޭގެ މެޗުގައި އެންމެ ފުރަތަމަ ނިކުތީ ފީލްޑްކުރާށެވެ.
ނިއު ޒިލޭންޑުން ކުޅެން އަރައި، 20 އޯވަރުގެ ތެރޭގައި 8 ވިކެޓަށް ހެދީ 134 ލަނޑެވެ. އެންމެ ރަނގަޅަށް ކުޅުނީ 27 ލަނޑު ހެދި ޑެވޯން ކޮންވޭ އާއި ޑެރީލް މިޝެލް އަދި 25 ލަނޑު ހެދި ޓީމުގެ ކެޕްޓަން ކޭން ވިލިއެމްސަނެވެ. ޕާކިސްތާނުގެ ބޯލަރު، ހާރިސް ރައުފް ހަތަރު ވިކެޓު ނެގި އެވެ.
ޕާކިސްތާން މެޗުން މޮޅުކޮށްދިނުމުގައި އެންމެ މުހިންމު ރޯލެއް އަދާކުރީ ޝުއެއިބް މާލިކް އަދި އާސިފް އަލީގެ ޕާޓްނަޝިޕެވެ. އާސިފް 27 ލަނޑު ހެދިއިރު، ޝުއެއިބް ވަނީ 26 ލަނޑު ހަދައިފަ އެވެ.
މި މޮޅާއެކު، ޕާކިސްތާނުން ވަނީ ސެމީ ފައިނަލްގެ އުންމީދު ބޮޑުކޮށްފަ އެވެ. މި ގުރޫޕްގައި ޕާކިސްތާނަށް ބާކީ ދެން އޮތީ އަފްގާނިސްތާނާއި ނެމީބިއާ އަދި ސްކޮޓްލޭންޑާ ދެކޮޅަށް ކުޅޭ މެޗެވެ.
މި މުބާރާތުގައި އިއްޔެ ދެކުނު އެފްރިކާ އަތުން ބަލިވެ، އެންމެ ފަހުގެ ޗެމްޕިއަން ވެސްޓް އިންޑީސް އަށް މުބާރާތުގެ ދެމި އޮތުމުގެ އުންމީދުތައް ވަނީ ކުޑަވެފަ އެވެ. ވެސްޓް އިންޑީސް މި މުބާރާތުގައި މިހާތަނަށް ކުޅުނު ދެ މެޗުން ބަލިވުމާއެކު، އެ ޓީމަށް ދެން ފައިނަލްގެ އުންމީދެއް އޮތީ ބާކީ އޮތް ތިން މެޗުން މޮޅުވެގެނެވެ. -- ބީބީސީ
