ޖެނީވާ، ސްވިޓްޒަލޭންޑް (އޮކްޓޯބަރު 26) - ރިކޯޑުތައް ބަލަހައްޓަން ފެށި ފަހުން މިހާތަނަށް އޭޝިއާ އަށް އެންމެ ހޫނުގަދަވީ 2020 ވަނަ އަހަރުގައި ކަމަށް އދ. އިން ބުނެފި އެވެ.
އދ. ގެ ވޯލްޑް މީޓިއޮރޮލޮޖިކަލް އޯގަނައިޒޭޝަން އިން ކޮންމެ އަހަރަކު ނެރޭ "ސްޓޭޓް އޮފް ދަ ކްލައިމެޓް އިން އޭޝިއާ" ރިޕޯޓުގައި ބުނީ ހޫނުވުމުގެ މައްސަލަ އޭޝިއާގެ ހުރިހާ ހިސާބަކަށް ވެސް ކުރި ކަމަށެވެ.
"ދެމެހެއްޓެނިވި ތަރައްގީ އަށް ދަނީ ހުރަސް އެޅެމުން. ކާބޯތަކެއްޗާއި ފެނުގެ ޔަގީންކަން ކުޑަވަމުން ދިޔުމާއި ސިއްހީ ނުރައްކާތަކާއި ތިމާވެށި ހަލާކުވެގެން ދިޔުމުގެ މައްސަލަތައް ވަނީ އިތުރުވެފައި."
އެ ރިޕޯޓުގައި ވަނީ މޫސުމީ ބަދަލާ ގުޅިގެން ދިމާވި ހާދިސާތަކުގެ ސަބަބުން 2020 ވަނަ އަހަރު އޭޝިއާގެ ގައުމުތަކަށް ލިބުނު ގެއްލުމުގެ އެވްރެޖް ވެސް ހިމަނާފަ އެވެ.
އިގްތިސާދުގެ ސައިޒަށް ބަލާއިރު ތަޖިކިސްތާނަށް ލިބުނު ގެއްލުމަކީ ޖީޑީޕީގެ 7.9 ޕަސެންޓެވެ. އޭގެ އިތުރުން ކެމްބޯޑިއާ އަށް ޖީޑީޕީގެ 5.9 ޕަސެންޓު އަދި ލާއޯސް އަށް ޖީޑީޕީގެ 5.8 ޕަސެންޓު ގެއްލުން ލިބުނެވެ.
އިތުރަށް ހޫނުގަދަވާނެ ކަމަށް ލަފާކުރެވޭތީ އޭޝިއާގެ ގައުމުތަކުގައި އިމާރާތްތަކުގެ ބޭރުގައި މަސައްކަތުގައި ހޭދަކުރާ ވަގުތު އިތުރަށް މަދުވެގެން ދާނެ ކަމަށް ރިޕޯޓުގައި ބުނެފައި ވެ އެވެ. އޭގެ ސަބަބުން އެތައް ބިލިއަން ޑޮލަރުގެ ގެއްލުންވުން އެކަށީގެންވެ އެވެ.
"މި ހުރިހާ ކަމެއް އެއްކޮށްލުމުން، ދިގު ރާސްތާގެ ދެމެހެއްޓެނިވި ތަރައްގީ އަށް ބޮޑެތި އަސަރުތަކެއް ކުރާނެ."
ރިޕޯޓުގައިވާ ގޮތުން 2020 ވަނަ އަހަރު އޭޝިއާގައި ފެންބޮޑުވުމާއި ތޫފާންތަކުގެ އަސަރު 50 މިލިއަން މީހުންނަށް ކުރިމަތިވެ، 5،000 އަށް ވުރެ ގިނަ މީހުން މަރުވި އެވެ.
އޭޝިއާގައި މިހާތަނަށް ރިކޯޑު ކުރި އެންމެ ހޫނު އަހަރުގެ ގޮތުގައި 2020 ވަނަ އަހަރުވެފައި ވަނީ 1981-2010 ވަނަ އަހަރާ ދެމެދުގެ އެވްރެޖަށް ވުރެ 1.39 ޑިގްރީ ހޫނުވުމުންނެވެ.
