ގުދުސް (އޮކްޓޯބަރު 26) - މޫސުމީ ބަދަލަކީ ގައުމީ ސަލާމަތަށް އޮތް ނުރައްކަލެއް ކަމަށް ކަނޑައެޅުމަށް ފަހު، ސާފު ހަކަތައިގެ އިންވެސްޓްމަންޓަށް އެހީވުމަށް އިޒްރޭލުގެ ބޮޑު ވަޒީރު ނަފްތާލީ ބެނެޓް ވައުދުވެވަޑައިގެންފި އެވެ.
އޮކްޓޯބަރު 31 އިން ނޮވެމްބަރު 12 އަށް ސްކޮޓްލޭންޑުގެ ގްލާސްގޯގައި އޮންނަ މޫސުމީ ބަދަލާ ގުޅޭ ބައިނަލްއަގްވާމީ ބޮޑު ސަމިޓު، ކޮޕް26 އަށް ވަޑައިގެންނެވުމުގެ ކުރިން ބެނެޓް ވަނީ މޫސުމީ ބަދަލާ ގުޅޭ މަސައްކަތަށް ހާއްސަ ވޯކިން ގްރޫޕުތަކެއް އުފައްދަވާފަ އެވެ.
"މޫސުމީ ބަދަލުގެ އަސަރަކީ އަޅުގަނޑުމެން އެންމެންގެ ދިރިހުރުމާ ގުޅިފައިވާ ކަމެއް. އެއީ އަޅުގަނޑުމެންގެ ދަރިންނާއި ކާފަ ދަރިންނާ ގުޅިފައިވާ ކަމެއް. އިޒްރޭލުން އެކަމާ މެދު ފިޔަވަޅު އެޅުމަކީ އަޅުގަނޑުމެންގެ ބޮލުގައި އެޅިފައި އޮތް ޒިންމާއެއް. މިއީ އަޅުގަނޑުމެންގެ ދިރިހުރުމާއި ނެތިދިޔުމާ ގުޅިފައިވާ މައްސަލައެއް،" ބެނެޓް ވިދާޅުވި އެވެ.
ބެނެޓް ވިދާޅުވީ ދަތުރުފަތުރުގެ ނިޒާމުގައި ސާފު ހަތަކަ އާއި ކާބަން މަދު ގޮތްތައް ކުރިއަށް ނެރުމަށާއި، ހަކަތަ އެފިޝެންޓު ކުރުމަށާއި، ޖައްވަށް ވިހަ ގޭސް ބޭރު ކުރުން މަދު ކުރުމަށާއި، އާ ޓެކްނޮލޮޖީތަކާއި ދެމެހެއްޓެނިވި ތަރައްގީ އަށް އިސްކަން ދިނުމަށް ސަރުކާރުން ނިންމާފައިވާ ކަމަށެވެ.
އިޒްރޭލުން ކަނޑައަޅާފައިވާ ލަނޑުދަނޑިއަކީ 2030 ގެ ކުރިން ޖައްވަށް ބޭރު ކުރާ ގޭސް 27 ޕަސެންޓުން މަދު ކުރުމަށެވެ. އޭގެ އިތުރުން 2050 އާ ހަމައަށް ދާއިރު، އެ ނިސްބަތް 85 ޕަސެންޓަށް މަތި ކުރުމަށް ވެސް ކަނޑައަޅާފައި ވެ އެވެ.
އިޒްރޭލަކީ އެންމެ ފަހުގެ ޓެކްނޮލޮޖީތައް ބޭނުން ކުރުމުގައި ކުރީގައި އުޅޭ ގައުމެކެވެ. އެހެންވެ، ސާފު ހަކަތައާ ދިމާލަށް ބަދަލުވުމުގައި ވެސް ފަހުގެ ޓެކްނޮލޮޖީތައް ބޭނުން ކުރަން ސަރުކާރުން ވިސްނަ އެވެ.
