މިހާރު ކުރިއަށްދާ އޭއެފްސީ 23 އަހަރުން ދަށުގެ މުބާރާތުގެ ކޮލިފައިންގައި ރާއްޖެ ހިމެނޭ ގްރޫޕްގައި އޮތް އަފްގާނިސްތާނުގެ 23 އަހަރުން ދަށުގެ ޓީމަށް ބައިވެރިނުވެވުނު ކަމަށް އެ ގައުމުގެ ފުޓްބޯޅަ ފެޑެރޭޝަނުން ބުނެފި އެވެ.
އަފްގާނިސްތާންގެ ފުޓްބޯޅަ ފެޑެރޭޝަނުން ނެރުނު ބަޔާނެއްގައި ބުނެފައިވަނީ އަފްގާނިސްތާންގެ ޓީމަށް ކޮލިފައިންގައި ބައިވެރިނުވެވުނީ މި ވަގުތު އެ ގައުމުގެ ހާލަތު އޮތް ގޮތުން، މުބާރާތުގެ މެޗުތަކަށް ބާއްވާ ބަހުރޭނަށް ދެވޭނެ ގޮތެއް ނެތުމުން ކަމަށެވެ.
"އަފްގާނިސްތާންގެ 23 އަހަރުން ދަށުގެ ޓީމު ކޮލިފައިން މެޗުތަކަށް ފޮނުވުމަށް ފުޓްބޯލް ފެޑަރޭޝަނުން ކުރެވެން އޮތް ހުރިހާ މަސައްކަތެއް ކުރި ނަމަވެސް، އަފްގާނިސްތާން ހާލަތު މި ވަގުތު އޮތް ގޮތުން އެކަން ކާމިޔާބެއް ނުވި،" އަފްގާނިސްތާންގެ ފުޓްބޯޅަ ފެޑަރޭޝަނުން ނެރުނު ބަޔާނުގައި ބުނެފައިވެ އެވެ.
ކޮލިފައިންގައި އަފްގާނިސްތާން ހިމެނުނު ގުރޫޕް ސީގައި ބަހުރޭންގެ އިތުރުން ދެން އޮތީ ރާއްޖެ އާއި އިރާގެވެ. މި ގުރޫޕްގެ ފުރަތަމަ ދެ މެޗު އިއްޔެ ކުޅެން އޮތް ނަމަވެސް، އަފްގާނިސްތާނުގެ ޓީމަށް ބަހުރޭނަށް ދަތުރު ނުކުރެވުމުން، ބަހުރޭނާ ދެކޮޅަށް ކުޅެން އޮތް މެޗު ކުރިއަށް ނުގެންދެވުނެވެ.
"އަފްގާނިސްތާނާއި ގަތަރުގެ އޮލިމްޕިކް ކޮމެޓީއާ މަޝްވަރާކޮށް، ޓީމު ބަހުރޭނަށް ފުރުވާލެވޭނެ އިންތިޒާމްތައް ހަމަޖެއްސުނު. އެކަމަކު ކޮލިފައިންގެ ފުރަތަމަ މެޗަށް ދަތުރު ނުކުރެވުމުން، އޭއެފްސީން ވަނީ ދަތުރު ކެންސަލްކޮށްފަ،" އަފްގާނިސްތާނުގެ ފެޑަރޭޝަނުން ބުންޏެވެ.
އަފްގާނިސްތާންގެ މީޑިއާ ރިޕޯޓްތަކުން ބުނާގޮތުގައި ބަހުރޭނަށް ކުރަން އޮތް ދަތުރު ކެންސަލްކުރީ ބޭނުންވާ ވަގުތަށް ފްލައިޓެއް ނެތުމުންނެވެ. އަދި އަފްގާނިސްތާންގެ ހާލަތު ފީފާ އާއި އޭއެފްސީން ވަރަށް ގާތުން ބަލަމުންދާ ކަމަށެވެ.
ފީފާގެ ރައީސް ޖިއާނީ އިންފަންޓީނޯ ވަނީ މިދިޔަ އާދިއްތަ ދުވަހު އަފްގާނިސްތާނުގެ ފުޓްބޯޅަ ފެޑަރޭޝަނުގެ ވެރިންނާ ގަތަރުގައި ބައްދަލުކުރައްވައި، އަފްގާނިސްތާންގެ ފުޓްބޯޅައިގެ ހާލަތާ ގުޅޭ ގޮތުން މަޝްވަރާ ކުރައްވައިފަ އެވެ.
އަފްގާނިސްތާންގެ ވެރިކަމަށް ތާލިބާނުން އައުމާ އެކު، އެ ގައުމުގެ ހާލަތު ވަނީ ވަރަށް ބޮޑަށް ގޯސްވެފަ އެވެ. އެ ގައުމުގެ ގިނަ ކުޅުންތެރިންތަކެއް ވަނީ މިހާރު އާއިލާތަކާއެކު ގައުމު ދޫކޮށް، އެހެން ގައުމުތަކުގައި ވަޒަންވެރިވެފަ އެވެ.
