ގުދުސް (އޮކްޓޯބަރު 24) - ނަވާރަ ސަތޭކަ ފަސްދޮޅަސް ހަތް ވަނަ އަހަރުން ފެށިގެން އިޒްރޭލުން ހިފައިގެން އުޅޭ ފަލަސްތީނުގެ ހުޅަނގު އައްސޭރީގައި ޔަހޫދީން ދިރިއުޅެން އިތުރު 1،355 ގެ އަޅަން ބޮޑު ވަޒީރު ނަފްތާލީ ބެނެޓްގެ ސަރުކާރުން ހުއްދަ ދިނުމުގެ މަސައްކަތް ފަށައިފި އެވެ.
މިދިޔަ އޯގަސްޓު މަހު ވެސް ހުޅަނގު އައްސޭރީގައި ޔަހޫދީންނަށް 2،000 ގެ އަޅާނެ ކަމަށް އިއުލާނު ކުރި އެވެ. އަލަށް އިއުލާނު ކުރި 1،300 ގެ އަށް އެންމެ ފަހުގެ ހުއްދަ ދޭނީ މި ހަފުތާ ނިމުމުގެ ކުރިން އިޒްރޭލުގެ ޑިފެންސް މިނިސްޓްރީންނެވެ.
ފަލަސްތީނުގެ ސަރުކާރުގެ ކެބިނެޓް ބައްދަލުވުމެއްގައި ބޮޑު ވަޒީރު މުހައްމަދު އިޝްތަޔާ ގައުމުތަކަށް ގޮވާލެއްވީ އިޒްރޭލާ "ކުރިމަތިލައިގެން" ފަލަސްތީނުގެ ރައްޔިތުންނާ ދެކޮޅަށް ހިންގާ "އުދުވާން" ހުއްޓުވުމަށެވެ. ވަކިން ހާއްސަކޮށް އެމެރިކާގެ ނަން އޭނާ ފާހަގަކުރެއްވި އެވެ.
ފަލަސްތީނު ސަރުކާރުން ބުނީ އެކަމުގައި އެމެރިކާ އިން ދޭނެ ޖަވާބަކަށް އިންތިޒާރު ކުރާނެ ކަމަށެވެ. އެމެރިކާގެ ރައީސް ޖޯ ބައިޑެންގެ ސަރުކާރުން ކުރިން ބުނެފައި ވަނީ ޔަހޫދީން އާބާދު ކުރުމަކީ ދެ ދައުލަތް ގާއިމްކުރުމަށް ހުރަސް އެޅޭ ކަމަކަށް ވާތީ އެކަމާ ދެކޮޅު ކަމަށެވެ.
ހުޅަނގު އައްސޭރީގައި އަޅާފައިވާ ގެތަކުގައި މިހާރު ވެސް 475،000 އެއްހާ ޔަހޫދީން ދިރިއުޅެ އެވެ. އިޒްރޭލުން ގެތައް އަޅަމުން ދަނީ ބައިނަލްއަގްވާމީ ގާނޫނާ ހިލާފަށް، ކުރިމަގުގައި ފަލަސްތީނުގެ ދައުލަތް ގާއިމްކުރަން މަސައްކަތް ކުރާ ބިމުގަ އެވެ.
