ދުބާއީ (25 އޮކްޓޫބަރު) - ޓީ20 ވޯލްޑް ކަޕްގައި މިރޭ އިންޑިއާ އަތުން ދިހަ ވިކެޓުގެ ތަފާތު ބޮޑު ނަތީޖާއަކުން ޕާކިސްތާން މޮޅުވެއްޖެ އެވެ.
ޒަމާންވީ ވާދަވެރިން ކަމަށްވާ އިންޑިއާ - ޕާކިސްތާންގެ ކުރިމަތިލުމަކީ މި މުބާރާތުގައި ގިނަ ބައެއްގެ ސަމާލުކަން ހުއްޓުނު މެޗެކެވެ.
ދުބާއީގައި ކުޅުނު މެޗުގައި ފުރަތަމަ ކުޅެން އަރައި، އިންޑިއާ އަށް ވިހި އޯވަރުގެ ތެރޭގައި ހަތް ވިކެޓަށް ހެދުނީ 151 ލަނޑެވެ. ޖަވާބުގައި ކުޅެން އަރައި، ޕާކިސްތާނުން 17.5 އޯވަރުގެ ތެރޭގައި 152 ލަނޑު ހަދައި، މެޗު ކާމިޔާބުކުރީ އެންމެ ކުޅުންތެރިއެއް ވެސް ނުބައި ނުވެ އެވެ.
މިއީ ވޯލްޑް ކަޕެއްގައި، އިންޑިއާ އަތުން ޕާކިސްތާން މޮޅުވި ފުރަތަމަ ފަހަރެވެ. އަދި މިއީ ޕާކިސްތާން ކްރިކެޓް ތާރީހުގައި ފާހަގަ ކޮށްލެވޭނެ ރެޔެކެވެ.
ޕާކިސްތާނަށް މި ތާރީހީ ކާމިޔާބީ ހޯދައިދިނުމުގައި އެންމެ މުހިންމު ރޯލެއް އަދާކުރީ އެ ޓީމުގެ އޯޕަނިން ބެޓްސްމަނުން ކަމަށްވާ މުހައްމަދު ރިޒުވާން އަދި ބާބަރް އާޒަމެވެ. ރިޒުވާން ވަނީ 55 ބޯޅައިން 78 ލަނޑު ހަދައިފަ އެވެ. ޕާކިސްތާންގެ ކެޕްޓަން ބާބަރް ވަނީ 52 ބޯޅައިން 68 ލަނޑު ހަދައިފަ އެވެ.
"އަހަރެމެން ރޭވުންތަކާ އެއްގޮތަށް ހުރިހާ ކަމެއް ވެސް ކާމިޔާބުވި،" މެޗަށް ފަހު ޕާކިސްތާނުގެ ކެޕްޓަން ބާބަރް ބުންޏެވެ.
ޕާކިސްތާނާއި އިންޑިއާ 2019 ވަނަ އަހަރުގެ ފަހުން ކުރިމަތިލި ފުރަތަމަ މެޗަށް ގިނަ އަދެއްގެ ކުޅިބެލުންތެރިން ދަނޑަށް ވަނެވެ.
އިންޑިއާގެ ކެޕްޓަން ވިރާތު ކޯލީ ވަނީ މެޗުގައި 57 ލަނޑު ހަދައިފަ އެވެ. ޕާކިސްތާނުގެ ފާސްޓް ބޯލަރު ޝަހީން އަފްރީދީ ވަނީ 31 ލަނޑަށް އިންޑިއާގެ ތިން ކުޅުންތެރިން ނުބައިކޮށްފަ އެވެ.
މެޗަށް ފަހު ކޯލީ ބުނީ މިއީ ޕާކިސްތާނަށް ހައްގު މޮޅެއް ކަމަށެވެ.
"އަހަރަމެން ބޭނުންވި ގޮތަކަށް ނޫން މެޗު މިދިޔައީ. މިއަދު އަހަރަމެންނަށް ވުރެ މޮޅަށް ޕާކިސްތާނުން ކުޅުނު،" ކޯލީ ބުންޏެވެ. "އަދި ހާސްވާކަށް ނުޖެހޭ. މިއީ އަދި މުބާރާތުގެ ފުރަތަމަ މެޗު."
މި މޮޅާއެކު، ޕާކިސްތާންގެ އަކި ސިޓީތަކުގެ މަގުތަކަށް ނުކުމެ، އެ ގައުމުގެ ރައްޔިތުން ދަނީ އުފާފާޅުކުރަމުންނެވެ. -- ބީބީީސީ
