ގަތަރުގެ ދޯހާގައި މިހާރު ކުރިއަށްދާ ޓީ20 ކްރިކެޓް ވޯލްޑް ކަޕްގެ ކޮލިފައިންގައި ރާއްޖޭގެ ގައުމީ ކްރިކެޓް ޓީމުން ކުޅުނު ދެ ވަނަ މެޗުން އިއްޔެ ގަތަރު އަތުން ބަލިވެއްޖެ އެވެ.
ފުރަތަަމަ މެޗުގައި ސައުދީ އަރަބިއްޔާއާ ދެކޮޅަށް ކުޅުނު މެޗުން ރާއްޖެ ބަލިވީ ހަތް ވިކެޓުންނެވެ. ގަތަރުން އިއްޔެ ރާއްޖެ ބަލިކުރީ 98 ލަނޑުންނެވެ.
ކޮލިފައިން ގްރޫޕްގައި ރާއްޖެ ނޫން ދެން އޮތް ހަތަރު ޓީމަށް ވެސް ވަނީ ދެ ޕޮއިންޓް ލިބިފަ އެވެ. އެއް ވަަނައިގައި ކުވެއިތު އޮތްއިރު، ދެ ވަނައިގައި އޮތީ ސައުދީ އަރަބިއްޔާ އެވެ. ތިން ވަނައިގައި ގަތަރު އޮތްއިރު، ހަތަރެއްގައި އޮތީ ބަހްރޭނެވެ. ރާއްޖެ އޮތީ އެންމެ ފަހަތުގަ އެވެ.
ދޯހާގެ ވެސްޓް އެންޑް ޕާކް އިންޓަނޭޝަނަލް ކްރިކެޓް ސްޓޭޑިއަމްގައި އިއްޔެ ކުޅުނު މެޗުގައި ޓޮސް ދިމާވީ ރާއްޖެ އަށެވެ. ރާއްޖޭން ނިންމީ ފީލްޑް ކުރާށެވެ.
ގަތަރުގެ ބެޓް ކުރުން ރަނގަޅު ދުވަހަކާ ދިމާވިއިރު، އެ ޓީމުން ވަނީ 20 އޯވަރުގެ ތެރޭގައި ހަ ކުޅުންތެރިން ނުބައިވެގެން 154 ލަނޑު ހަދައިފަ އެވެ. ގަތަރަށް އެންމެ ރަނގަޅު ކުޅުމެއް ދެއްކީ 46 ބޯޅައިން 62 ލަނޑު ހެދި މުހައްމަދު ރިޒްލާން އާއި 22 ބޯޅައިން 20 ލަނޑު ހެދި މުހައްމަދު ތަންވީރު އެވެ.
ރާއްޖޭން ކުޅެން އަރައި ރަނގަޅަށް ކުޅެން މަސައްކަތް ކުރި ނަމަވެސް ގަތަރު ފެނުނީ ރަނގަޅު ފޯމެއްގައި ކުޅެލިތަނެވެ. ރާއްޖެ އަށް 18.5 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ އެންމެ 56 ލަނޑެވެ.
މި މެޗުގައި ރާއްޖޭގެ ޓީމުން އެންމެ ރަނގަޅު ކުޅުމެއް ދެއްކީ 28 ބޯޅައިން 18 ލަނޑު ހެދި އަހުމަދު ހަސަން އެވެ. ރާއްޖޭގެ ކެޕްޓަން މުހައްމަދު މަހުފޫޒާއި ޔޫސުފް އަޒްޔާން ފަރުހަތު އަދި މުހައްމަދު ރިޝްވާނަށް ރަނގަޅު ފޯމުގައި މި މެޗުގައި ނުކުޅެވުނެވެ.
ކޮލިފައިންގައި ރާއްޖެ ދެން ކުޅޭ މެޗުގައި ބުދަ ދުވަހު ބައްދަލުކުރާނީ ބަހްރޭނާ އެވެ.
