ރާއްޖޭގެ ފުޓްބޯޅަ ސީޒަން ޕްރެޒިޑެންޓްސް ކަޕުން ފަށާ ގޮތަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.
އެފްއޭއެމުން އެންމެ ފަހުން ޕްރެޒިޑެންޓްސް ކަޕް ބާއްވާފައިވަނީ 2017 ވަނަ އަހަރު އެވެ. އޭގެ ފަހުން ފާއިތުވި ތިން ސީޒަނުގައި ވެސް އެކި ސަބަބުތަކާ ހުރެ ޕްރެޒިޑެންޓްސް ކަޕް ބާއްވާފައި ނުވެ އެވެ. އެކަމަކު، އެފްއޭއެމުން މިއަދު އިއުލާނުކުރި ކުރިއަށް އޮތް ސީޒަނުގެ ކަލަންޑަރުގައި އެންމެ ފުރަތަމަ ބާއްވަން ކަނޑައަޅާފައިވަނީ ޕްރެޒިޑެންޓްސް ކަޕް އެވެ.
ހަތަރު ވަރަކަށް އަހަރު ތެރޭ ފުރަތަމަ ފަހަރަށް ޕްރެޒިޑެންޓްސް ކަޕްގައި ކުޅޭ ފުރަތަމަ މެޗު އޮންނާނީ ޑިސެމްބަރު މަހު 15 ވަނަ ދުވަހު އެވެ. މުބާރާތް ކުރިއަށްދާނީ ލީގު ފޯމެޓަށް އެއް ބުރަށެވެ. މާނަ އަކީ މިދިޔަ ސީޒަނުގައި ދިވެހި ޕްރިމިއާ ލީގުގައި ކުޅުނު އަށް ޓީމު ޕްރެޒިޑެންޓްސް ކަޕުން ފެންނާނެ އެވެ. މުބާރާތުގެ ޗެމްޕިއަންކަން ލިބޭނީ ލީގު ބުރު ކުޅެނިމޭއިރު، އެއް ވަނައިގައި އޮންނަ ޓީމަކަށެވެ. ޕްރެޒިޑެންޓްސް ކަޕްގެ ފަހު މެޗުތައް އޮންނާނީ ޖެނުއަރީ މަހު 19 ވަނަ ދުވަހު އެވެ.
އެންމެ ފަހުން ޕްރެޒިޑެންޓްސް ކަޕްގައި އަށް ޓީމު ހިމެނޭ ގޮތަށް ކުޅުނީ 2015 ވަަަނަ އަހަރު އެވެ. އެ ފަހަރު މިނިވަން ދުވަހުގެ ހަރަކާތްތައް ކުރިއަށް ގެންދަން ގަލޮޅު ދަނޑުގެ ވިނަގަނޑު މަތީގައި ރަބަރުތަކެއް އެޅުމުގެ ސަބަބުން ވިނަގަނޑު މަރުވެ، ސީޒަން ކަލަންޑަރަށް ބަދަލުތަކެއް ގެންނަން ޖެހުނެވެ.
އެހެންވެ، އޭރު އެފްއޭއެމުން ނިންމީ ލީގުގައި ވާދަކުރަމުން ދިޔަ އަށް ޓީމު ދެ ގްރޫޕަކަށް ބަހާލައިގެން ޕްރެޒިޑެންޓްސް ކަޕް ބާއްވާށެވެ. ހދ. ކުޅުދުއްފުއްޓާއި އައްޑޫގައި މުބާރާތް ކުރިއަށްދިޔައިރު، ފައިނަލު ކުޅުނީ އައްޑޫ ހިތަދޫ ޒޯން ސްޓޭޑިއަމްގަ އެވެ.
ޕްރެޒިޑެންޓްސް ކަޕްގެ ތަށި އެންމެ ފަހުން އުފުލާލި ޓީމަކީ ނިއު ރޭޑިއަންޓް އެވެ. ނިއު އިން 2017 ވަނަ އަހަރުގެ ޑިސެމްބަރު މަހު 15 ވަނަ ދުވަހު ކުޅުނު ފައިނަލް މެޗުން ވަނީ ޓީސީ ސްޕޯޓްސް ކްލަބް 3-0 އިން ބަލިކޮށްފަ އެވެ.
ޗެރިޓީ ޝީލްޑް މެޗު އަންނަ އަހަރު ފެބްރުއަރީ މަހު
ސީޒަން ކަލަންޑަރުގައިވާ ގޮތުން އަންނަ ސީޒަނުގެ ޗެރިޓީ ޝީލްޑް މެޗު ބާއްވާނީ ފެބްރުއަރީ ހަތް ވަނަ ދުވަހު އެވެ. ޝީލްޑް މެޗުގައި ކުޅޭނީ އެންމެ ފަހުގެ ލީގު ޗެމްޕިއަން މާޒިޔާ އާއި ރަނަރަޕް ކްލަބް ވެލެންސިއާ އެވެ.
ދިވެހި ޕްރިމިއާ ލީގުގެ އާ ސީޒަން ފަށާނީ ފެބްރުއަރީ 12 ވަނަ ދުވަހު އެވެ. މިދިޔަ ސީޒަނުގައި ވެސް ލީގުގައި ކުޅުނު އަށް ޓީމާ އެކު ކުރިއަށް އޮތް ސީޒަނުގެ ލީގުގެ އޮންނާނީ ތިން ބުރެކެވެ. ނިމިދިޔަ ސީޒަނުގައި ވެސް ލީގުގައި ތިން ބުރެއް ކުޅެން ނިންމި އެވެ.
އެކަމަކު، މާލެ ސަރަހައްދުގައި ކޮވިޑް-19ގެ ކޭސްތައް ގިނަވެގެން މިދިޔަ މެއި މަހު ލީގު ދެ ބުރަށް ފަހު ނިންމާލަން ނިންމީ ފަހު ދެ މުބާރާތް ކަމަށްވާ ޕްރެޒިޑެންޓްސް ކަޕާއި އެފްއޭ ކަޕް ނުބާއްވާގޮތަށެވެ. މިދިޔަ ސީޒަނުގެ އެފްއޭ ކަޕް ކެންސަލްކުރަން ޖެހުނީ މުބާރާތުގެ ސެމީ ފައިނަލަށް ޓީމުތައް ހޮވިފައިވަނިކޮށެވެ.
ކުރިއަށް އޮތް ސީޒަނުގެ އެހެން މުބާރާތްތަކަށް ބަލާއިރު، ދެ ވަނަ ޑިވިޝަން ފުޓްބޯޅަ މުބާރާތް ކުރިއަށްދާނީ އަންނަ އަހަރު ޖޫން މަހުގެ 27 އިން ޖުލައި މަހުގެ 28 އަށެވެ. ދިވެހި ޕްރިމިއާ ލީގުގެ ކޮލިފިކޭޝަން މެޗުތައް ތާވަލްކޮށްފައި އޮތީ އޮގަސްޓް 5، 10 އަދި 14 ވަނަ ދުވަހު ކުޅޭ ގޮތަށެވެ.
އަތޮޅު ފުޓްބޯޅައިގެ ހާއްސަ މުބާރާތް، މިނިވަން ޗެމްޕިއަންޝިޕްގެ މެޗުތައް ވެސް ކުރިއަށް އޮތް ސީޒަނުގައި ފަށާނެ އެވެ. އަދި ސެންޓްރަލައިޒްކޮށް އަންނަ ޖޫން މަހު އޭޝިއަން ކަޕް ކޮލިފައިން މެޗުތައް ވެސް ކުޅޭނެ އެވެ. އޭއެފްސީ ކަޕްގެ މެޗުތައް އޮތީ ސެންޓްރަލައިޒްކޮށް މެއި 17 އިން 24 އަށެވެ.
