ހއ. ބާރަށުގެ ފަޅުތެރޭގައި ގަވާއިދާ ހިލާފަށް ދާޖަހައިގެން މިޔަރު މަސްވެރިކަން ކުރިކަމަށް ތުހުމަތުކުރެވޭ މީހަކަށް ޖަވާބުދާރީވުމަށް ފިޝަރީޒް މިނިސްޓްރީން ނޯޓިސް ދީފި އެވެ.
ފިޝަރީޒް މިނިސްޓްރީން ނޯޓިސް ދީފައިވަނީ، ރާއްޖޭގެ މަސްވެރިކަމުގެ އާންމު ގަވާއިދުގެ ފަސް ވަނަ މާއްދާގެ ދަށުން، ރާއްޖޭގެ ކަނޑުގެ ސަރަހައްދަކުން ހިފުމާއި، ބޭނުމާއި، މެރުން މަނާ ބާވަތްތަކުގެ ތެރޭގައި ހިމެނޭ މަޑި އަދި މިޔަރު ބާނައި ހިފި ކަމުގެ ތުހުމަތުގައިކަމަށް އެ މިނިސްޓްރީގެ ސީނިއާ ކޮމްޕަލަޔަންސް އޮފިސަރު ހުސެއިން ޒަމީލް ވިދާޅުވި އެވެ.
"އަޅުގަނޑުމެން މިނިސްޓްރީގެ ފަރާތުން ވަނީ ނޯޓިސް ދީފަ ރާއްޖޭގެ ކަނޑުގެ ސަރަހައްދުން ބޭނުން މަނާ ބާވަތްތަކުގެ ތެރޭ ހިމެނޭ މިޔަރު ބޭނިކަމުގެ ތުހުމަތުގައި އެފަރާތަށް،" ޒަމީލް ވިދާޅުވި އެވެ.
ޒަމީލް ވިދާޅުވީ، މިޔަރު ބޭނިކަމަށް ތުހުމަތުވާ މައްސަލައިގައި މިނިސްޓްރީގެ ފަރާތުން އޯޑިއޯ-ވީޑިއޯ ކޮންފަރެންސް މެދުވެރިކޮށް އެމީހާއަށް ޖަވާބުދާރީވުމުގެ ފުރުސަތު ދިނުމަށް ނިންމާފައިވާ ކަމަށެވެ.
ޖަވާބުދާރީވުމަށް އޮންނަ އަޑުއެހުން އޮންނާނީ މާދަމާ ހެނދުނު 9:00 ޖަހާއިރު ކަމަށް ޒަމީލް ވިދާޅުވި އެވެ. އަދި އެ އޯޑިއޯ ވީޑިއޯ ކޮންފަރެންސް ކުރިޔަށްދާނީ ބާރަށު ޕޮލިސް ސްޓޭޝަނުގައިކަމަށް ވެސް ޒަމީލް ވިދާޅުވި އެވެ.
"އެފަދަ މައްސަލަތައް ވަރަށް ސީރިއަސް ކޮށް ނަގައި ސާބިތު ވެއްޖެ ނަމަ ފިޔަވަޅު ވެސް އަޅާނަން. ޖޫރިމަނާ ކުރާނަމަ، ގާނޫނުގައި އޮވޭ 400،000 ރުފިޔާގެ އަދަދަކުން ޖޫރިމަނާކުރެވެން ސާބިތުވެއްޖެ ނަމަ،" ޒަމީލް ވިދާޅުވި އެވެ.
