ސައުތެމްޓަން (އޮކްޓޫބަރު 23) - އިނގިރޭސި ޕްރިމިއާ ލީގުގައި މިރޭ ފިލް ފޮޑެންގެ މޮޅު ކުޅުމާ އެކު ބްރައިޓަން އަތުން 4-1 އިން މޮޅުވެ، އެންމެ ފަހުގެ ޗެމްޕިއަން މެންޗެސްޓާ ސިޓީން ލީގުގެ ދެ ވަނަ އަށް ޖެހިލައިފި އެވެ.
އެއް ވަނައިގައި އޮތީ މިރޭ ނޯވިޗް ސިޓީ އަތުން 7-0 އިން މޮޅުވި ޗެލްސީ އެވެ. ޗެލްސީ އެއް ވަނައިގައި އޮތީ ނުވަ މެޗުން 22 ޕޮއިންޓާ އެކު އެވެ. ދެ ވަނަ މަގާމަށް އެރި ސިޓީ ވަނީ ނުވަ މެޗުން 20 ޕޮއިންޓް ހޯދައިފަ އެވެ. ލިވަޕޫލް ތިން ވަނައިގައި އޮތީ އަށް މެޗުން 18 ޕޮއިންޓާ އެކު އެވެ. ލިވަޕޫލަށް އަލުން ދެ ވަނަ އަށް އެެރެން އޮތީ މާދަމާ މެންޗެސްޓާ ޔުނައިޓެޑް ދަނޑުގައި މޮޅުވެގެންނެވެ.
ބްރައިޓަންގެ އެމެކްސް ސްޓޭޑިއަމްގައި ކުޅުނު މިރޭގެ މެޗުގެ ފުރަތަމަ 31 މިނިޓް ތެރޭގައި ސިޓީން ވަނީ ތިން ގޯލު ޖަހައިފަ އެވެ. މެޗުގެ 13 ވަނަ މިނިޓްގައި ސިޓީގެ ކެޕްޓަން އިލްކާއި ގުންޑޮގާން އެ ޓީމަށް ލީޑުނަގައިިދިންއިރު، އެ ގޯލު ޖެހުމުގެ ކުރިން ސިޓީގެ ގަބްރިއެލް ޖީސޫސް ބްރައިޓަންގެ ސްޕެއިން ކީޕަރު ރޮބާޓް ސަންޗޭޒަށް ފައުލުކުރިކަމަށް އެޕީލްކުރި ނަމަވެސް ރެފްރީ ކެވިން ފްރެންޑް ނިންމީ ގޯލު ބަލައިގަންނާށެެވެ.
މެޗުގެ 28 ވަނަ މިިނިޓްގައި ކައުންޓަ އެޓޭކެއްގައި ސިޓީގެ ޖެކް ގްރީލިޝް ދިން ބޯޅައަކުން ފޮޑެން ވަނީ ސިޓީގެ ލީޑުފުޅާކޮށްދީފަ އެވެ. އޭގެ ތިން މިނިޓް ފަހުން ޖީސޫސް ޖެހި ބޯޅައެއް ގޯލަށް ވަނީ ފޮޑެން ފައިގައި ޖެހިފައި އަދި ކީޕަރު ސަންޗޭޒް އަތުގައި ވެސް ޖެހިފަ އެވެ. ބޯޅައިގެ މިސްރާބު ކީޕަރު ސަންޗޭޒަށް އޮޅުނީ ފޮޑެން ފައިގައި ޖެހިފައި ކަމަށްވާތީ ލީގުން ނިންމީ މި ގޯލު ފޮޑެން އަށް ދިނުމަށެވެ.
ބްރައިޓަންގެ މޯޑާ (ވ) ކައިރިން ސިޓީގެ ފޮޑެން ބޯޅަ ފޮނުވާލަނީ.
ދެ ވަނަ ހާފް ފަށައިގެން ބްރައިޓަން އިން ގިނަ އެޓޭކްތަކެއްކޮށް ގޯލެއް ޖެހޭތޯ ގިނަ ހަމަލާތަކެއް ފޮނުވާލި އެވެ. އެގޮތުން ޕަސްކާލް ގްރޮސް އާއި ލެއަންޑްރޯ ޓްރޮސާޑް ޖެހި ބޯޅަތައް ސިޓީގެ ކީޕަރު އެޑަސަން މޮރާއޭސް ވަނީ މަތަކޮށްފަ އެވެ. އެކަމަކު، މެޗުގެ ފުރިހަމަ ވަގުތު ހަމަވާން ނުވަ މިނިޓަށް ވެފައި ވަނިކޮށް އެޑަސަން ދިން ޕެނަލްޓީ އަކުން ބްރައިޓަން އިން ގޯލެއް ޖެހި އެވެ. އެޑަސަން އޭރިއާތެރެއިން ބްރައިޓަންގެ އެނޮކް އެމްވޭޕޫ އަށް ކުރި ފައުލަކަށް ދިން ޕެނަލްޓީ އާޖެންޓީނާގެ ފޯވާޑް އަލެކްސިސް މެކަލިސްޓާ ވަނީ ގޯލަށް ފޮނުވާލައިފަ އެވެ.
އިތުރު ވަގުތުގެ ގޮތުގައި ދެއްކި ފަސް މިނިޓްގެ ތެރެއިން ފަހު މިނިޓްގައި ސިޓީގެ ފަހު ގޯލު ޖެހީ ފޮޑެން ދިން ބޯޅައަކުން ރިޔާދު މާރޭޒް އެވެ. މި ސިޓީގެ އެއް މެޗެއްގައި ދެ ލަނޑު ޖަހައި އެއް ގޯލު ޖަހަން ފޮޑެން ފުރުސަތު ތަނަވަސްކޮށްދިން ފުރަތަމަ ފަަހަރެވެ. މި މެޗުގައި ހެޓްރިކް ހަދަން ފޮޑެން ޖެހި ޝޮޓްތައް ކީޕަރު ސަންޗޭޒް ވަނީ ހުއްޓުވައިފަ އެވެ.
ލީގުގައި މިރޭ ކުޅުނު އެހެން މެޗުތަކަށް ބަލާއިރު، ފަހު ވަގުތު ގޯލުތަކެއް ޖަހައިގެން ކްލައުޑިއޯ ރަނިއޭރީގެ ވަޓްފޯޑް ވަނީ 5-2 އިން އެވަޓަން ދަނޑުގައި މޮޅުވެފަ އެވެ. މިއީ ކުރިން ލެސްޓާ އާއި ޗެލްސީ އަށް ކޯޗުކޮޑްދިން ރަނިއޭރީ ހަވާލުވި ފަހުން އެ ޓީމަށް ލިބުނު ފުރަތަމަ މޮޅެވެ.
ކްރިސްޓަލް ޕެލަސް އާއި ނިއުކާސަލް 1-1 އިން އެއްވަރުވިއިރު، ލީޑްސް އާއި ވުލްވްސް ވެސް ނިމުނީ ހަމަ އެ ނަތީޖާއިންނެވެ. އަދި ސައުތެމްޓަން ދަނޑުގައި ބާންލީ ވެސް ވަނީ 2-2 އިން އެއްވަރުކޮށްފަ އެވެ.
