މިއުނިކް (އޮކްޓޫބަރު 23) - ދެ ވަނައިގައި އޮތް ބޮރޫޝިއާ ޑޯޓްމަންޑުން އާރްމީނިއާ ބީލަފީލްޑް އަތުން 3-1 އިން މޮޅުވި ނަމަވެސް މިރޭ ހޮފެންހައިމް އަތުން ފަސޭހަކަމާ އެކު 4-0 އިން މޮޅުވެ، އެންމެ ފަހުގެ ޗެމްޕިއަން ބަޔާން މިއުނިކުން ޖަރުމަނު ލީގުގެ އެއް ވަނައިގައި އެއް ޕޮއިންޓުގެ ލީޑު ދަމަހައްޓައިފި އެވެ.
ކުޅުނު ނުވަ މެޗުން ބަޔާން ލީގުގެ އެއް ވަނައިގައި އޮތީ 22 ޕޮއިންޓް ހޯދައިގެންނެވެ. ދެ ވަނައިގައި އޮތް ޑޯޓްމަންޑަށް ވަނީ ނުވަ މެޗުން 21 ޕޮއިންޓް ލިބިފަ އެވެ. ތިން ވަނައިގައި އޮތީ މިރޭ ވުލްފްސްބާގް އަތުން ރަށުންބޭރުގައި 2-0 އިން މޮޅުވި ފްރެއިބާގެވެ. ފްރެއިބާގަށް ވަނީ ނުވަ މެޗުން 19 ޕޮއިންޓް ލިބިފަ އެވެ.
ބަޔާންގެ އަލިއާންޒް އެރީނާގައި މިރޭ ކުޅުނު މެޗުގައި ފުރަތަމަ 30 މިނިޓް ތެރޭގައި ބަޔާނުން ވަނީ ދެ ގޯލުގެ ލީޑެއް ނަގައިފަ އެވެ. މެޗުގެ ކުރީކޮޅުގައި ސާޖް ގްނަބްރީ ޖެހި ގޯލެއް ވަނީ ބަލައިނުގަތެވެ. އެކަމަކު، މެޗުގެ 16 ވަނަ މިނިޓްގައި ޖަމާލް މުސިއާލާ ދިން ބޯޅައަކުން ގްނަބްރީ ވަނީ ބަޔާނަށް ލީޑުނަގައިދީފަ އެވެ. އޭގެ ފަހުން 30 ވަނަ މިނިޓްގައި ބަޔާންގެ ދެ ވަނަ ގޯލު ޖެހީ ރޮބަޓް ލެވަންޑޯސްކީ އެވެ. މިއީ މި ފަހަރު ލީގުގައި ލެވަންޑޯސްކީ ނުވަ މެޗުން ޖެހި 10 ވަނަ ގޯލެވެ.
ހޮފެންހައިމް ކުޅުންތެރިއަކު ކައިރިން ލެވަންޑޯސްކީ ބޮލުން ބޯޅަ ފޮނުވާލަން މަސައްކަތްކުރަނީ.
ކޮވިޑް-19 އަށް ޕޮޒިޓިވްވެފައިވާތީ ބަޔާންގެ ކޯޗު ހޫލިއަން ނާގަލްސްމަން ހޯމް ކަރަންޓީނުގައި ހުރި މި މެޗުގައި ބަޔާންގެ ފަހު ދެ ގޯލު ޖެހީ މެޗުގެ ފަހު ކޮޅުގަ އެވެ.
މެޗުގެ 82 ވަނަ މިނިޓްގައި ބަޔާންގެ ތިން ވަނަ ގޯލު ޖެހީ އެރިކް މެކްސިމް ޗޮޕޫ-މޯޓިން އެވެ. އޭގެ ފަސް މިނިޓް ފަހުން ކިންގްސްލީ ކޯމަން ވަނީ ބަޔާންގެ ހަތަރު ވަނަ ގޯލު ޖަހައިފަ އެވެ. މި ދެ ގޯލު ޖަހަން ވެސް ފުރުސަތު ތަނަަވަސްކޮށްދިނީ ބަޔާނަށް މި ސީޒަނުގައި ބަދަލުވި ފްރާންސްގެ ޑިފެންޑަރު ޑަޔޫޓް އުޕަމެކާނޯ އެވެ.
ރަށުންބޭރުގައި މިރޭ ކުޅުނު ޑޯޓްމަންޑުން ވަނީ ފުރަތަމަ ހާފުގައި އެމްރޭ ޗާންގެ ޕެނަލްޓީ އާއި މެޓް ހަމެލްސްގެ ގޯލުން ފުރަތަމަ ހާފުގައި ދެ ގޯލުގެ ލީޑެއް ނަގައިފަ އެވެ.
އަނިޔާގެ ސަބަބުން ނޯވޭގެ ފޯވާޑް އާލިން ބްރައުޓް ހާލަންޑް ނުލައި ޑޯޓްމަންޑުން ކުޅުނު މި މެޗުގެ 72 ވަނަ މިނިޓްގައި އިނގިރޭސި މިޑްފީލްޑަރު، އުމުރުން 18 އަހަރުގެ ޖޫޑް ބެލިންހަމް ޖެހި މޮޅު ގޯލުން ޑޯޓްމަންޑުން ތިން ގޯލަށް ލީޑުފުޅާކުރި އެވެ. ބެލިންހަމް މި ގޯލު ޖެހީ ތިން ކުޅުންތެރިން ކައިރިން ނައްޓާފައި ގޮހެވެ.
މެޗު ނިމުމުގެ ކުރިން އަމިއްލަ ދަނޑުގައި ކުޅުނު އާރްމީނިއާ ބީލަފީލްޑުން ގޯލެއް ޖެހި އެވެ. ޕެނަލްޓީ އަކުން އެ ޓީމުގެ ގޯލު ޖެހީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް ފަބިއަން ކްލޯސް އެވެ.
