މިއަދުގެ ޒުވާނުންނަކީ މާދަމާ ގައުމުގެ ހުންގާނާ ހަވާލުވާން ތިބި މީހުން ކަމަށާއި އެހެންވެ ގާބިލް ޒުވާނުންތަކެއް އުފެއްދުމަށް ސަރުކާރުން ގިނަ މަސައްކަތްތަކެއް ކުރަމުން އަންނަ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ގައުމީ ޒުވާނުންގެ ދުވަހުގެ މުނާސަބަތުގައި ކުޅުދުއްފުށީ ސިޓީގައި މިރޭ ބޭއްވި ޖަލްސާގައި ރައީސް ވިދާޅުވީ ސަރުކާރުން މަސައްކަތްކުރަމުން ދަނީ ޒުވާނުން ގައުމުގެ ހިންގުމާ ހަވާލުވާ ދުވަސް އަންނަންވާ އިރަށް އެ ޒުވާނުންނަކީ ގައުމީ މަސްއޫލިއްޔަތު އުފުލޭވަރުގެ ބަޔަކަށް ހެދުމަށް ކަމަށެވެ.
"ފުރަތަމަ ޑިގްރީއަށް ހިލޭ ކިޔަވައިދިނުމުގެ އެންމެ މުހިންމު ބޭނުމަކީ ވެސް، ގައުމަށް ބޭނުންތެރި އިލްމީ ޒުވާނުން ބިނާކުރުން. މަސައްކަތުގެ ދާއިރާތަކުން މީހުން ތަމްރީން ކުރުމުގެ ފުރުސަތުތައް މި ފަހިކޮށްދެނީ ވެސް، ގައުމުގެ ތަރައްގީގައި ބައިވެރިވާނެ ހުނަރުވެރި އަދި ފަންނުވެރި ޒުވާނުން އުފެއްދުމަށް،" ރައީސް ވިދާޅުވި އެވެ.
ރައީސް ގޮވާލެއްވީ ޒުވާން އުމުރުފުރައަކީ އުމުރުގެ އެންމެ އަގުބޮޑު ދުވަސްވަރުކަން ދެނެގަނެ ހަޔާތުގެ ކުރިމަގަށް އަޅާ ބިންގާ ސީދާކޮށް ކޮންމެ ޒުވާނެއްގެ ކިބައިގައި ވެސް ތަފާތު ހުނަރުތަކަކާއި ތަފާތު ގާބިލުކަމެއް އަލާކުރުމަށެވެ.
"ގައުމު މިއަދު އެދި ގޮވަނީ، ތިޔަ ޒުވާނުންގެ ކިބައިގައި ހުރި ހުނަރާއި ފަންނުވެރިކަމުން، އަދި އުފެއްދުންތެރި ވިސްނުންތަކުން ގައުމަށް ކުރިއެރުން ހޯދައިދިނުމަށް،" ރައީސް ވިދާޅުވި އެވެ.
ޒުވާނުންގެ ދުވަސް މިއަހަރު އައީ، ޒުވާނުންގެ ކަންކަމާމެދު ވަރަށް ބޮޑަށް ވިސްނަން ޖެހިފައިވާ ދުވަސްވަރެއްގައިކަން ފާހަގަކުރައްވަމުން ރައީސް ވިދާޅުވީ ޒުވާނުންނަށް ކިޔަވައިދިނުމާއި، މަސައްކަތުގެ ތަމްރީން ހޯދައިދިނުމާއި، ވަޒީފާގެ ފުރުސަތުތައް އިތުރުކުރުމާއި، ގައުމީ ތަރައްގީގައި ޒުވާނުންގެ ބައިވެރިވުން އިތުރުކުރުމަކީ އެކަންކަމާ ދޭތެރޭ ވަރަށް ބޮޑަށް ވިސްނަން ޖެހިފައިވާ ކަމެއް ކަމަށެވެ.
އަދި ސަރުކާރުން މިހާރު ޑްރާފްޓްކޮށްފައިވާ "ޒުވާނުން ބިނާކުރުމާއި ހުނަރުވެރިކުރުމުގެ ބިލް" ގެ އެންމެ މުހިންމު އެއް މަގުސަދަކީވެސް އިސްލާމް ދީނަށް ލޯބިކުރާ ދީނުގެ އަސާސްތަކަށް ހުރުމަތްތެރިކޮށް ހިތާ ގައުމިއްޔަތުގެ ސިފަތައް ލިބިގެންވާ ޒުވާނުންތަކެއް ބިނާކުރުންކަމަށް ރައީސް ވިދާޅުވި އެވެ.
"ޒުވާނުންގެ އުންމީދުތައް ހަގީގަތަކަށް ހެދުމަށް މަގު ދައްކައިދީ، ކުރިމަގުގެ ފުރުސަތުތަކަށް މަގުފަހުކޮށްދިނުމަކީ ވެސް މި ބިލްގެ ވަރަށް މުހިންމު މަގުސަދެއް. މިބިލްގެ ސަބަބުން، ގައުމު ކުރިއަރުވައި ރާއްޖެއަށް ޝަރަފާއި ފަހުރު ހޯދައި ދިނުމުގައި، މިހާރަށްވުރެ ބޮޑަށް ޒުވާނުންގެ ބައިވެރިވުން ލިބޭނެކަމަށް ގަބޫލުކުރެވޭ،" ރައީސް ވިދާޅުވި އެވެ.
މީގެ އިތުރުން ގައުމީ ކަންކަމުގައި އިސްނެގުމާއި ހިންގުމުގެ ރޫހު ޒުވާނުންގެ މެދުގައި އާލާކުރުމުގެ ޕްރޮގްރާމެއް ވެސް މިހާރު ކުރިޔަށްދާކަމަށް ރައިސް ވިދާޅުވި އެވެ. އަދި މަސައްކަތުގެ ހުނަރު ދަސްކޮށްދީ ވަޒީފާގެ ބާޒާރަށް ޒުވާނުން ނެރެން ކުރިއަށް ގެންދާ، އެޕްރެންޓިސްޝިޕް ޕްރޮގްރާމާ ގުޅޭ ގޮތުން ވެސް ރައީސް ވާހަކަދެއްކެވި އެވެ.
"މިއަހަރު ފެށި ނޭޝަނަލް ވޮލަންޓިއާސް ޕްރޮގްރާމްގައި މިއަދާ ހަމައަށް ޖުމްލަ 105 ވޮލަންޓިއަރުން ބައިވެރިވެއްޖެ. އޭގެ ތެރެއިން 40 ވޮލަންޓިއަރުން ތަމްރީން ފުރިހަމަކޮށް މިހާރު އަންނަނީ ގައުމީ ކަންކަމުގައި ބައިވެރިވަމުން. ކޮވިޑް ފެސިލިޓީތަކުގައި ވެސް ބައެއް ވޮލަންޓިއަރުން ވަރަށް މުހިންމު ހިދުމަތްތަކެއް ކުރެއްވި،" ރައީސް ވިދާޅުވި އެވެ.
"(އެޕްރެންޓިސްޝިޕް) ޕްރޮގްރާމްގެ ދަށުން ދެ ކުންފުންޏަކަށް 19 ޒުވާނުން ތަމްރީންކުރުމުގެ މަސައްކަތް މިހާރު އެބަ ކުރިއަށްދޭ. އަދި އިތުރު ކުންފުނިތަކާ މަޝްވަރާކޮށް، ކުރިމަތިލި ޒުވާނުން ޝޯޓްލިސްޓް ކުރުމުގެ މަސައްކަތް އެދަނީ ކުރިޔަށް،" އެ ޕްރޮގްރާމްތަކަކީ 3،000 ރުފިޔާގެ އެލަވަންސެއް ދީގެން، ތަޖުރިބާކާރުންގެ ބެލުމުގެ ދަށުން މަސައްކަތުގެ ހުނަރާއި ތަމްރީން ހޯދައިދޭ ޕްރޮގްރާމްތަކެއްކަން ރައީސް ފާހަގަކުރެއްވި އެވެ.
ރައީސް ވަނީ މިރޭ ޔޫތު އެވޯޑު ހާސިލްކުރި 10 ޒުވާނުންނަށް ވެސް މަރުހަބާ ވިދާޅުވެ، އެ ޒުވާނުންގެ މަސައްކަތުން ގައުމުގެ ކަންކަން ރަނގަޅު ކުރުމުގެ އަޒުމް، ދިވެހި ޒުވާނުންގެ ކިބައިގައި އެބަހުރިކަން ސާބިތުވެފައިވާ ކަމަށް ވެސް ވިދާޅުވެފަ އެވެ.
ރައީސްގެ ވާހަކަ ނިންމަވާލައްވަމުން ވިދާޅުވީ ޒުވާނުންގެ ހުރި ހުނަރާއި ފަންނުވެރިކަމުން ގައުމަށް ކުރިއެރުން ހޯދައިދިނުމަށް އެދި ގައުމު ގޮވާލަމުންދާ ކަމަށެވެ.
"އަޅުގަނޑުގެ އުންމީދަކީ، ގައުމަށް ބޭނުންތެރި އަދި ގައުމަށް ހިދުމަތްކުރާ މީހަކަށް ވުމުގެ އަޒުމް، ތިޔަ ޒުވާނުން މިއަދުން ފެށިގެން ކަނޑައެޅުން، ދިވެހި ޒުވާނުންގެ ހިތްތަކުގައި ގައުމުގެ ތަރައްގީއާއި ކުރިއެރުމުގައި މިހާރަށް ވުރެ ފުޅާ ދާއިރާއެއްގައި ބައިވެރިވުމުގެ ޝައުޤުވެރިކަން އުފައްދުން،" ރައީސް ވިދާޅުވި އެވެ.
