ވޮޝިންޓަން، އެމެރިކާ (އޮކްޓޯބަރު 23) - އެމެރިކާ އިން ސީރިއާ އަށް ދިން ޑްރޯން ހަމަލާއެއްގައި އަލް ގައިދާގެ އިސް ލީޑަރަކު މަރާލައިފި އެވެ.
އެމެރިކާގެ ހަމަލާދީފައި މި ވަނީ މީގެ ދެ ދުވަސް ކުރިން ދެކުނު ސީރިއާގައި ހުންނަ އެމެރިކާ ކޯލިޝަނުގެ އަސްކަރީ މަރުކަޒަކަށް ހަމަލާދީފައި ވަނިކޮށެވެ.
"ހުޅަނގު އުތުރު ސީރިއާ ގައި އެމެރިކާ އިން މިއަދު (ހުކުރު ދުވަހު) ދިން ޑްރޯން ހަމަލާއެއްގައި އަލް ގައިދާގެ އިސް ލީޑަރު އަބްދުލް ހާމިދް އަލް މަތާރް ވަނީ މަރާލާފައި،" ސެންޓްރަލް ކޮމާންޑް ތަރުޖަމާނު އާމީ މޭޖާ ޖޯން ރިގްސްބީ ވިދާޅުވި އެވެ.
އެމްކިއު-9 ވައިގެ އުޅަނދެއްގެ އެހީގައި ފޮނުވި ހަމަލާގައި އިތުރު އެއްވެސް ބަޔަކު މަރުވި ކަމުގެ ރިޕޯޓެއް ނުލިބޭ ކަމަށް އޭނާ ވިދާޅުވި އެވެ.
"އަލް ގައިދާގެ އެ ލީޑަރު މަރާލެވުމާއެކު ޓެރަރިސްޓު ގްރޫޕުގެ މަސައްކަތަށް ހުރަސް އެޅިގެންދާނެ،" އޭނާ ވިދާޅުވި އެވެ.
މިދިޔަ ސެޕްޓެމްބަރު މަހުގެ ފަހުކޮޅު ވެސް އެމެރިކާ އިން ވަނީ ސީރިއާ އަށް ދިން ވައިގެ ހަމަލާއެއްގައި އަލް ގައިދާގެ އިސް ލީޑަރަކު މަރާލާފަ އެވެ. އެ ފަހަރު މަރުވީ ސާލިބް އަބޫ އަހްމަދެވެ.
ސެންޓްރަލް ކޮމާންޑުން ބުނި ގޮތުގައި އޭނާ އަކީ އަލް ގައިދާގެ ހަމަލާތައް ރާވައި، ފަންޑުކޮށް އަދި ހަމަލާ ދިނުމަށް ހުއްދަ ދިނުން ފަދަ ކަންކަމުގައި އިސްކޮށް އުޅުނު މީހެކެވެ.
"އަލް ގައިދާ އަކީ އެމެރިކާ އާއި އަޅުގަނޑުމެންގެ އެކުވެރިންނަށް ނުރައްކަލެއް. އަލް ގައިދާ އިން ސީރިއާ ބޭނުން ކުރަނީ އެ ގްރޫޕު އަލުން ބިނާކުރާ މަރުކަޒެއްގެ ގޮތުގައި،" ރިގްސްބީ ވިދާޅުވި އެވެ.
ސީރިއާގެ ދާހިލީ ހަނގުރާމައާ ހެދި އެ ގައުމު ވެފައި ވަނީ ގިނަ އަދަދެއްގެ ބޭރުގެ ފައުޖުކާއި ޓެރަރިސްޓު ގްރޫޕުތަކުން ހަރަކާތްތެރިވާ މަރުކަޒަކަށެވެ.
ސީރިއާ ހަނގުރާމައިގައި 2011 ވަނަ އަހަރުން ފެށިގެން ބައި މިލިއަނަށް ވުރެ ގިނަ މީހުން މަރުވެފައި ވެ އެވެ. އެ ހަނގުރާމަ ފެށުނީ ސަރުކާރާ ދެކޮޅު އެއްވުންތައް ހުއްޓުވަން ސިފައިން ނެރުނު ހިސާބުންނެވެ.
