ލިވަޕޫލް (އޮކްޓޫބަރު 23) - ފުޓްބޯޅަ ކެރިއަރު ނިމެންދެން ބޭނުންވަނީ ލިވަޕޫލްގައި މަޑުކުރަން ކަމަށް މިސްރުގެ ފޯވާޑް މުހައްމަދު ސަލާހު ބުނެފި އެވެ.
އުމުރުން 29 އަހަރުގެ ސަލާހު ލިވަޕޫލްގައި ހުރީ 2023 ވަނަ އަހަރުގެ ޖޫން މަހުގެ ނިޔަލަށް ހަދާފައިވާ ކޮންޓްރެކްޓެއްގަ އެވެ.
ލިވަޕޫލުން އަންނަނީ ސަލާހުގެ ކޮންޓްރެކްޓް އާ ކުރަން މަޝްވަރާ ކުރަމުންނެވެ. ރިޕޯޓްތައް ބުނާގޮތުން ސަލާހު ލިވަޕޫލްގައި މަޑުކުރަން ކިޔާ މުސާރަ އުޅެނީ ހަފްތާ އަކު 450،000 ޑޮލަރަށް ވުރެ މަތީގަ އެވެ. ލިވަޕޫލުން އެ އަގު ދޭނަަމަ އެ ކްލަބްގެ މުސާރަ ޕޮލިސީ އަށް ބޮޑު ބަދަލެއް ގެންނަން ޖެހޭނެ އެވެ.
އިއްޔެ ސްކައި ސްޕޯޓްސް އަށް ދިން އިންޓަވިއުއެއްގައި ސަލާހު ބުނީ އޭނާ ލިވަޕޫލްގައި މަޑުކުރުމަކީ އަމިއްލަ އަތުގައި އޮތް ނިންމުމެއް ނޫން ކަމަށެެވެ.
"އެ ކަންކަން އޮތީ ކްލަބަށް. އަހަރެންގެ އަމިއްލަ ވިސްނުމުގައި އެއްޗެއް ބުނާނަމަ ފުޓްބޯޅަ ކެރިއަރުގެ އެންމެ ފަހު ދުވަހާ ޖެހެންދެން އަހަރެން ލިވަޕޫލްގައި ހުންނަން ބޭނުން،" ސަލާހު ބުންޏެވެ.
"އަހަރެން ބޭނުމެއް ނޫން މި ކްލަބް ދޫކޮށް ދާން. އެެހެން ކްލަބެއްގައި ހުރެ ލިވަޕޫލާ ދެކޮޅަށް ކުޅެން ވެސް ބޭނުމެއް ނޫން. އެކަމަކު މި ހުރިހާ ކަމެއް ބަރޯސާވެފައި އޮތީ ކްލަބުން ބޭނުންވާ ގޮތެއްގެ މައްޗަށް،"
އާދަޔާހިލާފު ފޯމެއްގައި ހުރި ސަލާހު ވަނީ މި ސީޒަނުގެ ހުރިހާ މުބާރާތެއްގައި ކުޅުނު 11 މެޗުގައި ޖުމްލަ 12 ގޯލު ޖަހައިފަ އެވެ. މި ގޯލުތަކުގެ ތެރެއިން ސަލާހު ވަނީ ރެކޯޑްތަކެއް މުގުރާލައި ބައެއް ރެކޯޑްތަކާ ހަމަކޮށްފަ އެވެ.
އެ ގޮތުން ސަލާހު ވަނީ ލިވަޕޫލަށް އެންމެ އަވަހަށް 100 ގޯލު ޖަަހައިދިން ކުޅުންތެރިޔާގެ ރެކޯޑް ހަދައި، ލިވަޕޫލްގެ ތާރީހުގައި ޖެހިޖެހިގެން ނުވަ މެޗުގައި ގޯލު ޖެހި ފުރަތަމަ ކުލުންތެރިޔާގެ ޝަރަފް ވެސް ހޯދައިފަ އެވެ. އަދި ޔޫރަޕްގައި ލިވަޕޫލަށް އެންމެ ގިނަ ގޯލު ޖެހުމުގެ ރެކޯޑް ވެސް މިހާރު އޮތީ ސަލާހު އަތުގަ އެވެ.
މިސްރުގެ އަލް މޮކަލޫނުން 2010 ވަނަ އަހަރު ފުޓްބޯޅަ ކެރިއަރު ފެށި ސަލާހު ދެން ބަދަލުވީ 2012 ވަނަ އަހަރު ސްވިޒަލެންޑްގެ ބަސެލް އަށެވެ. ޗެލްސީން 2012 ވަނަ އަހަރު 14 މިލިއަން ޑޮލަރަށް ސަލާހު ގަތް ނަމަވެސް އޭނާގެ ބޭނުން މާ ބޮޑަށް ނުހިފުނެވެ.
ޗެލްސީގައި ފުރުސަތު ނުލިބޭތީ ސަލާހު ދެން ބަދަލުވީ އިޓަލީގެ ފިއޮރެންޓީނާ އާއި ރޯމާ އަށް ލޯން އެއްބަސްވުމެއްގެ ދަށުންނެވެ. ފަހުން ދާއިމީ ކޮންޓްރެކްޓެއްގައި ރޯމާ އަށް ސޮއިކުރުމަށް ފަހު އެ ޓީމުގައި ތަފާތު ދެއްކި އެވެ. ނަތީޖާ އަކަށްވީ 2017 ވަނަ އަހަރު ލިވަޕޫލުން 40 މިލިއަން ޑޮލަރަށް ސަލާހު ގަތުމެވެ. ލިވަޕޫލަށް މިހާތަނަށް ކުޅެދިން މެޗުތަކަށް ބަލާއިރު، ސަލާހު ވަނީ 214 މެޗުން 137 ގޯލު ޖަހައި 51 ގޯލު ޖަހަން ފުރުސަތު ތަނަވަސްކޮށްދީފަ އެވެ.
