ލަންޑަން (އޮކްޓޫބަރު 23) - މި ސީޒަން ފެއްޓުމުގެ ކުރިން ޗެލްސީގެ ރެކޯޑް ޓްރާންސްފާއެއްގެ ގޮތުގައި ރޮމެލޫ ލުކާކޫ އެ ޓީމާ ގުޅުނީ ފައިސާ އަށް ކަމަށް އިންޓަ މިލާންގެ ޗީފް ބެޕޭ މޮރާޓާ ވިދާޅުވެއްޖެ އެވެ.
ލުކާކޫ ގަންނަން ޗެލްސީން އެންމެ ފުރަތަމަ ކުރި ދެ ބިޑް ވެސް އިންޓަ އިން ވަނީ އަނބުރާ ފޮނުވާލައިފަ އެވެ. އެކަމަކު، ޗެލްސީ ލުކާކޫ ގަންނަން ތިން ވަނަ ބިޑެއް ތައްޔާރުކުރަން ފެށުމާ އެކު ލުކާކޫ އިންޓަގައި އެދުނީ އޭނާ ޗެލްސީ އަށް ދޫކޮށްލުމަށެވެ. އެހެންވެ، އިންޓަ އިން ބޭއިހުތިޔާރުގައި ވިޔަސް ނިންމީ ލުކާކޫ ވިއްކާލާށެވެ.
ޗެލްސީން އެންމެ ފުރަތަމަ ލުކާކޫ ގަންނަން އިންޓަ އަށް ހުށަހެޅީ 94 މިލިއަން ޑޮލަރުގެ ބިޑެކެވެ. މާ ގިނައިރުތަކެއް ނުވެ އިންޓަ އިން އެ ބިޑް އަނބުރާ ފޮނުވާލި އެވެ. އޭގެ ފަހުން ޗެލްސީން ހުށަހެޅީ 100 118 މިލިއަން ޑޮލަރު އާއި ސްޕެއިންގެ ފުލްބެކް މާކޯސް އަލޮންސޯ އެވެ. އެ ޑީލަށް ވެސް އިންޓަ އިން ވަނީ ނޫނެކޭ ބުނެފަ އެވެ. ލުކާކޫގެ ވެސް އެދުމާ އެކު އިންޓަ އިން އޭނާ ޗެލްސީ އަށް ވިއްކާލީ 135 މިލިއަން ޑޮލަރަށެވެ. އެއީ އެއް ކުޅުންތެރިއަކު ހޯދަން ޗެލްސީން އެ ކްލަބްގެ ތާރީހުގައި ވެސް ދިން އެންމެ ބޮޑު ޓްރާންސްފާ ފީ އެވެ.
"ލުކާކޫ ދިޔައީ އިންޓަ އިން ދެމުން ދިޔަ މުސާރަ އަށް ވުރެ ދެ ގުނަ ބޮޑު މުސާރަ އަކަށް. އެހެންވީމަ އޭނާ ޗެލްސީ އަށް ދިޔައީ ފައިސާ އަށޭ ބުނެވޭނެ،" އިޓަލީގެ ނޫހަކަށް ދިން އިންޓަވިއުއެއްގައި މަރޯޓާ ވިދާޅުވި އެވެ.
ޗެލްސީން ސީޒަނަކު ލުކާކޫ އަށް މުސާރައިގެ ގޮތުގައި 12 މިލިއަން ޔޫރޯ ދެ އެވެ. އިންޓަ އަށް ކުޅުނުއިރު ބޯނަހާ އެކު ލުކާކޫ އަށް ލިބެނީ 5.8 މިލިއަން ޔޫރޯ ކަމަށް މީޑިއާ ރިޕޯޓްތައް ބުނެ އެވެ. ލުކާކޫ ވިއްކާލުމަށް ފަހު އެ މަގާމަށް އިންޓަ އިން ގެނައީ ރޯމާގައި ހުރި ބޮސްނިއާގެ ފޯވާޑް އެޑިން ޒެކޯ އެވެ.
ޒެކޯ އަންނަނީ ހިލޭ ޓްރާންސްފާއެއްގައި އިންޓަ އަށް ބަދަލުވެ، ރަނގަޅު ކުޅުމެއް ދައްކައި ގިނަ ގޯލުތަކެއް ޖަހަމުންނެވެ. ޒެކޯ ވަނީ 11 މެޗުން ހަތް ގޯލު ޖަަހައި ތިން ގޯލު ޖަހަން ފުރުސަތު ތަނަވަސްކޮށްދީފަ އެވެ.
"ލުކާކޫ ވެސް ފޯވާޑަކަށް ހުރެ ޖެހީ ގޯލު. ހަމަ އެ ގޮތަށް އެކަންކަން ޒެކޯ ވެސް ފުރިހަމަ އެބަކޮށްދޭ. އެހެންވީމަ އަހަރެމެންނަށް ލުކާކޫ ގެއްލުނަސް ކްލަބްގެ ހިންގުމަށް ބަލާއިރު މި ލިބުނީ މާލީ ގޮތުން ލުޔެއް،" މަރޯޓާ ވިދާޅުވި އެވެ.
އިޓަލީގެ ކްލަބްތަކުގެ ހަރަދުކުރުމުގެ ވައްޓަފާޅި ހުރި ގޮތަށް ބަލާއިރު، އެއްވެސް ކްލަބަކުން ކުއްލިއަކަށް އެހެން ހުރެފައި 100 މިލިއަން ޑޮލަރަށް ވުރެ ބޮޑު އަގެއް ދީފައި ކުޅުންތެރިން ނުގަންނާނެ ކަމަށް މަރޯޓާ ވަނީ ވިދާޅުވެފަ އެވެ.
